Үлкен ауылдың үлкен проблемалары

701 Views

Өткен дүйсенбіде аудан әкімі Ер­болат Садырқұлов түс ауа Луговой кен­тіндегі теміржолшылар клубына ке­ліп, он мыңнан астам халқы бар елді ме­кен тұрғындарының алдында есеп бер­ді. Алдымен жиналған жұрт аймақ әкімі Мұрат Свановтың баяндамасын тыңда­ды.
Баяндамашының сөзіне назар аударсақ, өткен есепті мерзім ішінде әкімшілік қызметкерлері мемлекет басшысы Қасым-Жомарт Тоқаевтың: «Ха­лықпен тиімді кері байланыс ор­нату» туралы тапсырмасына сай кенттегі 46 көшенің тұрғындарымен 18 кездесу өткізіпті. Сонымен қатар «Нәтижелі жұмыспен қамту» бағдарламасына сәйкес 13 азаматқа 44,7 миллион теңге көлемінде несие берілуіне ықпал еткен. 22 азамат жарты миллион теңгенің, екі адам 252500 теңгенің, барлығы 11 миллион 615 мың теңгенің грантын ұтып алғаны айтылды. Олардың барлығы өз аулаларынан мал мен құс өсіруге, наубайхана немесе тігін цехын ашып, осы кәсіптерді табыс көздеріне айналдырып алған.
Иә, кенттегі халықтың басым көп­шілігінің жұмысы бар. 5111 адам жұ­­мысқа жарамды десек, солардың тұ­­рақты жұмыс істейтіндерінің саны 2685 адамға жете қабыл. Олар ықылым­нан бері болат жол бойында, рельс дәнекерлеу зауытында еңбек ете­ді. Темір жол бойында 22 мекеме бар болса, соның 12-сі «Қазақстан те­міржолы» акционерлік қоғамына қа­райды. Ауылда мыңға тарта зейнеткер мен мүгедек жан бар. Жұмыссыздар 0,07 пайызды құрайды екен. Орта және ша­ғын кәсіпкерлікпен айналысатын ны­сандардың ұзын саны 93-ке таяу. Бұл салада 158 адам кәсіпшілікпен айна­лысып жүр.
Ауыл әкімінің басты мақсаты ха­лық­қа өмір сүруге барынша қолайлы жағ­дай жасау екені айтпаса да түсінікті. Өйт­кені халықпен етене жақын жұмыс істеп, олардың әлеуметтік-тұрмыстық жағ­дайын жақсы біліп отыруды мем­­лекет басшысы үнемі ескертіп оты­рады. Ауыл әкімінің есебінен соң залда отыр­ған жұрт оған әр түрлі райдағы сұрақ­тар қоя бастады. Бірақ ол сұрақ­тарды орынды деп айта алмаймыз. Мәсе­лен, Ынтымақ көшесінің тұрғыны Карен­таев: «Бізге қашан газ келеді?» дейді. Баян­дамада айтылғандай кенттегі 1923 от­басы көгілдір отынды пайдаланып отыр. 23 жағдайы нашар отбасының үйі­не ғана газ қосылмаған. Осыған орай М.Сванов: «2016 жылы газ кіргізіле бас­тағанда сіздің көшеге газ тарту ақы­сы өте қымбат болған. Біз сіздерді ұмыт­қан жоқпыз, көшелеріңізге газ тар­туға ұсыныс жасадым. Енді сіздер әскери қалашыққа газ тартылған кезде ғана отын алуға мүмкіндік туады» деді. Ал, зейнеткер А.Тоқтанаев көше шамдарының өшіп қала беретінін, тұрғындарға жайылымдық жер керек екенін қынжыла айтты. Сондай-ақ, М.Горький атындағы орта мектепке барып оқитын оқушыларға саяжол салу туралы да тұрғындар мәселе қозғады.
Ауыл әкімі мен аудан әкі­мі­нің бірлескен есеп беруі ауыл жұрт­шы­лы­ғының оған зор белсенділікпен қаты­суы­мен өтті. Аудан әкімі өзінің жылдық есебін слайдттар мен кардиограммаларға сүйене отырып, әр салада қол жеткен табыстарға терең талдау жасады. Баяндамашы өз сөзінде: -Күні кеше ғана Мемлекет басшысы Үкіметтің кеңейтілген отырысын өткізді. Онда: «Жамбыл облысында жеке қосалқы шаруа­шылықтарды дамытуды ынта­лан­дыру бойынша кешенді шаралар қа­былдануда. Таяу жылдары ауыл ша­руашылығы өнімдерін шығару 34 па­йызға өседі» деді. Осы пилоттық жоба біздің ауданымызда да кеңінен өріс алуда. «Құмарық-тау» өндірістік коо­перативі құрылып, оған 599 аула тар­тылды. 238 аулаға 2,5 пайызбен не­сие берілетін болды. Өздеріңіз ойлап көрі­ңіз­дерші, бір ауылға 8 мың қой келеді екен. 90 миллион теңгеге жаңа техника са­тып алынады. Осының барлығы ауыл хал­қына көрсетіліп отырған ауқымды қол­дау емес пе,-деді баяндамашы.
Әкім астықты ауданның проб­ле­ма­ла­рын әбден зерттесе керек: «Ілгеріде, кеңес өкіметі тұсында шығар, 18 канал бол­ған көрінеді. Сол кезде суармалы жер кө­лемі сегіз мың гектарға жетіпті. Ал, қазір суармалы жеріміз үш мың гектарға әрең жетеді. Иә, біз өткен жылы 145 мың гектар жердің 106 мың гектарына масақты дақыл егіп, одан айтулы өнім алдық. Алайда суармалы жеріміз көп болса қамбамызға түсетін астық та мол болатын еді деп ойлаймын. Сондықтан каналдарды қалпына келтіруді келешек жоспарымызға енгіздік.
Баяндамашы өз сөзінде 42 елді ме­кеннің 24-не көгілдір отын келгенін, енді 11 ауылға 4 жоба әзірленіп жатқанын, Жаңатұрмыс пен Қарақыстақ округіне енетін ауылдарға «газ кіргізіп беремін» деген желеумен елдің қыруар қаржысын қалтасына салып әкеткен кәсіпкерді сот арқылы жеңіп, енді биыл бұл ауылдарға газ кіргізілетінін баса айтты. Сондай-ақ, әкім күн тәртібінен түспей тұрған бір мәселеге ерекше тоқталып өтті. Ол: «Осы уақытқа дейін ауданда бірде бір пәтер пайдалануға берілмепті. Мем­лекет басшысының кезекте тұрған көп балалы отбасыларына пәтер беру жөніндегі тапсырмасын назарға ала отырып, биыл бес қабатты яғни, 80 пәтерлі 2 үй салатын боламыз. Сөйтіп, тұрғын үй мәселесін шешеміз» деді.
Баяндама бойынша жарыссөзге шы­ғып сөйлеген ауыл ардагерлер кеңесінің төр­а­ғасы Қалдығұл Қойшыманов те­мір­­жол разьезінен аспалы көпір са­лу туралы күрделі мәселе көтерді. Оның бұл ұсынысын залда отырған жұрт түгелдей қолдады. Зейнеткер Рысбек Алшабаев ауылдан спорт ке­шенін салу, саяжолдарды кеңейту мәселесін қозғады. Олардың екеуі де баяндамашылардың жасаған есебіне қанағаттанарлық деген баға берді.Иә, жиналыста өте ауқымды мәселелер қозғалып, олардың келешектегі жоспары бекітілді. Сөйтіп, үлкен ауылдың үлкен проблемаларын шешудің алғышарты жасалды.

С.Қожеке.
Суретте: аудан әкімі Е.Садыр­құлов­тың жиналыстан соң пікір­алысу сәті.

Поделиться ссылкой: