Өткен жылғы жылыту маусымында Жамбыл өңірінде газдан улану салдарынан жапа шеккен тұрғындар саны аз болған жоқ. Сондықтан бұл меже тағы ұлғаймасын десек, осы бастан қауіпсіздік шараларын күшейтіп, рейдтік жұмыстар жүргізу қажет. Осыны ескерген аудандық төтенше жағдайлар бөлімінің бастығы, азаматтық қорғау подполковнигі Жандар Сейтімбетов өткен сейсенбіде полиция, газ және электр желісін тарату мекемесінің қызметкерлерінен құралған арнайы топ мүшелерімен Құлан ауылындағы тұрғын үй секторларын аралап, түсіндіру жұмыстарын жүргізді.
Топ мүшелерінен көкейге қонымды кеңес алған жанның бірі — Құлан ауылының тұрғыны, көп балалы ана Маржан Қосабаева. Ол өз сөзінде осындай дәйекті әрі мазмұнды фактілерді тілге тиек еткен Жандар Сейтімбетовке алғысын білдіре отырып, айтылған ескертпелерді міндетті түрде назарға алып, қауіпсіздік ережелерін сақтайтынын айтты. Сөз арасында Жандар Сейтімбетовпен әңгімелескен едік. Сонда ол:
– Жылыту пештерінен түтінге улану жағдайларының 70 пайызы мұржаның талапқа сай болмауынан немесе дұрыс жұмыс істемеуінен болып жататындығын, үйге өздігінен газ тартуға, газ жабдығын орнатуға, газ құралдары мен тығын арматурасын ауыстыруға және жөндеуге тыйым салынатындығын, мұндай жұмыстарды білікті мамандар ғана нормалар мен ережеге сәйкес жүргізе алатындығын, сондай-ақ, тұрғындардың газ жабдықтарын немесе жылыту пештері орналасқан бөлмелердің терезелерін түнгі уақытта жабық қалдырмауын, газ құралдары орнатылған жерді демалатын және ұйықтайтын бөлме ретінде мейлінше пайдаланбауын айтып берді.
Сөз басында облыс аумағында газдан улану салдарынан жапа шеккен тұрғындар саны еселенген дедік қой. Сұрастырып нақты санын білсек, 10 оқиға тіркеліпті. Ал, ауданда дәл осындай жағдаймен 4 дерек тіркелген. Абырой болғанда, қаза тапқан адамдар болмаған.
Газ — өте қауіпті. Сондықтан газды қолдану кезінде қауіпсіздік ережелері бұзылса, сіз өзіңізге ғана емес, өзгелерге де қауіп төндіретіңізді ұмытпағаныңыз жөн.
Марат Диханбай.
