Көргені көп көш бастайды

655 Views

Көкарық пен Еңбекші осыдан 90 жыл бұрын шаңырақ көтерген артельдердің «о» бастағы атауы. Тұң­ғыш тұсауы кесілген коммунаны бас­қарған Метіқұл Архабаев пен Шәуе Сәлім­баев екенін бертінде колхозды бас­қарған Берік Қарақойшиев тауып айтты. Ал, ауыл ақсақалдарының серкесі Рысбек Секербеков ондай деректі білмейтінін жұрт алдында мойындап тұрып: «Иә, біз ауылымыздың тарихын жақсы біле бермейміз. Сондықтан да ауыл тарихын жазуды журналист Мәскеу Нохрабековке тапсырдық» деді жиналыста сөз алып тұрып.
Заманымыздың заңғар философы әрі дара тұлғасы, ақиық ақын Абай Құнанбаевтың аты бір кезде осы екі ұжым біріккенде колхозға берілсе, кейін жергілікті орта мектеп оның атымен атала бастады. Сол жылдары колхоз кеңсесінің алдына осынау Абай сынды алып тұлғаның мүсіні қойылып еді. Аймақ әкімі Мұрат Дәкенұлы Арыстанбеков биыл А.Құнанбаевтың туғанына 175 жыл толуына орай ескерт­кіш-мүсінді қайта жаңғыртуға беріп қойыпты. Сондай-ақ, мектептен музей ашу да ойларында бар екен. Осынау айшықты жаңалықтардың барлығын Абай ауылдық округіне қадам басқан сәттен-ақ, біліп, Мәкеңнің іскерлігіне тәнті болдық.Аймақ әкімінің халық алдындағы есеп беру жиналысы әкімшілік кеңсе­сінің мәжіліс залында өтіп, оған екі елді мекеннен де ауыл тұрғындары көп­­теп жиналды. Әкім алдымен мек­теп директоры Әйтен Әбішевтің, мал дәрігері Ерболат Имантаевтың, жер­гі­лікті амбулаторияның аға дәрі­гері Әсем Нұржігітқызының, пошта бөлім­ше­сінің басшысын мінбеге шақырып, олар­дан халық алдында есеп алды. Иә, Құлан мен Луговой кентінде болған жер дүмпуі абайлықтардың да жүрек дүр­сілін ұлғайтып, талай шаңырақтың шатырын шайқап, қабырғасын қақы­ратып кеткенін осы залда отырған халық әлі ұмыта қойған жоқ шығар. Сол кезде ауылға жаңа мектеп ғимараты салынған болатын. Содан бері он алты жыл өтсе де мектепке әлі бір күрделі жөндеу жұмыстары жүргізілмепті. Әп-әдемі мектептің сылағы түсіп, сұрқы қашып тұрғанын оқу орнының басшысы жа­сырған жоқ. Жиналыстан кейін біз ауыл әкімімен бірге барып мектеп ғимаратының осыдан он алты жыл бұрын жасалған техникалық төлқұжатымен таныстық. Құрылысшылар шамасы мектеп үйін тездетіп пайдалануға беруге асыққан болуы керек ондағы әжетханаға лайықтап соғылған 9 бөл­мені төлқұжатқа «әжетхана» деп емес, қосалқы бөлме деп көрсетіп жіберіпті. Егер Тараздағы мектепте болған оқыс оқиға болмаса бұл мәселеге ешкім шам алып қайта қарамас та еді. Енді облыстық білім беру бөлімі алдағы жазда мектептің Батыс жағынан жапсарластыра жаңа әжетхана салып беруге уәде етіпті. Біз мұның мемлекет басшысының және облыс әкімінің назарында тұрған кезек күттірмейтін мәселе екенін тағы да бір рет ескерте кеткенді жөн көрдік.
Екі мыңнан аса халқы бар екі ауыл­дың бүгінгі тыныс-тіршілігі, оларға көр­сетіліп жатқан медициналық, мә­дени, ветеринарлық, пошта қызметі жәйлі осы саланың тізгінін ұстаған азаматтар баяндап өткен соң ауыл әкімі жергілікті полиция қызметі мен әскерге шақырылушылармен жасалып жатқан жұмыс жәйлі баяндады.
Жазға салым, дәлірек айтқанда егін орағы басталар алдында ауылдың төр жағындағы егінжайды көріп таңдай қаққан едік. Сөйтсек, ол «Дауылбай» шаруа қожалығының күздік бидайы екен. Енді міне, әкім өз есебінде ор­таша түсімнің өзі әр гектардан 30 цент­нерден айналғанын айтып отыр. Иә, ол рас, өткен жылы абайлық «Нар­тай», «Достық-Е», «Асау-Тілеміс» қожа­лықтары диқандарының еңбегі ерен болды. 1004 гектар күздік бидай оры­лып, қамбаға 3012 тонна астық құйылды. Жаздық арпаның түсімі 3402 тоннаны құрады. Иә, ауылдағы тұрақты жұмысы бар 45 ұжымның ауыз тол­тырып айтарлықтай еңбегі бар-ақ. Кәсіп­кер Ғ.Құлдыбаев «Қазагроқаржы» акционерлік қоғамы арқылы былтыр су жаңа екі «Беларусь» тракторын алды.
Баяндамашы өз сөзінде қара­пайым заттар экономикасына негіз­дел­ген жұмыстарға да тоқталды. Округ бойын­ша 16 жеке қосалқы шаруа­шы­лықта 65 мүйізді ірі қара, 250 бас уақ мал, 80 жылқы бордақылауға қойылған.Айту ләзім, облыс әкімі өткен жылы Орынбай Бекназаровтың өсірген құлпы­найларын көріп, кәсіпкердің ілкімді ісіне риза болған еді. «Бірлік-2» өндірістік кооперативінің жетекшісі Е.Жүнісов болса өткен жылы ауыл шаруашылығын қолдау қорынан 41 миллион теңге несие алып, 130 сиыр сатып алды. Сонымен қатар қайтарымсыз несиеге қол жет­кізген екі жас бар. Олар: Қ.Оспанова мен А.Әбдірәшім.
М.Арыстанбековтың баяндамасы бойынша сөз алған Р.Секербеков, Б.Қара­қойшиев және тағы басқа ауыл тұрғындары әкімнің жұмысына қанағат­танарлық баға берумен қатар ауылдағы орын алған өзекті мәселелерді де ортаға салды. Мәселен, ағын су, көше жарығы, жер мәселелері сөз болды. Осының барлығына ауыл әкімі жауап таба білді деу керек. Сөз соңында айтарымыз, «Көргені көп көш бастайды». Әкім есебі халықтың көкейінде жүрген мәселелерді қозғады. Демек, жұрттың көңілінен шықты деуіміз керек.

С.ҚОЖЕКЕ.

Аймақта қордаланған мәселелер қаралды

Биліктің қолға алған әрбір баста­масы шалғай ауылдардағы халықтың құлағына жетуі тиіс. Бұл – мемлекет тарапынан іске асырылған жұмыстардан еліміздің әр азаматы ұдайы құлақдар болуы қажет деген сөз. Осы орайда бірер жылдар бұрын әр түрлі деңгейдегі әкімдер мен оқу орындарының рек­торлары халық алдында есеп беру шара­ларын қолға алған болатын. Бүгінде аталмыш жұмыстар жоспарға сәйкес жүргізіліп, өз жалғасын тауып келеді.
Ауыл әкімдерінің есеп беру жина­лыстары алғаш Қызылшаруа елді мекенінде басталды. Дүйсенбі күні Ақ­бұлақ ауылдық округінің әкімі Самат Атабаев аталмыш елді мекен тұрғын­дарының алдында есеп беріп, жыл бойы атқарылған жұмыстарды жіпке тізді. Есеп беру жиналысына ауыл тұрғындарынан бөлек, аудан әкімдігі жер қатынастары бөлімінің басшысы Досмұхаммед Жанәділов қатысты.
Ауылдық округ әкімі өз есебінде өңірдің әлеуметтік-экономикалық дамуына тоқталмас бұрын респуб­ликалық деңгейде атқарылған жұ­мыс­тарды айтып өтті. Мемлекет бас­шысы Қасым-Жомарт Тоқаевтың Жолдауындағы міндеттердің мер­зі­мінде іске асырылып жатқанын, «Халық үніне құлақ асатын мемлекет» тұжырымдамасы бойынша жұмыс жүр­гізу басты міндеттердің бірі екенін жеткізді. Ауыл азаматтарының барлық сындарлы өтініш-тілектерін жедел әрі тиімді қарастыратын аты аталған тұжы­рымдаманың округте іске асырылып жат­қаны өте құптарлық жағдай.
Өткен жылы Сәбденов, Қызылшаруа, Бәйтелі секілді үш бірдей елді мекеннің басын біріктірген ауылдық округте ауыз толтырып айтарлықтай жұмыстар атқарылған. Жалпы халық саны 3742 адамды құрайтын елді мекендерде 685 отбасы тұрады. Ал, оның ішінде көпбалалы отбасылар саны – 129. Округ аумағы ауылшаруашылығына қолайлы болғандықтан, ауыл хал­қы­ның көбі егіншілікпен және мал шаруа­шылығымен айналысады. Бүгінде төрт түлік малдың басы көбейіп келеді. Мәселен, ірі қара – 1530 басты құраса, қой мен ешкі – 42 400, жылқы – 954 басқа жетіпті. Осы мал басын ұлғайту бағытында 72 шаруа қожалығы жұмыс істеуде. Оның ішінде Қызылшаруа ауылында – 31, Сәбденов ауылында – 35, ал, Бәйтелі ауылында – 6 шаруа қожалығы бар.
Ауылдық округте білім мен ден­сау­лық саласына айтарлықтай көңіл бөлінеді. Бүгінде аймақ бойынша 2 орта және 1 бастауыш мектеп жұмыс істейді. Сонымен қатар, «Бәйшешек» бөбекжайы бар. Аталмыш білім ошақ­тарында балаларға сапалы бі­лім мен өнегелі тәрбие берілуде. Жал­пы мек­тептерде 687 оқушыға 109 мұға­лім дәріс берсе, балабақшадағы 16 тәр­биеші-педагог бес топтағы 100 тәрбие­лену­шіні қамқорлығына алған. Округке қарасты 3 елді мекенде де денсаулық сақтау ме­кемелері жұмыс істеп тұр. Ауыл әкімі Самат Шорабекұлының сөзіне сенсек, есепте тұрған қарт кісілер мен ауру адамдарға апта сайын медбикелер үйлеріне барып қызмет көрсетеді екен. Одан бөлек аудан басшысы Ерболат Садырқұловтың жеке тапсырмасын жүзеге асыру мақсатында дәрігерлер 2019 жылы жүрек және қан тамыры ауруларына шалдыққан науқастарға дәрі-дәрмектерді тегін үлестіруді қолға алыпты.
Ауыл әкімі өзінің баяндамасында әлеуметтік қызмет көрсету, жұмыспен қамту, шағын және орта бизнесті дамыту, абаттандыру, қайырымдылық іс-шаралары жайында кеңінен сөз қозғады. Сонымен қатар, «Өңірлерді дамыту» бағдарламасы бойынша бөлін­ген 3 104 000 теңге қаржыға Сәб­денов ауылының У.Ақшалова, Қызыл­­­шаруа ауылының Бекбай, Бәй­­­телі ауылындағы Қоңырат көше­лері­не жарықтандыру жұмыстары жүр­­­гізілгенін айтты. Ал, аудандық бюд­­­жеттен Сәбденов ауылындағы М.Ма­қатаев көшесіне жарық орнаты­лыпты.
Ауыл әкімінің есебінен соң тұрғын­дарға сөз беріліп, олардың ұсыныстары, өті­ніш­тері мен талап-тілектері тың­далды. Мә­селен, ауыл тұрғыны Есен­ғали Асу­баев атаулы әлеуметтік көмек­тің берілу тәртібі жайында сұрады. Соны­мен қатар, ол Мырзалиев көшесін жа­рық­тандыру керектігін айтып, өз ұсы­нысын ортаға салды. Әлімхан Бай­мұратов ауылдағы Абай көшесіндегі қара­ғайларды ауыстыру уақыты кел­генін айтты. Ауыл мектебінің де мәсе­лесі қаралды. Дәлірек айтар болсақ, мек­теп директоры Бахыт Дәуенов білім ошағына газ кіргізу, су жүйесін тарту және шағын орталыққа қатысты мәселелерді көтерді. Одан бөлек алдағы уақытта балабақша соғылған жағдайда нысанды мектеп жанынан емес, ауыл­дың маңынан көтеруді ұсынды. Есеп беру кезінде бұдан басқа да өзекті мәсе­ле­лер қаралды.

Жәнібек БАЗЫЛБЕКОВ.

Көгілдір отыны жоқ ауылдар

Қарақыстақ аймағының әкі­мі Ораз Тәнікеевтің есебі абай­лықтарға қарағанда күр­де­лілеу жағдайда өтті. Егер М.Арыстанбеков ауылдардағы мектептердің, амбулаториялар мен мал дәрігерінің жеке-жеке есе­бін тыңдап барып ел алдында өз есебін берсе О.Тәнікеевтің әр ауыл­ға барып халықтың алдына шы­ғып, олардың проблемаларын жа­лықпай тыңдауына тура кел­ді. Аймақ әкімімен бірге Қазақ, Тасшолақ, Жалпақсаз ауыл­да­рында бірге болып, халықтың мұңы мен мұқтажын бірге тың­да­ған аудан әкімдігінің вете­ри­на­рия бөлімінің басшысы Асқар Тұңғышұлы Тохабаевтың да блок­нотына қордалана бастаған мәсе­лелерді түртіп алуына тура келді.
Қазақ ауылында өткен есеп беруге 48 ауыл тұрғыны қатыс­ты. Жиналысқа ауыл ардагер­ле­рі, шаруа қожалықтарының жетекшілері, мектеп, медпункт, пошта қызметкерлері түгелдей дерлік қатысып отырды. Олар Қарақыстақ ауылдық ай­мақ әкімінің бір жыл ішінде ат­қар­ған жұмыстары туралы баян­да­масын зейін қоя тыңдады. Әкім елді мекенді абаттандыру, кө­рік­тендіріп, көгеріштендіру, орта және шағын бизнестің да­муы мен кедейшілік пен жұ­мыс­сыздыққа қарсы күрес, сон­дай-ақ, әлеуметтік мәселелер тө­ңірегінде де соқталы – соқ­та­лы мәселелер бар екенін жа­сыр­мады. Баяндаманы тыңдап отырып аймақ әкімінің барлық ауылдардағы кем-кетікті жақ­сы білетінін аңғардық. Төрт ауылдың халқы түгел: «Ауы­лы­мызға қашан газ келеді? Ел қатарлы экологиялық жа­ғы­­нан таза жылытатын отын ке­леді дегелі де талай жыл өтті. Үй шаруасындағы әйелдер қа­шанғы күл шығарып, күйе­леш-күйелеш болып жүре бе­реді?»деген орынды сауал тағы да сол әкімнің алдынан кесе көлденең шыға келді. Оған әкім тағы да сол уәде берумен шек­телді. Қазақ ауылының аза­маты Баймұрат Айтбаев пен Жал­пақсаз ауылының тұрғыны Сейдімбек Шілдебаев: «Ауылға ауыз су қашан келеді?» десе, Тас­шолақ ауылының тұрғыны Үсей Асқаров мал жайылатын жер­дің аздығын айтып қиналды.
Ауыл әкімі бұдан өзге Қазақ ауылындағы Абай, М.Мәметова, Достық, Өжет көшелеріне ас­фальт төсеу, жарық тарту ту­ра­лы тұрғындардың сауал­дарына орнықты жауап қайтарды. Айту ләзім, бұрынғы жылдардағы­дай емес, халық бейберекет әкімге сын айтып, болымсыз сұрақтар қойып мазалаған жоқ. Соны­мен төрт ауылдағы ең өзек­ті мәселе газ бен ауыз су кіргізу бол­­ды. Әкім бұл мәселемен ете­не жақын айналысып келе жат­қанын, алдағы жылы барлық ауылдарға «көгілдір отын» кі­ріп қалатынын айтып сендірді. Иә, Қасым Ермекбаевтың да, Айбек Омарбековтың да, Шәкет Момыналиевтің де, Аманкелді Әбдірәсіловтың де қой­ған сұрақтары өте орынды. Әрине, оны шешуге уақыт пен қаржы керек. Мәселен, ауыз су әкелу үшін алдын ала жобалық-сметалық құжат жасалуы тиіс. Әкім мұнымен де айналысып жат­қанын ел алдында ашып айтты. Қазақ, Тасшолақ, Жалпақсаз ауылдарында өткен есеп беру жиналыстарына қа­тысқан тұрғындар ауыл әкімі­нің бір жыл ішінде атқарған жұ­мысына қанағаттанарлық де­ген баға берді. Ал, енді әкімнің жұрт алдында берген уәдесі сөз жүзінде қалып қоймайтын шы­ғар деп сенеміз.
Дәл осындай есеп беру жиналысы Қорағаты ауылында да болып өтті. Шалғай жат­қан Мамыртөбе, Шілік елді ме­кендері мен Қорағаты те­мір жол бекетінен келген тұр­ғын­дар аймақ әкімі Бақытбек Әбіләзімовтың есебін зейін қоя тыңдап болған соң әдеттегідей оған сұрақ қоя бастады. Иә, ол орын­ды да. Егер барлық мәселе ше­шіліп қойған болса халық әкімге сұрақ қоймас еді ғой. Әйт­кенмен, баяндамашыны ха­лық толықтырды. Мұнда да сол табиғи газ мәселесі күн тәр­тібінен түспей тұр екен оны ауыл тұрғыны Қ.Атабаев қоз­ға­ды. Б.Әбіләзімов: – Қорағаты ауылына газ кіргізудің жоба­­лық-сметалық құжаттары дай­ын­далып, сараптамаға жіберіл­ді. Ал, Қорағаты темір жол беке­ті сияқты халқы аз елді мекен­дер­ге үлкен ауылдарға газ тарты­лып болған соң газ жүргізіледі,-деді.
Жиналыста азамат С.Дошымов: «Ауылдағы иесіз иттерді кім атады?» деген сауал қойды. Оған мал дәрігері Е.Исқақов аудандық ветеринария бөлі­мі­нен осы мақсатқа қаржы бө­лін­генін, тендер өткен соң ауыл-ауылды аралап, иесіз иттер­ді жою қолға алынаты­нын хабарлады. Жиналыста сөз алған ауыл тұрғындары Б.Базарқұлов пен Д.Төлебаев ауыл әкімінің жылдық есебіне қана­ғаттанарлық деген баға бе­ріп, оның алдағы қызметіне та­быс тіледі.
Есеп беру жиналысына ау­дан әкімдігінің жұмыспен қам­ту және әлеуметтік бағдарлама­лар бөлімі басшысыының мін­де­тін уақытша атқарушы С.Үмеева қатысып отырды.
Жиналыс талқыланған мә­селе бойынша қаулы қабылдап, тұрғындардың сұрақтары мен ұсыныстарын назарға алды.

С.Қожеке.

Поделиться ссылкой: