Достық пен мейірім МЕРЕКЕСІ

Елдің есінде қалған зобалаңдар мен зұлмат жылдарды тарихтан ешкім де өшіре алмайтыны бесенеден белгілі екені баршаға мәлім. Сонау Ұлы Отан соғысы жүріп жатқан қырқыншы жылдардың басында, майдан даласында соғыс қимылдары қыза түскеніне қарамастан, көптеген жазықсыз жандарды қынадай қырған саяси қуғын-сүргіннің бет қаратпас жоспары бойынша кең көлемде репрессия да қатар жүріп жатты. Осы Сталин режимі кезінде Қазақстанға Кавказдан 500 мыңнан астам адам, сондай-ақ, орталық өңірден 100 мыңнан астам поляк, Волга бойынан 800 мыңдай неміс, шығыстан 20 мыңдай кәріс отбасылары жер аударылып келді. Саяси қуғын-сүргін кезінде қазақ жеріндегі 11 арнаулы лагерьлерде мыңдаған тұтқындар болды. Тұтқыннан босағандардың көпшілігі Қазақстанда тұрақтап қалды. Қазақстан­ға Ұлы Отан соғысы кезінде 350 мың адам эвакуацияланды. 1950-1956 жылдары тың игеруге 1,5 миллион адам келді. 1960 жылдардың бас кезінде халқымыз мыңдаған дүнгендерге пана болып, бауырына басты. Одан бұрын қазақтың шұрайлы жерлеріне патша өкіметі Ресейден, Украинадан және Беларуссиядан бір миллионнан астам шаруалар қоныстанды. 1930 жылдары конфискеленген мыңдаған шаруалар жер аударылып келді. Өнеркәсіп құрылыстарына 1 миллионнан астам адам келді. Сөйтіп Қазақстанда қолдан жасалған көп этносты халық қалыптасты. Әрине, қазақ жеріне өз еркінен тыс келген бұл адамдардың ешқандай кінәсі жоқ. Иә, сонымен жоғарыда аталған кезеңдерінде тарих тауқыметін арқалап, солақай саясат­тың құрбанына айналып, елімізге келіп, қоныстанған ұлттар мен ұлыстар үшін қазақ жері киелі мекен болып, алтын бесікке айналды. 1995 жылдың 1 наурызында Қазақстан халқы Ассамблеясы құрылған болатын. ҚХА өзінің құрылған кезінен бастап, еліміздегі 100-ден аса этностың басын біріктіретін бірегей құрылым ретінде тұрақтылықты сақтап, республиканың ілгері­лей дамуы үшін маңызды рөл атқарды.
Елімізде барлық этностардың мәдениетін, тілін, дәстүрін дамыту үшін қажетті жағдайдың бәрі жасалған. 1 наурыз – Алғыс айту күні біздің елімізде 2016 жылдан бері аталып келеді. Алғыс айту күні – бұл, ең алдымен, елімізде тыныштық пен үндестік, өзара сенімділік пен барлық қазақ халқына деген құрметтің орнығуына негіз болған еліміздің бейбітшілік пен келісім саясатының салтанатты күні.
Бұл – тағдыр тәлкегімен Қазақстан жеріне еріксіз қоныс аударған түрлі этностардың миллиондаған өкілдерінің құтты қонысына айналған қасиетті қазақ жері мен қонақжай қазақ халқына терең тағзым белгісі. Қазақ халқы қиын-қыстау заманда олардың басына түскен ауыртпалықты қайыспай бірге көтере білді. Бұл бүгінгі таңда еліміздің түрлі ұлт өкілдерінің арасында адамгершілік қарым-қатынастың өнегелі өлшеміне айналды.
Еліміздегі Алғыс айту күні үйлесім мен өзара түсіністік орнатқан, бірлік пен ынтымаққа негізделген мемлекеттік саясаттың көрінісі. Алғыс айту арқылы адамдар арасындағы түсіністіктің, сыйластықтың жаңа қыры ашылды. Өткен ғасырда солақай саясаттың құрбаны болып, депортацияға ұшыраған түрлі этнос өкілдері бір үзім нанды бөлісіп жеп, үйлеріне паналата білген дархан көңіл, қонақжай қазақ халқына ризашылық білдіріп, риясыз көңілдерін білдіруде. Біздің ауданымыздың да жергілікті тұрғындары сонау 1940-шы жылдары қиын-қыстау кезеңде өздері мұқтаждықта өмір сүріп жатса да, өзге ұлт өкілдерін өз үйлеріне құшақ жая қарсы алып, бір үзім нанды бөліп жеді. Бүгінгі күні олар «біз қазаққа бауыр басып кеттік» деп елдегі татулығымызға ризашылығын білдіруде. Өте орын­ды. Бұл елдегі татулық пен бірлік­тің көрінісі. Алғыс айту күні – адамдарды мейірімділік пен қайырым­дылыққа баулиды. Еліміздің түкпір-түкпірінде қайырымдылық, жақ­сылық жасап жарысып жатқан азамат­тарымыз күн сайын көбейіп келеді. Ауданымызда да жаны жомарт азаматтар баршылық. Оларға алғысымыз шексіз.
Әр азамат ата-анасына, ағайын-туыс бауырларына, көрші­леріне, бар­ша жақындарына алғыстарын біл­діріп тұрса, адамдардың бір-біріне сый­ластығы арта түсетіні анық. Біз, аудан тұрғындары, ел денсаулығының күзет­шілері болып отырған ауданы­мыздың денсаулық сақтау саласының барлық қызметкерлеріне, әрбір отбасы­ның болашағы жас ұрпаққа са­палы білім, саналы тәрбие беріп отыр­ған ауданымыздың барша ұстаздар қауы­мына, аудан аумағында елі үшін жанқияр­лықпен еңбек етіп жүрген тәртіп сақшылары мен төтенше жағдай қызметкерлеріне, ел дәулетін еселеп, байлы­ғымызды ұлғайтып еңбектеніп жүрген егінші-диқандарымыз бен мал­шылар қауымына зор алғыс айтамыз.
Достық пен мейірім мерекесі Алғыс айту күні барлық­тарыңызға құтты болсын! Әрқай­сысыңызға зор денсаулық, отбасы­ларыңызға бақыт пен береке орнап, шаңырақтарыңызға шаттық ұяласын.

Серік Өтегенов,
Т.Рысқұлов аудандық билер кеңесінің төрағасы.

Поделиться ссылкой: