Өнер қуып, ой түзе…

Ауданымыздың 85 жылдығына орай қазір ауылдық жерлерде көптеген іс-шаралар өтуде. Осы айтулы датамен байланыстырып, аудандық мәдениет және тілдерді дамыту бөлімі жақсы бір бастаманы қолға алды. «Ауыл жобасы» деп аталатын көшпелі жылжымалы концерттік іс-шараның мазмұны да ерекше. Мұндай іс-шаралар міндетті түрде өтуі керек, біздіңше. Себебі, бүгінгінің «заманауи» жастары қарға тамырлы қазақтың ұлттық құндылықтарын, салт-дәстүрін білуі тиіс. Оны бір деп қойыңыз. Содан соң мұндай шарада қайдағы жоқ сөзі түсініксіз, әулекі әндер емес, дәстүрлі әндерге басымдық берілетіні сөзсіз. Ол – өте дұрыс. Жастарымыз халық әндері мен қазақ халық композиторларының есті әндерін біліп, тыңдап өсуі керек. Саф алтындай асыл өнердің көкжиегін келер ұрпаққа түбінде солар дәріптейді. Менің қуанғаным, халық әндері мен қазақ халық композиторларының әндерін тыңдап, оны насихаттайтын ұрпақ жоқ емес, бар екен. Оны Тереңөзек ауылдық мәдениет үйінде өткен «Ауылым – алтын тұғырым» атты көшпелі жылжымалы концерттік іс-шарадан анық аңғардық.
Бұл іс-шараны тек Тереңөзек ауылының ғана емес, Әбжапар, Ақыртөбе, Жарлысу және Д.Қонаев ауылдық мәдениет үйінің жетекшілері бірлесіп, ұйымдастырды. Концерт басталмай тұрып, жиылған жұртшылық біз атаған мәдениет ошақтарының «Дәстүрді дәріптейік» тақырыбы аясында ұйымдастырылған көрінісін тамашалады. Сол көріністе жүн түту, ұршық иіру, тері сабау, келі түю, қымыз салу секілді ұлттық дәстүрлермен қоса асық ату, арқан тартыс сынды ұлттық ойындарымыз шынайы түрде көрсетілді. Келген қонақтарға ел ішіндегі қолөнер шеберлерінің бұйымдары да таныстырылды. Ұмыт болып бара жатқан «Аша­майға мінгізу» дәстүрін де осы жерден тамашаладық. Содан соң ауданымыздың 85 жылдығына арнап, әбжапарлық Жорабек Әбдікерімов арнау айтты. Жұрт ерекше құрмет көрсетіп, ілтипаттарын білдірді.
Одан кейін «Ауылым – алтын тұғырым» атты концерттік бағдарлама басталды. Концерттік шараның шымылдығын Тереңөзек ауылдық округінің әкімі Қанат Смат пен ауылдық ардагерлер ұйымының төрағасы Жолдасбек Қайнарбаев сөз сөйлеп, ашып берді.
Концерттен ерекше әсер алдық. «Айшуақ» бишілер тобының арулары «Әлқисса» биін билесе, «Домбыра» ансамблі халық күйі «Келіншек» пен Раздықтың күйі «Салкүреңді» нәшіне келтіріп орындады. Санжар Көпен ақын Бауыр­жан Ши­мер­­денұлының «Қа­лаға хат», ақын Хамит Есаман «Туған жер» өлеңін оқып, көп­ші­ліктің ықы­ла­сына кенелді. Іс-шара Тереңөзекте өтіп жатқан соң, композитор, дирижёр, маэстро Нұрлан Байгө­зовтің әні шырқалмай қалса, әбестік болар еді. Атақты композитордың «Тереңөзек вальсі» әні шырқалды. Мелодиясы мен сөзі келіскен тамаша ән. Мэлс Өзбековтің «Жазылбекшілер маршы», «Келші айым» әндерін хор және фольклорлық ансамбль керемет орындады. Фольклорлық ансамбль халық әні «Бес қопаны» да ерекше шырқады. «Тұрар – мәңгілік тұлға» атты «Қызыл жебе» рома­нының же­лісі бойынша қо­йылған сах­налық кө­рі­ніс те жү­рек­ті тебі­рент­ті. Әуесхан Сала­бе­ковтің «Ауылым – алтын бесігім», Бауыржан Рахым­бековтің «Ауылға барам» әндерін Жалғас Айтқұлов, Сейдолла Бәйте­ре­ковтің «Сары­арқа» әнін Жәния Амангелді шыр­қаған сәтте нағыз таланттардың ауыл­дан шыға­тынын көзбен көрдік. Екеуінің де дауыс диапа­зондары алты қырдан асады. Өз басым тәнті болдым. «Әжелер» ансамблі халық әндерінен попури айтса, ақыртөбелік Адинай Паралиева «Бір шәугім шай» әнін келісті орындады. Концерт соңы Ескендір Хасанғалиевтің «Жасай бер, Қа­зақ» әні­мен түйін­делді. Оны шыр­қаған Күләш Қобдикова мен Гүлмарал Қорабаева.
Концерт соңында аудан­дық мәдениет және тілдерді дамы­ту бөлімінің басшысы Рүстем Қырықбаев, Д.Қонаев ауылдық ардагерлер алқасының төрағасы Есен Бекенов сөз сөйлеп, іс-шараның жоғары деңгейде өткендігін атап өтті.

Бетті дайындаған Марат Диханбай.

Поделиться ссылкой: