Сыбайластыққа төзбеушілік – әр адамның азаматтық ұстанымы болса

408 Views

Сыбайлас жемқорлыққа қарсы күрес қай кезеңде болмасын күн тәртібінен түспей келеді. Жемқорлық ұлттың қауіпсіздігіне қауіп төндіретін, мемлекет пен қоғамның іргесін ыдыратып, ел дамуына тосқауыл болатын жаман құбылыс екендігі баршаға мәлім. Бұл мәселе барлық елдерде бар деп жайбарақаттық танытуға болмайды. Елі­мізде сыбайлас жемқорлықпен кү­рес халықтың әл-ауқатын жақсартуға бағыт­талған мемлекеттік саясаттың маңыз­ды стратегиялық басымдығы болып саналады. Сыбайлас жемқорлық іс-әрекет­терінің салдарынан материал­дық және материалдық емес игіліктер заң­сыз алынады, нәтижесінде қо­ғам мүддесіне нұқсан келтіріледі және биліктің немесе басшылықтың бе­делі төмендейді. Сондықтан да Мем­лекет басшысы Қ.Тоқаев өткен жылы 12 маусым күні президент бо­лып сайлануына байланысты ұлықтау рәсі­мінде алдағы уақытта атқарылатын 10 негізгі бағыттың екінші бағыты сыбай­лас жемқорлықты жою, жемқор­лық деңгейін төмендетуге бағыт­талған реформалар топтамасын да­йындауды тапсырған. Сайлау алды бағ­дарламасында да жемқорлықты жою ша­раларын атап көрсетті. «Сындарлы қо­ғамдық диалог- Қазақстанның тұ­рақтылығымен өркендеуінің негізі» атты Қазақстан халқына Жолдауында да ел азаматтарының құқықтары мен қауіпсіздігін қамтамасыз етудің бас­ты факторларының бірі сыбайлас жем­қорлықпен жан-жақты күресу мәсе­лесін алға қойып отыр. Бұл бағыт­та елімізде көптеген жұмыстар жүр­­гізілуде. Жуырда ғана ҚР Сыбайлас жем­қорлыққа қарсы іс-қимыл агенттігі Төр­ағасының бірінші орынбасары О.Бектенов «Қазақстан Еуропа Ке­ңе­сінің Сыбайлас жемқорлыққа қар­сы мемлекеттер тобына кірді. 2019 жы­лы 30 желтоқсанда мемлекет бас­шысы Қ.Тоқаев тиісті келісімді рати­фикациялау туралы заңға қол қойды. Осы­лайша Қазақстанның Еуропа Кеңе­сінің Сыбайлас жемқорлыққа қарсы мемлекеттер тобына қосылды. Біздің еліміз аталған ұйымның 50-ші мүшесі болып тіркелді. Бұл еліміз үшін аса маңызды оқиға. Қазақстан бұл ұйымға кіру үшін 10 жылдан астам уақыт жұмыс істеді. Осы кезең аралығында елі­міздің сыбайлас жемқорлыққа қарсы заңнамасы жетілдірілді және ол еуропалық стандарттарға жақындай түсті. Мемлекеттік қызмет саласын цифрландыру арқылы мемлекеттік аппарат пен халық арасында қарым-қатынас жеңілдеді. Бұл өз кезегінде сыбайлас жемқорлықтың алдын алудың бірден-бір жолы» деп атап көрсетті. Сыбайлас жемқорлықпен сыбайлас жемқорлыққа қарсы іс-қимыл орган­дары, қаржы полициясы, про­куратура, ішкі істер бөлімдері айна­лы­суда. Қоғамдық ұйымдардан «Нұр Отан» партиясы жұмыстар жүргізіп келеді. Өткен жылдың соңында «Ақ жол» газетінде Сыбайлас жемқорлыққа қарсы іс-қимыл агенттігінің Жамбыл облысы бойынша департаментінің басшысы Әділ­хан Әшірбаев: «Тrаnspаrency Internatinal Kаzаkhstаn» қоғамдық қоры жыл сайын жемқорлықтың деңгейін анықтауға арналған зерттеу жұмыстарын жүргізіп келеді. Сауалнамаға тартылған респонденттердің 50 пайызы өңірлер арасында біздің облыста сыбайлас жемқорлықтың деңгейі жоғары деп баға бергендігін айта келіп, қоғам дертіне айналған бұл індеттің алдын алу – ортақ міндетіміз» деп жазды.Жалпы бұл стратегия мемлекетіміз бен қоғамның тыныс-тіршілігінің негізгі салаларын қамтуға, жан-жақты сыбайлас жемқорлыққа қарсы шаралар кешенінің әзірленуіне және жүзеге асы­рылуына, азаматтарымыздың осы әлеуметтік зұлымдыққа төзімсіз көз­қарасын қалыптастыруға тиіс. Бұл мақ­сатта аудан әкімдігінің 2019 жылғы 12 шілдедегі қаулысымен Қазақстан Республикасының 2015-2025 жылдарға арналған сыбайлас жем­қорлыққа қарсы стратегиясының іске асырылуына сыртқы талдау және бағалау жөніндегі арнайы мони­торингтік топтың құрамы және Ережесі бекітілді. Ауданымызда Қазақстан Республикасының 2015-2025 жылдарға арналған сыбайлас жемқорлыққа қарсы стра­тегиясының іске асырылуына арнал­ған 2018- 2020 жылдарға іс-шаралар жоспары бекітілген. Мони­торингтік топ қоғамда сыбайлас жем­қорлық көріністеріне мүлдем төзбеу­шілік қағидасын қалыптастыруға ық­пал жасап, түсіндіру жұмыстарын жүр­гізеді. Сондай-ақ, азаматтардың ауыз­ша және жазбаша да өтініштерін қа­рап, сыбайлас жемқорлық құқық бұзу­шылықтарын жасауға ықпал ете­тін жағдайларды анықтайды. Соны­мен қатар атқарушы мемлекеттік орган­дардың, мемлекеттік ұйымдардың осы мәселе бойынша есептерін жан-жақ­ты зерттеп, талдап баға беру және де басшылардың ақпараттарын тыңдап, зерделеп консультативтік кеңес беріп және осы жоспарды жүзеге асырудың тиім­ділігін арттыру бойынша ұсыныс­тар әзірлейді. Өткен жылы аудандық ауыл шаруашылығы бөлімінің 2018 жылғы мониторингтік топтың ұсы­ныс­тарының орындалуы туралы есе­бі тыңдалды. Сондай-ақ, Қазақстан Рес­публикасының 2015-2025 жылдарға арналған сыбайлас жемқорлыққа қарсы стратегиясының іске асырылуының орындалу барысына аудандық білім бөлімінде және мектептер мен бала бақшаларда мониторинг жүр­гізілді. Тексеру қорытындысы бойынша се­минар-кеңес өткізілді. Жиынға бі­лім бөлімінің басшысы, жа­уапты ма­мандары, мектеп директорлары мен құқықтық тәрбие және тәрбие ісі жөніндегі орынбасарлары, мек­тепке дейінгі мекемелер басшылары қатысты. Қазақстан Республикасының 2015-2025 жылдарға арналған сы­бай­лас жемқорлыққа қарсы страте­гиясының іске асырылуының орындалу барысы туралы аудандық білім бөлімі басшысының мін­детін атқарушы Б.Самылтыров баян­дама жасады. Семинар-кеңес­те Ә.Бөкейханов атындағы не­гізгі орта мектептің директоры Н.Шу­ла­кова, Ю.Гагарин атындағы мектеп ди­ректорының тәрбие жұмыстары жө­ніндегі орынбасары Г.Оңалбекова, «Ай­гөлек» балалар бақшасының мең­геру­шісі А.Шегебаева ұжымдарында атқа­рылған іс-шаралар мен жұмыстарды айта келіп, өз ойларымен бөлісті. Мони­торингтік топ төрағасының орынбасары Қ.Қойшыманов, топ мүшесі, М.Ержан­ұлы тексеру барысында анықталған кейбір кемшіліктерді атап көрсетті және келешекте кемшіліктерді бол­дырмау туралы кеңестер берді. Бұл стра­тегияның кейбір талаптарын айта кетсек. Азаматтарымыздың құқықтық мәдениетін арттыру, жемқорлықты болдырмау құралдарының барлық арсеналын пайдалану баршамыздың бас­ты міндеттеріміз болуы керек. Қазіргі заманғы ақпараттық техно­логияны кеңінен пайдалану адам фак­торының ықпалын азайтады. Нәти­жесінде халыққа көрсетілетін қызметтер көлемі өседі. Білім беру, денсаулық сақтау, әлеуметтік саланың базалық салаларында қызметтерді электрондық түрде көрсету сыбайлас жемқорлықты төмендетуге ықпал етеді. Жемқорлыққа төзбеушілік әр адам­ның азаматтық ұстанымына, адал­дық пен сатылмаушылық мінез–құлық нормасына айналуы тиіс деп белгіленген. Жас ұрпақты қазақ­стандық патриотизм мен сыбайлас жем­қорлықты қабылдамау рухында тәр­биелеу маңызды екендігіне ерекше мән берілген. Сондықтан осы бағыттарда нақты жұмыстарды бүкіл қоғам болып бірлесе атқаруымыз керек.

С. Өтегенов,
Т.Рысқұлов ауданы бойынша сыбай­лас жемқорлыққа қарсы мони­то­рингтік топтың төрағасы.

Поделиться ссылкой: