«Жүктелген жауапкершілікті сезінуіміз қажет»
633 Views
Бүгінгі өскелең ұрпақ – біздің болашақ байлығымыз. Олай болса, келешегімізді қаншалықты қамдап жатырмыз? Балаларымызға қандай тәлім-тәрбие берудеміз? Олардың денсаулығы, құқықтары мен мүдделерін өз дәрежесінде қорғай алып отырмыз ба? Дәл осындай сан түрлі сауалдар көпшілікті толғандырып, біраз ойландыратыны айтпаса да белгілі…
Апта басында аудан әкімдігінің үлкен мәжіліс залында аудан әкімі Ерболат Садырқұлов білім бөліміне қарасты мекемелерде қызмет атқаратын ұстаздармен кездесіп, жоғарыда атап өткен сұрақтарға жауап іздеп көрді. Аудан басшысының ұлағатты ұстаздармен шұғыл түрде кездесуінің басты себебі — ауданда жасөспірімдердің қатысуымен жасалған қылмыс санының жиілеп кетуі. Аталмыш кездесуге ұстаздардан бөлек мәслихат депутаттары, Қоғамдық кеңес және ардагерлер ұйымының мүшелері мен аудандық ішкі істер бөлімінің қызметкерлері қатысты. Күн тәртібінде жоғарыда атап өткен өзекті мәселелер қаралды. 
Жалпы аудан бойынша 39 білім беретін мектеп бар. Қазіргі таңда онда 14590 оқушы білім алуда. Олардың тәрбиесімен 1004 педагог, 42 тәрбие және құқық жөніндегі орынбасар, 46 психолог, 37 тәлімгер, 840 сынып жетекші айналысуда. Сонымен қатар, аудандық ішкі істер бөлімінде қызмет ететін 9 инспектор тағы бар.
Шындығын айту керек, осы мамандардың санына қарамастан соңғы кездері мектеп жасындағы жасөспірімдердің қатысуымен орын алған құқықбұзушылық пен тәртіпсіздік фактілерінің орын алуы жиілеп кеткен. Бұл жайында жиында мінберге шығып, сөз сөйлеген білім бөлімі басшысының міндетін уақытша атқарушы Бауыржан Самылтыров пен ішкі істер бөлімінің басшысы Қайрат Қапаров мәлімдеді. Қос бірдей бөлім басшылары да орын алған жағдайларды егжей-тегжей түсіндіріп, өз баяндамаларында жыл бойы атқарылған жұмыстарды жіпке тізді. Әсіресе, бақылауға алынған және әке-шешесінің қарауынсыз қалған балаларға қатысты атқарылған жұмыстарға кеңінен тоқталды.
Құқықбұзушылық пен тәртіпсіздіктің алдын алу үшін іске асырылған жұмыстар да жетерлік. Атап айтар болсақ, білім қызметкерлерінің қатысуымен 4 рет кеңес өткізілген. Одан бөлек, семинар, тренинг, кездесу, сауалнама сипатында 169 іс-шара аудандық көлемде ұйымдастырылыпты. Сонымен қатар, жыл басында оқушылардың әлеуметтік төлқұжаты зерделеніп, 943 толық емес және 930 аз қамтылған отбасы анықталған. Осыған байланысты ата-аналармен жұмыс барысы да күшейтіліп, түсіндіру жұмыстары толығымен іске асырылған.
Жиында инспекторлардың санының аздығы, ата-аналардың балаларына барынша көңіл бөлмеуі, жауапты мамандардың өз қызметіне немқұрайлы қарауы сынды мәселелер де қаралды. Әсіресе, аудан әкімі Ерболат Садырқұлов бала тәрбиесінде ата-ананың рөлі зор екендігін айтып, мектептің іс-шараларына оларды да көптеп тарту керектігін жеткізді. «Қос бөлімнің баяндамасынан бірнеше өзекті мәселелерді анық аңғаруға болады. Солардың бірі әрі бастысы – ата-аналармен жұмыс. Алдын алу іс-шараларына оларды да жұмылдыру маңызды. Сонымен қатар, өзімізге жүктелген жауапкершілікті әрқайсымыз сезінуіміз қажет. Сонда ғана нақты нәтижелерге қол жеткізетін боламыз. Соңғы орын алған оқиғаларға байланысты аудан көлемінде профилактикалық жұмыстар жүргізуіміз керек. Бұл жұмысқа мәслихат депутаттары, Қоғамдық кеңес пен ардагерлер ұйымының мүшелерін, ұстаздар мен ішкі істер бөлімінің қызметкерлерін жұмылдыру қажет. Шара бір ай көлемінде жүргізілетін болады» деп жиынның шешімін мәлімдеді.
Жиын барысында мәслихат хатшысы Тұрсынхан Жаманбаев, Қоғамдық кеңес және ардагерлер ұйымының Кеңесінің төрағалары Пазыл Сүлейменов пен Қожайхан Бижанов та сөз сөйлеп, алдын-алу шараларына депутаттар, қоғамдық кеңес мүшелері мен ардагерлер де белсене қатысатындықтарын жеткізді.
Жәнібек БАЗЫЛБЕКОВ.