Дерматомикоз – жұқпалы тері ауруы

Дерматомикоз – бұл микроско­пиялық саңырауқұлақтар тудыратын жұқпалы тері ауруы. Саңырауқұлақтар денені, аяқ-қолды, шашты, бастың бет бөлігін зақымдайды. Ауру – науқас адаммен, жануарлармен тікелей қарым-қатынаста болған жағдайда немесе науқас адамның заттарын қолданған кезде жұғады.
Берілу жолдары: қарым-қатынас-тұрмыстық тері, шаш, жүн, бас киім, төсек жабдықтары, тарақ, қайшы және тұрмыста қолданылатын заттар арқылы.
Аурудың инкубациялық кезеңі 1 аптадан 1 айға дейінгі аралықты құрайды. Дерматомикоз ауруының зақымдануының белгілері қоздыр­ғыштың түріне және зақымдану орнына байланысты:
– шашының түсуі мен терінің қабыршақталуымен бірге жүретін бас терісінде бөртпе пайда болады;
– тегіс теріде дөңгелектенген айқын шекаралары бар, шеттері көтерілген қабыну дақтары пайда болады. Зақымданағн ошақтың ортасында құрғақ­танған қабыршықтар болуы мүмкін. Науқастың жалпы жағдайы нашар­лап, әлсізденеді. Уақытында дәрігерге қаралмау аурудың созылмалы түріне айналып, ары қарай емдеуді қиындатуы мүмкін.
Ұйымдастырылған балалар ұйымда­рында дерматомикоздың алдын алуда науқастарды ерте анықтау, оларды оқшаулау, сонымен қатар уақтылы емдеу мен жеке гигиена ережелерін қатаң сақтау маңызды орын алады.
Дерматомикоз ауруын алдын алу үшін:
– ешқашан бөгде адамның киімін, бас және аяқ киімін пайдаланбау;
– сүлгіні және төсек жабдықтарын ыстық суда жиі жуу, ыстық үтікпен міндетті түрде үтіктеу;
– тарақты таза ұстап, басқаларға қолдануға бермеу;
– санитариялық қағидаларға сай профилактикалық заласыздандарылу жұмыс­тары жиі жүргізіліп тұратын монша­ларға, сауналарға, жүзу бассейн­деріне және спортзалдарға бару;
– үйге қаңғырған мысықтар мен иттерді кіргізбеу, жануарлармен қарым-қатынастан, құм алаңдарында ойыннан кейін қолды мұқият жуу;
– ата-аналары балаларына қол жуу қағидаларын үйрету, қаңғыбас жануарлармен ойнамауды ескерту;
– үй мысықтары мен иттерде аурудың алғашқы белгілері пайда болысымен-ақ, оларды емдеу үшін ветеринариялық дәрігерге көрсету.
Егер денеңізде аурудың бел­гі­лері, атап айтқанда, денеңізде қабыр­шақтанған қызыл дақты, шашыңыз сынып, түсе бастағанын байқасаңыз, дереу тұрғылықты дерматолог дәрігерге қаралыңыз.

С.Ускенбаев,
аудандық санитариялық-эпидемиологиялық бақылау басқармасының басшысы,
мемлекеттік санитариялық бас дәрігері.
Н.Женбаева, эпидемиологиялық бақылау және қадағалау бөлімінің жетекші маманы.

Поделиться ссылкой: