Ерлік ешқашан ұмытылмайды

Ұлы Отан соғысындағы кескілескен ұрыс­тардың бірі – Сталинград шайқасы. Май­дан даласындағы бұл шайқас – 1942 жылдың 17 және 18 қарашасында болды. Осы шайқаста қаза тапқан, елге оралмай қалған майдангерлердің есімдерін жас ұрпақ ешқашан ұмытпайды, керісінше ұлықтайды.
Жуырда Мэлс Өзбеков атындағы аудандық мәдениет үйінде «Қазақстан Студенттер Альянсы» жастар қоғамдық бірлестігінің ұйымдастыруымен келелі конференция өтті. Республиканың үздік өлкетанушысы Әлі Бекқұлының модераторлығымен өткен конференцияға аудан әкімінің орынбасары Әлібек Терлікбаев, аудандық ардагерлер Кеңесінің төрағасы Қожайхан Бижанов қатысты. Адалын айту керек, дөңгелек үстел форматында өрбіген конференция барысында «ізденемен, түсінемін» деген пенде баласы табылса, құндылықтарға толы болды.
Ардагер ұстаз Әлі Бекқұлының есім-сойын аға буын өкілдері де, жас буын да біледі, таниды. Ол жат жерде қаза тапқан жамбылдық май­дан­герлер жөнінде деректер жинап, «оны келер ұрпақ білсін» деп барын са­лып еңбек етіп жүрген өлкетанушы. Сол еңбекқорлықтың нәтижесінде майдан­гер­лер туралы жинақталған деректер «Парыз» деген атаумен жеке кітап бо­лып жарық көріп, көпшілікке тарады. Бұл кітапта көпшілікке беймәлім жандар­дың есімдері мен құнды деректері қам­тылған. Конференция барысында Әлі Бекқұлы майдан шебіндегі шайқас туралы сүбелі сөз айтты.
– 2018 жылдың сәуірінде Ста­лин­град шайқасындағы жеңісіміздің 75 жылдығына баратын делегацияға қо­сылып, Волгоградқа бардым. Ма­май қорғанында қазақстандық жауын­герлердің ерлігіне арналған ескерткіш тақта, жеріміздің қасиетті топырағы салынған құтының қойылу рәсіміне арналған салтанатты жиынға қатыстым. 1075 жауынгеріміздің деректерін тапсырдым. «Звезда» телеарнасына сұхбат бердім. Сталин­градтың әскери-тарихи ескерткіштерін түсіріп, «Мир» теле­арнасымен бірге «Сталинград шай­қасы» атты деректі фильм шы­ғардық, – деді республиканың үздік өлке­танушысы Әлі Бекқұлы.
Сөз басында ардагер ұстаздың еңбегі ұшан-теңіз екенін айттық қой. Мына фактіге қараңызшы. 2013-2019 жылдар аралығында Ресейдің 14 облысынан, Белоруссия мемлекетінің 6 облысынан қаза тапқан жамбылдық 1200 жауынгердің есімін тауып, олардың есімдерін ескерткішке жазылуына ықпал етуінің өзі – үлкен ерлік емей немене?..
Осы ретте өлкетанушының өзі:
– Соғыстың әрбір күні, сағаты, минуты мәңгі ұмытылмас тарих. Ол естен кетпес шежіре ретінде жадымызда сақталып, ешкім де, ешнәрсе де, ешқашан да ұмытылмауы керек,– дейді.

Балжан Жеңіс.

Поделиться ссылкой: