Балаларға барлық жағдай жасалған

615 Views

Диханның шырайын келтіріп, малшының ырысын артыратын Жарлысу жері ауылшаруашылығына өте қолайлы. Әсіресе, мұнда мал шаруашылығын дамыту дұрыс жолға қойылған. Оны шет елдерге ет өнімін экспорттап жүрген «Шәушен» шаруа қожалығының ауқымды жұмысынан анық аңғаруға болады.
Ел экономикасының дамуы­на өзін­дік үлес­ін қосқан шаруа қожалықтың шопандары шалғай ауылдарда мал бағып, балалары­ның білім алуына алаң­дамайды. Өйткені, Жар­лысу ауылын­да шопан балаларына арналған ин­тер­нат бар. Аталмыш нысан 2012 жыл­дың қазан айында «Шәушен» шаруа қожалығының жетекшісі Сайрам­бай Дөненбаевтың жеке қаражатына салы­нып, пайдалануға беріл­ген болатын. Содан бері міне, жеті жыл өтіпті. Осыны ескерген біз «Интернаттың бүгінгі жағдайы қандай?, Балаларға қандай жағдай жасалған?» деген сауалдарды назарға алып, интернаттың тыныс-тіршілігімен танысып қайтқан едік.
«Қазақстан­ның Еңбек Ері» Сайрам­бай Дөненбаев­тың демеушілігімен салынған «Шәушен» интернаты 40 балаға ар­нал­ған. Айтқұл Шынасілов атын­да­ғы мек­теп жанында ор­налас­қан ин­тер­нат­­та биыл 37 бүлдіршін тәрбие алуда. Олардың барлығының ата-анасы «Шәу­шен» шаруа қожалы­ғын­да қыз­мет етеді.
Интер­­нат қабырғасында бала­лар­ға барлық жағдай жасалған. Ат­ап ай­­тар бол­сақ, бала­лар­дың жата­тын орны, жуынатын бөлмелері, ас­хана­сы, оқу залдары барлық талаптарға сай жаб­дықталған. Оларды бізге Айтқұл Шынасілов атындағы шағын ор­талық­ты мек­тебі­нің директоры Дархан Буланбаев ар­найы аралатып, таныстырды. «Мұнда қазір шалғай ауылдарда мал бағатын 19 шопанның балалары тәрбиеленуде. Олардың ең үлкені 9 сынып оқушысы болса, кішкентайлары шағын орталықтың тәрбиеленушілері. Бала­лар интернат асханасында төрт мез­гіл тамақтандырылады. Олардың үй тапсырмасын орындауына, жаңа сабақты қайта түсіндірілуіне тәр­биешілер жауапты. Балаларға жайлы жағ­дай жасау үшін мұнда 18 адам қыз­мет етеді. Атап айтар болсақ, үш аға тәр­биеші мен екі көмекші қызметкер бар. Одан бөлек мұнда балалардың ден­саулығын күнделікті қадағалайтын мед­бике мен психолог маман жұмыс жасай­ды. Ал, асханасында екі аспазшы мен бір көмекші тәрбиеленушілерге тәтті тағам дайын­дайды» — деп, мектеп дирек­торы интернаттың бүгінгі тыныс-тіршілігін баяндап берді.
Интернатқа баласының жағдайын білу үшін арнайы келген ата-аналарға арналған бөлме де бар екен. Оны бізге интернат тәрбиешісі Нұржамал Мұратова көрсетті. «Қанша дегенмен бала ата-анасын сағынады. Олар келгенде шүйіркелесіп әңгіме айтып, жеке сырласқысы келеді. Сондықтан да біз, осы жайтты ескеріп, ата-аналаға арнайы бөлме бөлдік. Балалардың ата-анасы келген сәтте бір бөлмеде қонуға рұқсат етіледі. Дейтұрғанмен, біздің интернат тәрбиеленушілері зерікпейді. Себебі, олардың бос уақыты жоқ. Оқушылардың бос уақытын тиімді пайдалану мақсатында сан түрлі спорттық ойындар мен жарыстар ұйымдасытырып тұрамыз. Одан бөлек олар мектептің іс-шараларына да жиі қатысады. Тіпті, кейде тарихи жерлерге де саяхат жасайды. Мәселен, былтыр Түкістан, Айша бибі, Қарахан, Тектұрмас кесенелеріне барып, қыдырып келді. Биылғы оқу жылында да аталмыш жұмыстар жалғасын табатын болады» — деген интернат тәрбиешісі балаларға жасалып жатқан барлық жағдайды мәлім етті.

Жәнібек БАЗЫЛБЕКОВ.

Поделиться ссылкой: