Каменкадағы кітап көрмесінде
582 Views
Бір жылдары Каменка ауылында Файзолла Омаров деген азамат тұрды. Үйі тура ауыл орталығында, мәдениет үйіне қарсы бетте болатын. Іс сапармен келген сайын оған ұшыраспай кетпеуші едім. Өзі Арқа жақтан болуы керек, Абай туралы көп айтатын. Мерзімді басылымдарға көрген-білгенін жазып та жүретін. Біздің аудандық газетке де оның мақалалары мен өлеңдері жарияланып тұрды. Сол кісі бір күні маған: «Сіз білесіз бе, осы ауылда Абай Құнанбаевтың ағайындары бар» демесі бар емес пе. Сөйтсе… ол өзім күн құрғатпай көріп жүрген Тоқтарғазы деген азамат болып шықты. Расында бұл мен үшін тың жаңалық еді. Кейін марқұм Тоқаңның өзі де редакцияға келіп, кемеңгер Абайға қандай туыстығы бар екенін айтып берді. Оның әкесі Қапыш та, ағасы да Баянауылдан болып шықты. Бұл туралы аудандық, облыстық газеттерге кейін жаздық та, сондықтан оны қайталап жатпайық.
Жақында іс сапармен осы ауылда болып, үлкен мәдениет үйінің фоесіне кіргеніміз сол еді ауыл кітапханашысы Тынышкүл Ақылбаева бір топ ауыл адамдарына Абай Құнанбаевтың 175 жылдығына орай кітап көрмесін ұйымдастырып, соған библиографиялық шолу жасап тұр екен. Кітапханашылардың ой-өрісі кең ғой шіркін, жаңағы әңгімені сол жерден естідім. Енді осы туралы жергілікті мектептерде кездесулер өткізіп, Абай мұраларын жас ұрпақтың санасына тереңдете сіңірсе ғой, әсіресе, жаңағындай жергілікті материалдарды ұтымды пайдаланса нұр үстіне нұр-ау. Былайша айтқанда, біз ұлтымызды Абайша сүйіп, Абайша танысақ мемлекет басшысы Қасым-Жомарт Тоқаевтың «Абай және ХХІ ғасырдағы Қазақстан» атты мақаласында айтылған өрісі кең өрелі пайымдарды көкірегімізге мықтап түйген болар едік. Осы тұрғыдан алғанда Каменка ауылындағы кітапханашы Т.Ақылбаеваның бастамасы қолдауға тұрарлық.
С.Қожеке.