369 миллион теңгеге салынған СПОРТ ЗАЛ ҚҰРЫЛЫСЫНЫҢ САПАСЫ ҚАНДАЙ?..

Соңғы кездері өңірлік саясатты жоғары деңгейге көтеру мәселесі күн тәртібінен түспей тұр. Тұрғындармен тікелей қарым-қатынас жасау, олардың проблемаларын шұғыл түрде шешу Президент тарапынан жергілікті билік өкілдеріне жүктелген. Дейтұрғанмен, әлі де болсын қарапайым халық өз базынасын «Кімге?», «Қашан?», «Қайда?» айту керектігін білмейді. Осы олқылықтың орнын толтыру үшін бүгінде БАҚ өкілдері жаңа айдарлар ашуда.

Бұл баянды бастамалардан «құлантаңдықтар» да шет қалған жоқ. Редакциялық алқа ақылдаса келе, «Алло, «Құлан таңы» тыңдап тұр!» айдарын ашты. Мұндағы басты мақсатымыз – облыстық, аудандық әкімдіктердің терезелеріне телміре қарап, ішке ене алмай жүрген жандардың жан айқайын жоғарыдағыларға жеткізу. Айдар ашқанымызды жария еткенімізге көп те болған жоқ. Екі күн бұрын тілшілеріміздің жұмыс телефоны шырылдап қоймады. Тұтқаны көтерсек, қоңырау Тұрардай тау тұлғаның табаны тиген киелі мекен Луговойдан шалыныпты. Өзін ауыл белсендісі ретінде таныстырған Жұбаныш Сақал бізге мына бір жағдайды мәлімдеп берді: «Тыңдаңызшы, аға! Біздің ауылда осы күнге дейін спорт кешені болмаған. Ауылымыздан танымал спортшылардың шықпай жүргені соның айқын айғағы. Былтыр аудан әкімі есеп беру кездесуінде «Луговойда спорт кешені салынады» дегенде бөркімізді аспанға аттық. Әкім сөзінде тұрды. Спорт кешені салынып, мәдениет үйі маңынан зәулім ғимарат бой көтерді. Жуырда сол кешеннің құрылысымен танысуға бір топ спорт сүйер жандармен бірге бардық. Сенесіз бе?! Қуанышымыз су сепкендей басылды. Неге дейсіз ғой? Себебі, спорт кешенінің құрылысы мүлдем сын көтермейді. Бөлінген қомақты қаржыға сай келмейтіні бір қарағаннан-ақ көрініп тұр. Сол олқылыққа мықтап зерттеу жүргізіп, нәтижесін аудандық басылымға жарияласаңыздар деген ой келіп отыр», – деп өз өтінішін жеткізді. Ауыл жастарының өтінішін жерге тастай алмадық. Ертесіне бірден Луговой ауылындағы спорт кешеніне жол тарттық.
Су жаңа кешеннің ішінен қарауылдан өзге адамды таппадық. Жөн сұрасып, танысып, ғимарат есігін ашып беруді өтіндік. Ааа… Айтпақшы! Бір нәрсе айта кетейін, Жұбаныш айтқан сын аяғымыз асфальтқа тигеннен бастап көріне бастады. Сенесіз бе табанымыз асфальтқа емес, құдды бір жанған көмірдің қалдығына айналған күлге тигендей болды. Тым асыра төмендетпей-ақ қояықшы! Мердігер мырзаның мазасы қашып, жүрегі жарылып жүрер. Төселген жолдың арасында асфальт бар. Бірақ, тым аз секілді. Әсіресе, ғимарат артындағы төселген асфальттың сапасы өте нашар. Тіпті, асфальт деуге келмейді. Бәлкім бұл жолдың тым суықта төселгенінің кесірінен болар. Кім білсін?!
Сыртын айналып өтіп, ғимараттың ішіне кірдік. Мұнда да кемшіліктер жетерлік. Ғимарат ішіне жарықты көп беру үшін үлкен терезелер салыныпты. Бұл – жақсы. Енді жаман тұсына тоқталайық. Әлгі терезелер арнайы торлармен қоршалмаған. Үш-төрт рет доп тисе, терезенің төзімділігі тап сол сәтте таусылайын деп тұр. Бұл – бір. Екіншіден, төбеден су аққан жәйттерді де байқадық. Құдай-ау! Қалайша, бұл – су жаңа ғимарат емес пе?! Кешеннің үлкен алаңы мен төрешілер отыратын бөлмеде де су тамшылап тұр. Тіпті, төрешілер отыратын бөлме төбесінің бір бөлігі жерге құлап түскенін аңғардық. Жоғарыдағы біз атаған кемшіліктер «бергі жағы»екен. Сорақылықтың көкесі алда болып шықты. Біз оны мерді­гердің маза­ғы ма деп түсіндік. Үлкен алаңда орналасқан футбол қақпасы төрт бұрышты үлгідегі темірден жасалған екен. Біздің білуімізше ол дөңгелек үлгідегі те­мірден жасалуы керек. Осылай­ша құрылысшылар бала қауіпсіз­ді­гін шетке ысырғандай көрін­ді. Сондай-ақ, құрылысшылар аталмыш қақпаның үстіне баскетбол торында жапсарлас орнатыпты. Бұл енді әлгі құры­лысшылардың, мердігердің шектен шыққандығы деп түсіндік. Шыны керек, қаңқасы қисық соғылған қақпаға қарап, еріксіз езу тартасың. Құдды бір бұл қақпаны көп функционал­ды спорт кешеніне  

Тақырыпқа тұздық:
Осыдан төрт жыл бұ­рын орта­лықта зәулім спорт кешені салын­ған бола­тын. Оның үлкен залы, көрер­мендер мен құрметті қонақтар оты­ра­тын секторы, жаттығу және жуынатын бөлмелері бар. Сәулеті ке­ліскен ғимаратты салуға 362 миллион теңге жұмсалғанын біз жақсы біле­міз. Ал Луговойдағы спорт кешеніне бақандай 369 миллион қаражат жұмсалыпты. Нәтижесінде екеуін салыстырсақ, құрылыс сапасы мен сәулеті жағынан жер мен көктей. Ойланатын мәселе ме? Меніңше иә!

емес, ауыл шетіндегі алаңға орнатқандай әсер қалдырады. Құрылыс барысында жіберілген ұсақ қателіктерді айтпай-ақ қояйық. Ең дұрысы спорт кешеніне барып, ондағы өрескел қа­теліктерді өз көзі­ңізбен көр­геніңіз абзал.
Мемлекет басшысы Қасым-Жомарт Тоқаев «ХАЛЫҚ БІРЛІГІ ЖӘНЕ ЖҮЙЕЛІ РЕФОРМАЛАР – ЕЛ ӨРКЕНДЕУІНІҢ БЕРІК НЕГІЗІ» атты Жолдауында «Денсаулық кепілі – дене шынықтыру. Жұрттың және балалардың спортпен шұғылдануына жағдай жасалуы қажет екенін тағы да қайталап айтамын. Облыс әкімдері спорт инфрақұрылымын біртіндеп салуды қамтамасыз етуге тиіс. Жалпы, Токио олимпиадасының қорытын­ды­сына байланысты спорттағы ахуалды бөлек кеңесте қарау қажеттігі туындап отыр» – деп спорт саласының көрсеткіштері төмендеп бара жатқанын айтып, дабыл қаққан еді.
Расымен де, спорттағы соңғы көр­сет­кіштер мен нәтижелер көңіл көн­шітпейді. Ал бөлінген қаражаттар қо­мақты. «Ендеше мәселе неде?» деген заңды сауал туындайды. Біздіңше, бар мәселе осы іске жауапты мамандар­дың жауапкершілігінің жоқтығында. Құрылыс барысында бақылауды кү­шейту қажет еді деген ойда қалдық. Алақандай ауылдың өзінде дәл осын­дай олқылық болып жатқанда рес­публика көлемінде жіберіліп жат­қан кемшіліктерді сөз ету артық болар…
Тілші түйіні:
Не десек те, бұндай бағытпен «Жаңа Қазақстанды» құра алмайты­ны­мыз белгілі. Сыбайлас жемқорлығы ден­деп, жауапкерші­лігі төмендеп кеткен қоғамды жөнге қою оңайға соқпайын деп тұр. Сондықтан да бізге түбегейлі өзгеріс қажет. Ал ол өзгерісті түзетуді әр адам өзінен бастаса, қоғамдағы ахуал­ да өзгермек. Оған тек сенім мен талпыныс және жауапкершілік қажет.

Жәнібек СҰЛТАН.

Поделиться ссылкой: