«Елдік елге байланысты» қоғамдық форумының үндеуі
759 Views
Құрметті жамбылдықтар!
Біз, облыстық «Елдік елге байланысты» қоғамдық форумына қатысушылар, қоғамдық келісім мен саяси тұрақтылық, этносаралық және конфессияаралық бейбітшілік, бірлік пен ынтымақ, ұлттық құндылықтар сияқты қоғам мен мемлекеттің жоғары мүдделерін басшылыққа ала отырып, өңір тарихының аса маңызды кезеңі – Жамбыл облысының құрылғанына 80 жыл толуы қарсаңында облыс тұрғындарына Үндеуімізді жолдаймыз.
Қазақ халқы бірліктің күнделікті тіршіліктегі орны мен маңызын жоғары бағалап, «Бірлік болмай тірлік болмас», «Бірлік түбі – береке», «Алтау ала болса, ауыздағы кетеді, төртеу түгел болса, төбедегі келеді», «Бақыт – бірлікте, байлық – еңбекте» деп түйген.
Бірлікті ыдыратып, ірітуші күш – рушылдық, күншілдік, іштарлық, араздықтық деп тауып, жұртшылықты мұндай жағымсыз қасиеттерден бойын аулақ салуға шақырған. Бірлік елдіктің, ұлт болып ұйысып отырудың басты кепілі саналған.
Сондықтан да, ел тізгінін қолына ұстаған ардақты адамдар – хандар, билер, аузы дуалы ақсақалдар ел ішіндегі асқынған дау, ушыққан жанжалдың жолына тосқауыл қоярда ел бірлігіне сына түспеу жағына баса назар аударған.
Міне осы бірлігіміз бен тірлігіміздің арқасында, Елбасының сарабдал саясатын ұстанып, тәуелсіздік жылдары іргелі мемлекет болып қалыптастық, өзгемен тереземізді теңедік, тұрмысымызды түзедік, бұрын қиял болып көрінген көрсеткіштерге қол жеткіздік.
Десек те, жаһандық әлеммен қабыспайтын, ұлттың дамуына кедергі келтіріп, ел ішіне іріткі салатын өткеннің кейбір кертартпа дағдылары мен әдеттерінен күні бүгінге дейін арыла алмай отырғанымыз жасырын емес. Олар: жең ұшынан жалғасқан жемқорлық, жершілдік, тамыр-таныстық, жүзшілдік пен рушылдық, ысырапшылдық пен астамшылдық, даңғойлық пен кердеңдік, орынсыз салтанат, қанағатсыздық пен үнемсіздік.
Өркениетілікке емес өсекке, зиялылыққа емес зияндыққа, парасаттылыққа емес пасықтыққа, ізгілікке емес ібілістікке жетелейтін мұндай «ғұрыптардан» құтылатын кезең келді.
Ендеше, қазақ қоғамында шілдеханадан бастау алатын аста-төк тойлар, мәні мен мағынасы мүлде ескірген ырым-жырымдарды, ертеден қалған ескілік сарқыншақтарын тұтас реформалайтын, бұлардың концепцияларын қазіргі заман талаптарына сай түбегейлі өзгертетін шешім қабылдауды жергілікті атқарушы және өкілетті органдардан сұранамыз.
Дәстүрімізді жаңғыртуға, жетім мен жесірге мейірімділік танытып, қараусыз қалған қарттарға ерекше көңіл бөлуге, ең басты құндылығымыз – татулық, бірлік пен ынтымақты көздің қарашығындай сақтауға белсенді үлес қосуға шақырамыз!
Тараз. 2019ж. 21 қыркүйек.