«ЖЕТІСУ КҮЙШІЛІК МЕКТЕБІНЕ» КЕЛІП ҚОСЫЛҒАН ТЫҢ ТҰЛҒА немесе күйші әрі жыршы Төребек Әбдікерімнің тұңғыш кітабы жарық көрді

Иә, бұл біздің Тұрар Рысқұлов ауданы ғана емес, бүкіл Жамбыл жұртшылығы үшін айпара жаңалық. Енді өнер сүйер қауым Байсерке, Кенен Әзірбаев, Әбдімомын Желдібаев, Садыхан Әубәкіров, Әшірәлі Шыңқожаев, Мәді Шәутиев, Тұраш Әбуов, Боранқұл Көшмағамбетов, Аман Малдыбаев, Мұхтарбай Рахманқұловтардың есімімен бірге жерлесіміз, дарынды талант иесі Төребек Әбдікерімнің де есімін қатар атайтын болады.
Оған жақында Алматының «Жания-Полиграф» баспаханасында басылып шық­қан «Жыр тербеп, күй шертемін» атты Т.Әбдікерім­нің кітабы (оқу құралы) ілік бола алады деп ойлаймын. Тың туындының жарық көруіне Қазақстан Республикасы Мәдениет және спорт министрлігі, дәлірек айтқанда, Құрманғазы атындағы Қазақ ұлттық консерваториясының Халық музыкасы факультеті ұйытқы болып, кі­тап осы оқу орнының «Домбыра» кафедрасының жиналысында талқыланып, баспаға ұсыныл­ды. Оқу құралын баспаға білікті музыка маман­дары Дулат Байзілдаев пен Ерболат Әлімқұл әзірлеп, күйшінің сегіз күйін нотаға түсіріп, партитурасын қоса өткізді. Кітапқа елімізге та­­ны­мал Қазақстан Республикасына еңбегі сің­ген қайраткерлер: Құрманғазы атын­дағы Қазақ Ұлттық консерватория­сының профессоры, Халық музыкасы факультетінің деканы Т. Тоқжанов, М.Х.Дулати атындағы Тараз өңір­лік универ­сите­тінің профессоры Е.Рысметов пен М.Рахманқұловтар пікір жазды.
Кітапқа Жетісу күйшілік дәстүрінің жаңа өкілі Т.Әбдікерімнің «Еске алу», «Сонарда», «Жайлау», «Қазақстан», «Қарындасым, қайдасың?», «Шаттық», «Сағыныш», «Барат құда» атты күйлері мен «Жастар маршы», «Кім едің, сен?», «Хат жазасың қалқашым», «Еркем-ай» сияқты әндері енген. Оқу құралын­дағы күйлер қазақ оркестріне өңделіп, партитураға түсірілген. Мәселен, автордың айтуынша, «Еске алу» күйі Құрманғазы Сағырбайұлының күйін тыңда­ған соң жазылған туынды екен.
Жақында күйші, сазгер, ақын Төребек Әбдікерім өзінің 85 жасқа толған мерейлі ме­ре­кесін өзі туып өскен «Қарабұлақ» басында, «Тауқымыз» саяжайында атап өтті. Осынау мере­кеге кітапты құрастырушылар Д.Байзілдаев пен Е.Әлімқұл да келді. Жұрт алдында Т.Әбдікерімнің кітабының тұсауы кесілді. Алматыдан келген Құрманғазы оркестрінің шағын квартеті Төкеңнің күйлерін Ақыртөбе, Құлан, Өрнек, Жарлысу, Әбжапар өңірлерінен келген халыққа тұңғыш рет орындап берді.
Иә, бұл өзі қоңыржәй, қоңыртө­бел кеш болды. Жыршының: «Бір кітабымды шығарсам» деген арманы орындалды. Оған әрине, Төкеңнің өз ізін басып келе жатқан күйші ұлы Қаршығаның қосқан үлесі зор деп айтқан болар едік. «Қарабұлақ» ба­сында өткен көзәйім кештің жал­ғасын Жамбыл жұртшылығы енді осы қазан айында «Баласағұн» орталық концерт залынан тамашалайтын болады. Онда автор­дың шығармаларына арналған үлкен концерт болады.
Т.Әбдікерімнің 300-ден аса өлең-жыры мен дастаны, толғаулары мен арнаулары жазылған өлеңдер жинағы да жарық көріп қалатын шығар. Осы­нау ағаштан түйін түйе білетін шебер, жанынан күй шығара білетін асқан дарын иесін әрі шын шайырды халыққа таныстыру аудан мен облыстың мә­дениет бөлімдері басшыларының төл борышы деп білемін. Өйткені ерекше дарын иесі арамызда көп емес қой.

С.Қожеке.
Суретте: автордың тың туындысы.
Әбжапар ауылы.

Поделиться ссылкой: