Аудан әкімі Ерболат Садырқұловтың ауылдық округ әкімдерімен бірлесіп, халық алдында есеп беру кездесулері аяқталуға жақын. Бұл жолы аудан басшысы Ақниет, Көгершін және Абай ауылдық округтеріне барып, өткен жылда атқарылған жұмыстарға сараптама жасап, тұрғындар алдында есеп берді.
Жері ауылшаруашылығына қолайлы болып келетін Т.Рысқұлов ауданында агро сала жыл сайын ілгері дамып келеді. Ауданда өткен жылғы өндірілген өнім көлемі 33,4 млрд. теңгені құраған. 2018 жылмен салыстырғанда бұл көрсеткіш 6,3 млрд. теңгеге артық. Естеріңізге сала кетейік, 2018 жылы өндірілген өнім көлемі 27,1 млрд.теңгеге жуық болған. 33,4 млрд-тың 18,5 млрд.-ды егін шаруашылығына тиесілі болса, 14,8 млрд. теңге мал шаруашылығы арқылы өндірілген. Аудан аумағына былтыр 52000 гектар күздік бидай, 54600 гектар жаздық арпа, 120 гектар жүгері, 8106 гектар мақсары, 400 гектар көкөніс, 125 гектар бақша өнімдері, 315 гектар қант қызылшасы, 547 гектар картоп, 9300 гектар жоңышқа себілген. Ал, 19500 гектар жерге пар айдалып, жалпы 145122 гектар егістік жер толығымен игерілген екен. Егілген дақылдардың шығымдылығы мен сапасын арттыру мақсатында, аудан бойынша 2420 тоннадан минералды тыңайтқыштар алынып, егілген егістіктің 24910 гектары, яғни 27,2 пайызы тыңайтылған.
Барлық салада өсім бар
Ауданда техника паркін жаңалау жұмыстары да ерекше серпіліспен жанданып келеді. 2018-2019 жылдары 3,3 млрд. теңгеге 129 дана ауыл шаруашылығы техникалары алынған. Оның ішінде 39 дана егін орағы комбаины сатып алынып, ауданның ауыл шаруашылығы машина-тракторлар паркі 7 %-ға жаңаланған. Аталмыш жұмыстардың жандануына аудандағы шаруа қожалықтардың тигізген үлесі орасан зор. Соңғы жылдары ауданда заманауи «су үнемдеу әдісімен» суғарылатын алқаптың аумағы да кеңейіп келеді. Қазіргі таңда шашыратып, тамшылатып суғарылатын алқап 805 гектарға жетіп отыр.
Ауданда кәсіпкерлік саласы да қанатын кеңге жаюда. Аталған саланың дамуына Қорағаты ауылдық округіне тиесілі «Көкқия» тауында алтын өндірумен айналысып жатқан «GOLDEN COMPASS CAPITAL» алтын өндіру кәсіпорнының қосқан үлесі орасан зор. Келешегі кемел кәсіпорын өткен жылы 408 кг өнім өндірген.
Елбасы 2019 жылды «Жастар жылы» деп айқындап, аталмыш буын өкілдеріне үлкен сенім артқан болатын. Жалпы алғанда осы «Жастар жылы» аясында аудан көлемінде жасалған жұмыстар өте көп. Солардың бірі — «Дипломмен ауылға» бағдарламасын іске асыру. Өткен жылы дипломдарын ауылға құшақтай келген 43 жас маманға тұрғын үй сатып алуы үшін несие берілген. Оған бюджеттен 162 862,0 мың теңге бөлініпті. Сонымен қатар, көтерме жәрдемақыға 81 жас қол жеткізген. Оған бас-аяғы 14922,75 мың теңге қарастырылған. Кәсіпкерлікпен айналысам деген жастарға да көрсетілген көмектер өте көп. Мәселен, «Бизнестің жол картасы-2020» бизнесті қолдау мен дамытудың мемлекеттік бағдарламасы шеңберінде 29 жоба өткізіліп, 3,0 млн.теңгеге дейін қайтарымсыз мемлекеттік гранттар берілген. Жалпы сомасы 20,2 млн. теңгені құрайтын қаржыға ауданнан 10 жас кәсіпкер қол жеткізіпті. Аталған мәліметтердің барлығын аудан әкімі Ерболат Садырқұлов өз баяндамасында сөз етіп, атқарылған жұмыстарды халыққа жеткізді.
Әкім баяндамасынан кейін, жиылған тұрғындар өздерін толғандырып жүрген мәселелерді ортаға салып, сауалдарын жолдады. Ендеше әр ауылдық округ тұрғындарының қозғаған мәселелерін кеңінен тарқатып көрейік. Мәселен, Ақниет ауылдық округінде көгілдір отын мәселесі өте өзекті. Сонымен қатар, ауданға жеткізетін үлкен жолдың да тозығы жеткен. Округ орталығына оқушыларды тасымалдайтын жолаушылар көлігінің техникалық жағдайы да мәз емес.Одан бөлек ауыл тұрғындары төрт түлікті, әсіресе оның ішінде ірі қара малын асылдандыру, ұрықтандыру жұмыстары ақсап тұрғандығын да жасырмады. Ең бастысы ақниеттіктер ауыл аумағына Д.Қонаевтың ескерткіші бой көтергендігін қалайды. Аудан басшысы өзіне жолданған көгілдір отын, жол, тасымалдаудағы қиындықтар, асылдандыруға қатысты сауалдарға нақты дәлелдермен жауап қайтарып, кейбір мәселелерді толығымен саралау үшін хаттамаға енгізді. Ал, ауылға ескерткішті тұрғызуға қатысты сұраққа ауыл тұрғыны, жеке кәсіпкер Нұржан Букетов жауап беріп, ескерткішті тұрғызуға демеушілік көрсететінін айтты. Сонымен қатар, ауыл іргесіне Д.Қонаевтың есімі жазылған арка ақпан айының басына қарай қойылатынын жеткізіп, ауыл тұрғындарының қошеметіне бөленді. Ерболат Салқынбекұлы да өзінің атынан алғысын айтып, кәсіпкерге жол көрсету үшін мәдениет және тілдерді дамыту бөлімі мен ауыл әкіміне жекелей тапсырмалар берді. Жиында балабақша, денсаулық, әлеметтік көмектер көрсетуге қатысты сұрақтар көтерілді.
Ал, Көгершінде көп мәселе көтерілген жоқ. Өйткені онда өзге ауылдардағы өзекті мәселелер әлдеқашан өз шешімін тауып қойған. Ауыл ақсақалдары керсінше аудан және ауыл әкімінің жұмысына оң бағасын беріп, жұмыстарына сәттілік тіледі. Дегенмен, жиында интернет жылдамдылығының төмендігі, мәдениет үйінің жоқтығы, мектепке күрделі жөндеу жұмыстарының керектігі туралы мәселелер айтылды. Ал, ауыл ардагері Серікбай Өтегенов тау суының ауылға келуі қиындап кеткенін айтып, аудан әкімінен осы мәселені шешуге ықпал жасауын өтінді.
Дәл осыған ұқсас сауалдар түстен кейін Мұратбек Арыстанбеков басшылық ететін Абай ауылдық округінде де көтерілді. Нақтылап айтар болсақ, мектепке күрделі жөндеу жүргізу және жиһаздар алу, интернет жылдамдылығының нашарлығы, жерді жалға алу, тау суына қатысты мәселелер көтерілді. Жиында ерекше сұрақтардың бірін ауыл тұрғыны Берік Қарақойшиев қойды. Ауыл ағасы газет тарататын пошта қызметкерінің айлығы мардымсыз екенін айтып, тіпті оның мөлшері еліміздегі ең төменгі айлық көрсеткішінен де аз екенін жеткізіп, аудан әкіміне осы мәселені назарда ұстауын өтінді. Ал, ауыл ақсақалы Рысбек Секербеков ауылға балабақша салу және ұстаздық мамандықты таңдаған ауыл жастарының жұмыссыз жүргенін алға тартып, аудандық білім бөліміне өз өтінішін жеткізді. Сөз соңында Абай ауылдық округінде талай ілкімді істер атқарылғанын, оның бәрі аудан басшысы Ерболат Садырқұлов пен ауыл әкімі Мұратбек Арыстанбековтың арқасында жасалғанын айта келе, ауыл тұрғындары атынан алғысын жеткізді.
Бір байқағанымыз аудан әкімінің баяндамасындағы «Жамбыл облысында тұрғындардың тұрмыстық табысын жақсарту» пилоттық жобасы бойынша атқарылған жұмысты тұрғындар үлкен ықыласпен тыңдап отырды. Тіпті, үш ауылдық округтің тұрғындары да алдағы уақытта жоба өз нәтижесін беріп, өзге де елді мекендерде жүргізілетін болса, алғашқылардың бірі болып қатысуға ниетті екендіктерін байқатты.
Жәнібек БАЗЫЛБЕКОВ.
Өзекті мәселелер айтылды
Аудан әкімі барлық аймақта тұрғындар алдына шығып есеп берді. Баяндамада өткен жылдың қол жеткен табыстарымен қатар әлі де шешіле қоймаған мәселелері айтылды. Барлық он бес округта аймақ әкімдері аудан әкімімен бірлесе отырып есеп берді. Халық әкімдерге өздерінің әділ бағасын берді. Олардың жұмысы шынында да қанағаттанарлық деген бағаға лайық деп айтуға болады. Жаңатұрмыс ауылының іргетасының қаланғанына биыл 90 жыл толды. Әрине, кеңес өкіметі тұсындағы ауыл мен қазіргі ауылды салыстыруға болмайды. Халықтың тұрмысы анағұрлым жақсарды. Әлеуметтік-мәдени салада түбегейлі өзгерістер бар.
Ауыл әкімі Нұрболат Жамалбеков өңірдің тыныс-тіршілігін түгел баяндап берді. Халықтың әл-ауқатының жақсарғаны емес пе, бүгінде бір ауылдан өріске он үш мыңға тарта уақ мал, мыңға жуық жылқы, 1200-ден аса мүйізді ірі қара шығады. Ауылда 125 шаруа қожалығы, бір кооператив бар. Бүкіл аудан халқы шөпті осы ауылдан алады. Өткен жылы 800 гектарға жоңышқа егіліп, 4960 тонна өнім жиналды. «Құлбарақ» шаруа қожалығы 42 миллион теңгеге «Есіл-740» маркалы астық комбайнын, 12 миллион теңгеге «МТЗ – 1221» тракторын, 3,7 миллион теңгеге тайлап буатын механизм сатып алды. Қ.Әділов те «МТЗ» тракторын сатып әкелді. Н.Жамалбеков аймақтағы атқарылған жұмыстарға жан-жақты талдау жасады.
Артынша жиналған жұрт аудан әкімі Е.Садырқұловтың есепті баяндамасын зейін қоя тыңдады. Өте мазмұнды жасалған есептен соң сұрақ қоюшылар да көп болды. Ауыл тұрғыны Қалдыбек Әділов алты жыл бойы әуре-сарсаңға түсіріп келе жатқан көгілдір отын мәселесін қозғады. Әкім өзінің баяндамасында осынау өзекті мәселені шешкенін «Аққар» фирмасының басшысы Т.Байдәулетовтың өз ықтиярымен қолхат беріп, жобадан бас тартқанын, енді тек Жаңатұрмыс ауылына ғана емес, Қарақыстақ ауылдық округіне қарасты төрт елді мекенге де газ тартудың жаңа жобасын сараптамадан өткізіп жатқанын айтып берді. Аудан әкімі мұнымен қатар биыл бұл ауылға ауыз су кіргізудің де жобасы дайындалып жатқанын, биыл медпункт салынатынын, сонымен қатар клуб салуды қолға алатынын айтып өтті.
Әкім Е.Еркебаланов пен Қ.Тұрлыбаевтардың айтқан сұранымдарын назарға алды. Ауыл ақсақалдары Жетпісбай Көлбаев, Аманкелді Молдашевтар ауыл әкімі мен аудан әкімінің жұмысына лайықты баға берді.
Дәл осындай жиналыс Каменка ауылында да болып өтті. Онда да жұрт ауыз су мен көгілдір отын кіргізу туралы өзекті мәселелерді қозғады. Ауыл әкімі О.Тәнкеевтің есебіне де қанағаттанарлық баға берілді. Жиналыста сөз алған тарихшы-өлкетанушы Б.Әлі: — Біздің Каменка ауылының ортасындағы саяжолдың салынғанына 60 жыл болды. Жол тозып кетті. Тағы бір айтайын дегенім, ауылдағы жағдайы жоқтарға «асар» жасап, жылына бір үй салып берсек қайтеді? Жақында Жеңістің 75 жылдығын қарсы аламыз, ал, майдангерлердің есімі құлпытастарға толық жазылған жоқ, соны ескергеніміз жөн. Сонымен қатар, ауылдың құрылғанына 90 жыл, Каменка ауылының іргетасының қаланғанына 150 жыл толады. Осы айшықты атауларды ұмытпағанымыз жөн шығар,-деді.
Жиналыста ақсақалдар А.Оразбаев, А.Қабылханов, Ж.Айматов, С.Шілдебаев, Б.Қалымбетов, Қ.Дәулетов тағы басқалар сөз алып, ауыз су, газ мәселелерін тағы да көтерді. Сөйтіп, барлығы есепті баяндамаға қанағаттанарлық баға берді. Каменка ауылының тұрғыны С.Шекеевтің де, О.Сұлтановтың да, Тасшолақ ауылынан келген Ш.Иманжановтың да пікірлері назарға алынды. Сөйтіп, бес ауыл халқының өзекті мәселелерін шешудің жолдары қарастырылып, оларға тиянақты жауап қайтарылды.
«Сұлутөр» кинотеатрында аудан әкімі Ерболат Садырқұловтың Құлан ауылдық округінің әкімі Мұрат Иманбаевпен 2019 жылдың қорытындысы бойынша бірлесіп өткізген есепті жиналысында халық залға лық толы болды. Иә, аудан орталығы болып есептелетін Құлан ауылы жыл өткен сайын өзгеше реңкке бөленіп, жаңаша келбетке еніп келеді. Ол рас. Орталық Жібек жолы көшесіне төселінген асфальт жолы болсын, кешқұрым орталықты нұрландырып жіберетін көше жарықшамдары болсын, ұлттық ою-өрнекпен әдіптеліп салынған орталық көшедегі аркалар болсын, Құланды кез келген қала типінен кем көрмейтіндей етіп әйгілеп тұрғаны сөзсіз.
Сондықтан да болар, есепті жиналыста жергілікті тұрғындар қос әкімді сұрақтың астына алған жоқ. Тұрғындар тарапынан тек көше жолдарын асфальттау, қаңғыбас иттерді аулау, көше жарығын орнату, жол қауіпсіздігі ережелері бойынша тиісті шаралардың алдын алу, интернет жылдамдығын арттыру сынды сауалдар қойылды. Аудан басшысы Ерболат Салқынбекұлы әр қойылған сұраққа нақты мысалдармен жауап берді. Жиналыс соңында ауыл тұрғындары қос әкімнің қорытынды есебін қанағаттанарлық деп бағалады.
С.Қожеке.
Жаңатұрмыс және Қарақыстақ ауылдық округтері.
