Ауыз су мәселесі шешімін табуда

Бүгінде елімізде Үкімет ха­лықты таза ауыз сумен қамта­масыз ету мәселесімен тың­ғы­лықты айналысып келеді. Азамат­тардың үйлеріне баратын су — маңызды әлеуметтік мәселе, ха­лықты таза ауыз сумен қамта­масыз ету жүйелі және ұзақ мер­зімді жұмысты қажет етеді. Ха­лықтың денсаулығының мықты болуы және басқа да дүниелер осы мәселемен тікелей байланысты.
Мемлекет басшысы Қасым-Жомарт То­қаев та халыққа Жол­дауында азаматтардың тұр­мыс сапасын, тұрмысының қолай­лылығын жақсарту, қала немесе ауылдық жер екеніне қара­мастан, халық­ты сапалы ауыз сумен қамту және сумен жаб­­дықтау бойынша жер­гі­лікті әкімдіктерге зор мін­­дет жүк­­теп, жоспарлы жұмыс­тар орын­дау қажеттігін тап­сыр­ған болатын. Қарапайым ха­­лық­тың таза ауыз суға зар бо­лып отыр­ғанына жергілікті әкім­дік­тер де алаңдаулы. Соны­мен бірге жергілікті басқарушы ор­ган­дар сөзбен емес іспен мәсе­лені шешуге барынша ат­салы­сып жатыр. Соның жарқын бір мы­салы — «Өңірлерді дамыту – 2020» бірыңғай бағдарламасы қа­был­данғаннан бері талай ха­лық ауыз сумен қамтамасыз етілді.
«Өңірлерді дамыту – 2020» бағдарламасы аясында біздің өңірімізде де елді мекендерді ауыз сумен қамтамасыз ету сәтті жүзеге асырылып келеді. Су – ырыс көзі, тіршілік бұла­ғы болғандықтан да, ауыл тұрғындары үшін ауылды таза ауыз сумен қамту мәселесінің қарқынды жүргені құптарлық жайт. Осыған байланысты Жамбыл облысында да елді мекендердің бар­лығын алдағы үш жылда таза ауыз сумен қамту шаралары қолға алынған. Бұл бағыттағы жұмыстар кезең-кезеңімен жү­зеге аспақ.
Аудан аумағында да биыл ха­лықтың тұрмыс сапасын артты­руға бағытталған ауқымды шара­лар қолға алынуда. Тыңғылықты жұмыстың нәтижесінде биыл ауданның 8 елді мекені халқының таза ауыз су проблемасын ше­шуге мүмкіндік туды. Ауыз су проблемасы жылдар бойы жыр болған ауылдар — Әбжапар, Жарлысу, Құмарық, Қаракемер, Алғабас, Бәйтелі ауылдарында су жүйесі құрылысы және Құлан ауылында су имаратының құры­лыс жұмыстары қарқынды жүр­­гізіліп жатса, Тасшолақ ауылында таяу күндері жұмыс бас­­талады.
Жалпы аудан аумағындағы 42 елді мекеннің 26 елді меке­нінде ауыз су жүйесі бар (17 орта­лық­тандырылған, 9 ескі су жүйе­сі), қалған 16 елді мекен тұр­ғын­дары құдықтан және ұңғы­мадан (артезиан) су алады.
Қазірге дейін ауданның 17 елді мекенінде «Ауыз су» және «Ақбұлақ» бағдарламалары ая­сында жаңа ауыз су жүйелері құрылысы жүргізіліп, пайда­лануға берілген. Аудан халқының 45727 адамы немесе 70,9% таза ауыз су пайдалануда. Атап айтқанда, 2006 және 2013 ж.ж. – Құлан, 2009 жылы – Тереңөзек, Өрнек, Көгершін, 2010 жылы – Шолаққайынды,2012 жылы – Көкдөнен, Жақсылық, Қара­қат, Каменка және Абай ауыл­дық округінің Көкарық, Еңбек­ші ауылдары, 2013 жылы – Көк­арық, Қорағаты, 2014 жылы – Д.Қонаев, 2015 жылы – Қызыл­шаруа, 2017 жылы – Қа­йыңды, 2018 жылы — Луговой ауыл­дарына ауыз су жүйесі берілді.
Аталған ауыз су жүйелеріне «Таза су-2014» КМК қызмет көр­сетеді, тұтынушылар саны-34588 адам, яғни 6161 аула тұрғындарына қызмет жа­сайды.Тұтынушылар есептеу ас­пап­тарымен толық қамтамасыз етілген.
Шалғай ауылдарда ауыз су мәселесі өзекті екені белгілі. Көпшіліктің көкейінде жүрген, ауыз су проблемасы жылдар бойы шешімін таппаған ауылдардың бірі — Өрнек ауылдық округіне қа­расты Әбжапар ауылы. Биыл өзге ауылдармен бірге ауыл халқы таза ауыз сумен қам­тылуы үшін қаражат бөлі­ніп, су құбыры құрылысы жұ­мысы басталды. Құрылыс жұмыс­тарымен айналысатын мер­дігер компания — «Тараз-Ирри­гация» ЖШС-і, авторлық қадағалаушы-«ЛидерПроект Дизайн» ЖШС-і. Қазіргі таңда ауыз су құрылысының алғашқы қадасы қағылып, ауыл ішінде қызу жұмыс басталды. «Халық тау суын ішіп отыр»-деп үлкен мәселеге айналған ауылдың өзекті проблемасы, даулы мә­селеге айналып келген еді. Ен­дігі кезекте бұл мәселе өз ше­шімін тауып, халықтың өз үйінде қолжетімді таза суды пайдаланатын уақыт та алыс емес.
Өрнек ауылдық округіне қарасты Жарлысу ауылында да ауыз су жүйесінің және су шығару имаратының құрылысын салу жұмысы басталған, жауапты мердігер -» Жігер-2004″ ЖШС-і мен авторлық қадағалаушы-» Құрылыс-Инвест жоба» ЖШС-і мамандары. Қазіргі уақытта құрылыс басында 25 жұмысшы өз қызметтерін атқаруда.
Құмарық ауылдық округіне қарасты Алғабас ауылының су құбыры желілерінің құрылысын салу жұмысын мердігер-«Ақмешіт-Мелиоратор» ЖШС-і, авторлық қадағалаушы-«Табыс жоба» ЖШС-і жүргізуде. Сол сияқты Құмарық және Қаракемер ауылдарында «Нұр Строй Сом» ЖШС-і су құбыры желілерінің құрылысын жүргізуде.
Ауданда жаңа құрылысты қажет еткен Құлан ауылының су жүйелері құрылысы мен су шығару имаратының құры­лысына биыл бюджеттен қо­мақты қаржы бөлініп, жұмыс­тары басталды. Қазіргі уақытта жарамсыз резервуарларды бұзу, демонтаж жұмысына 25 азамат, 8 техника жұмылдырылуда. Құрылысты осы салада тәжірибесі мол «Тараз-Строй-2004» ЖШС-і жүргізіп жатыр.
Шағын ауыл санатына жа­татын Бәйтелі ауылының сумен қамтамасыз ету жүйе­сі­нің құрылысын салуға «Пырақ Құрылыс» ЖШС-і жа­уап­кершілік алған. Ауыз су құры­лысы жұмысы басталып та кетті.
Аудан әкімдігінің алдағы жылдарға да ауыз су мәселесін ше­шуге нақты жоспары бар. Мысалы, Р.Сәбденов, Жаңа­тұрмыс, Ақыртөбе ауылдарына ауыз су жүйесін жүргізуге ЖСҚ әзірленуде. Шөңгер, Мамайқайыңды, Аққайнар, Тойқұдық, Мамыртөбе, Әбіл­хайыр, Сұмқайты, Сөгеті ауыл­дарына мембраналық су тазарту құрылғысымен қамтамасыз ету үшін облыстық бюджет есебінен қаржыландыру қарастырылуда.
Тіршілік көзі саналатын ауыз су проблемасын шешуге қазы­надан бөлініп жатқан қомақты қаржы тиімді жаратылып, сапалы жұмыстар атқарылса, аз ғана жылдың ішінде әлеу­мет үшін маңызы зор бұл проб­леманы түпкілікті шешуге әбден болады. Алдағы уақытта аудан жұртшылығының ауыз суы мәселесінде еш кедергі болмауы үшін жауапкершілікті күшейту-маңызды міндет. Құрылыс жұ­мыстары «Т.Рысқұлов-Адал­дық алаңы» жобалық офисі мүшелері мен Қоғамдық бақы­лау мүшелері тарапынан, аудан әкімдігінің тиісті сала мамандары тарапынан қатаң бақылауда болып, әр күнгі жұмыс барысының талапқа сай жүргізілуі тексеріледі. Жұмыстың сапалы ұйым­дас­тырылуына баса көңіл бөлу туралы тиісті жауапты маман­дарға тапсырмалар жүктелген.
Ендігі міндет- жоспарланған жұмыстардың нәтижесін көру. Ха­лықтың тұрмыс сапасын арттырудың бір жолы-таза ауыз сумен қамту мәсе­лесін жоспарға сай кезең-кезеңмен оңтай­лы шешу. Осы бағыттағы жұмыс­тар жүйеленіп, халық сұранысын қана­ғаттандыру бағытындағы жұмыстар алдағы уақытта жалғасын табатын болады.

Е.Садырқұлов,
аудан әкімі.

Поделиться ссылкой: