Жақсылықтың жоқ ірісі, майдасы

Мемлекет басшысы Қасым-Жомарт Кемелұлы Тоқаев биылғы жыл­ды «Еріктілер жылы» деп жариялаған бо­латын. Осыған орай ауданымыз­дың әр ауылдық округінде жастар құрамынан еріктілер тобы жасақталды.
Ерікті (волонтер) — адамның өз ер­кімен қоғамдық жұмыстарға белсене араласуы деген сөз. Еріктілер өзінің көрсеткен жәрдемі үшін ешқандай ақы талап етпейді. Олар көмектесуді парыз деп санайды. Бір сөзбен айт­қанда, «еріктілер» адамгершіліктің ақ туын көтерген қоғамдағы белсенді топ. Еріктілер мынадай әлеуметтік са­наттағы азаматтарға: егде адамдарға, жалғызілікті қарияларға, қамқорлық­сыз қалған балаларға, баспанасыз аза­мат­тар мен мүмкіндігі шектеулі жан­дарға көмек көрсетеді. Көшелер мен ауланы абаттандыру, ағаш, өсімдік­тер, көшет отырғызу, экологияны жақ­сарту мақсатында сенбіліктерді ұйым­дастырады. Қайырымдылық концерттер, нашақорлық, жасөс­пі­рімнің айыпкерлігін алдын алуға арналған әңгімелерін жүргізу жұмыс­тарында белсенді атсалыса білуі қа­жет. Қоғамның көпшілігі «ерікті» сөзін қазіргі заманның термині деп қабылдайды. Алайда, бұл біздің қазақ халқына жаңа, тансық дүние емес деп нық сеніммен айта аламын. Оған дәлел ретінде «Асар» сөзін айтуға болады. Көрші-қолаң, ауыл-аймақ болып мұқ­таж жандарға қолдарынан келгенше те­гін көмек көрсетуді халқымыз «асар» дейді. Ол сонау ата-бабалары­мыз­дың дәуірінен бері жалғасып келе жатқан дәстүр.
Ағымдағы жылдың басында Жастар ресурстық орталығының Ақыр­төбе ауылдық округі бойынша жастар ісі жөніндегі инспекторы Нышанкүл Сәрсенбаеваның жетекшілігімен «АСАР» еріктілер тобы құрылған бо­латын. Сол топтың құрамында мен де бармын. Қазіргі таңда тобымыздың құрамында 14 ерікті жас бар. Алда­ғы уақытта қатарымыз толығады деп үміттенемін. Біздің еріктілер тобы­ның «АСАР» деп аталуы тектен текке емес. Ақыртөбе ауылы бір рудың емес, бірнеше ұлттың өкілдері қоныс теп­кен құтты мекен. Бұл факт біздің ауыл тұрғындарының өзара тату-тәт­ті өмір сүруіне еш кедергі болған емес. Бабаларымыздан мирас болып келе жатқан дәстүрді қайта жаңғыртпақ ниетте тобымыздың атын «АСАР» деп қоюды жөн көрдік. Жыл басынан бері түрлі форматтағы іс-шаралар­ға атсалысып келеміз. Мысалы өткен аптаның басында біздің еріктілер то­бының жастары мәдени іс-шараға қатысты. Ал аптаның соңында, яғни, 1 наурыз жексенбі күні «Жақсылық жа­са» атты қайырымдылық іс-шара­сын өткіздік.
Өткен жылы аудан орталығы­нан «Мейірім» атты әлеуметтік дүкен ашыл­­ғаны баршамызға аян. Ол дү­кен­ге адамдар қазіргі уақытта өзде­рі қолданбайтын, сапасы жақсы сақтал­­ған тұрмысқа қажетті дүниелерді өткізе­ді. Кейін сол дүкеннен ауданның тұр­мы­сы төмен, аз қамтылған отбасылары ба­рып өздеріне қажетті дүниелерін тегін алуына болады. Бұл өте жақсы бас­тама. Алайда біздің ауылдың тұрғын­дары үшін қиындау. Себебі, аудан орталығы мен Ақыртөбе ауылының ара қашықтығы 60 шақырымнан асады. Бұл шалғай жатқан елді мекендегі аз қамтылған отбасылардың басым бө­лігі үшін қолайсыздық туғызады. Сондықтан біз, еріктілер, осы әлеу­мет­тік дүкеннің бастамасын қоштап, жергілікті тұрғындардың өз еріктері­мен тапсырған дүниелерін ауылымыздағы аз қамтылған отбасыларға үлестіріп бе­руді қолға алдық. Игі бастамамызды жүзе­ге асыру мақсатында Ақыртөбе ауыл­дық округі әкімдігінің әлеуметтік желі­дегі ресми парақшасына хабар­лан­дыру берген болатынбыз. Соның нәтижесінде екі апта көлемінде ха­лық арасынан біршама кәдеге жарай­тын заттарды жинап, мұқтаж отбасылар­ға таратып бердік.
Бұл іс-шара әлі де жалғасын таба­ды. Ол үшін біз көп болып жұмылып, бірлесіп еңбектенетін боламыз.

Салтанат Акишева,
Ақыртөбе ауылдық клубының
мәдени іс-шара ұйымдастырушысы.

Поделиться ссылкой: