ЕҢ ҮЗДІК ПЕДАГОГ

174 Views

Бірлік Абай ауылын­да дүниеге келді. Бірақ орта мектепті аудан орталығындағы №2 мектепте бітірді. Ол кезде Жамбыл малдәрігерлік тех­никумына оқуға түсуге ниет білдірушілер көп болатын. Оның үстіне, ауыл шаруа­шылығына, әсіресе, кол­хоз-совхоздарға малдәрігері мен зоотехник мамандар ауадай қажет кез. Бірлік көп ойланып жатпастан ветеринария бөлі­мі­не құжаттарын тапсырды. Сөйтіп, қолына мал дәрігері деген диплом алған. Аудандық мал дәрігерлік ветеринарлық станция ол кезде Қазбек Асылов көше­сін­де еді. Ауданның барлық мал ем­деу мамандары осы жердегі үлкен лабораторияға, яғни зертханаға келіп, бүкіл аудандағы малдан қан алып тапсыратын. Веттехниктер өздеріне қажет деген дәрі-дәр­мектерді де осы жерден алатын. Міне, осы станцияға Бірлікті веттехник етіп жұмысқа алды. Ол осында алты жыл жұмыс істеді. Өз ісіне үлкен жауапкершілікпен қарайтын оны аз уақыттың ішінде ауданның барлық мал емдеу ма­ман­дары жақсы біліп алды. Ол станция қызметкерлерімен бірге ауыл-ауылға, шалғай қыстауларға іссапармен жиі шығатын. Сөйтіп жүргенде оны техникумға жұмысқа шақырды. Иә, жәй ғана зертхана­шы қызметіне алды. Бірақ, қай жұ­мысты да тындырымды атқарып үйренген ол жаңа жұмыс орнында да басшылардың көзіне түсіп үлгер­ді. Енді оны ветеринария бөлі­мі­не оқытушылыққа ауыстырды. Осылайша оның ұстаздық қызметі басталды.
– Менің оқытушы ретінде қа­лыптасуыма Серік Күмісов ағай көп тәлімгерлік жасады. Педагог болудың жауапкершілігін сонда ұқтым. Әр студенттің жүрегіне жол тауып, пән бойынша теория­лық және практикалық сабақтар­ды олардың жетесіне жеткізе үй­ретудің өзі үлкен дайындықты, білімділікті қажет ететінін тү­сіндім. Техникумда дәріс бере жүріп, Алматы зоотехникалық-ветеринарлық институтын сырттай оқып бітірдім. Жоғары білім алып, білікті маман атан­дым. Ал, кәсіптік шеберлік жиыр­ма бір жыл ішінде бірте-бірте қалыптаса бастады. Бі­лім берудің методикасы мен заманауи технологияларды игеріп, осының барлығын оқу процесі кезінде жүзеге асыра алатын дәрежеге жеттім, -дейді Бірлік Тоғанбайұлы.
Оқытушы өзінің жи­нақтаған тәжірибесін қа­жы­май-талмай әр саба­ғына тиімді пайда­ла­на білді. Соның нәтижесі болуы керек, оның оқу­шылары аудандық, облыстық, тіпті, республикалық байқаулар мен олим­пиадаларда орындар ала бастады. 2011 жылы оның Серік Нақан деген оқушысы инновациялық технология бойынша дарынды деген білімгерлер­дің облыстық конкурсына қатысып, жүлдемен оралды. Бұл оқытушының да, оқушының да ең алғашқы жеңісі еді. Ал, 2013 жылы Бірліктің Александр Цхай деген оқушысы он-лайн – интернет конкурсында республика бойынша екінші орынды иеленеді. Арада бір жыл өткенде оқытушыға Қазақстан Республикасы Білім және ғылым министрлігінің «Үздік педагог» деген атағы беріледі. Артынша Бірлік омырауына республикалық педагог­тар қауымдастығының «Білім беру ісіне қосқан үлесі үшін» деген меда­лін тағады. Сол жылдары оның еңбегі жоғары бағаланып, ол облыс әкімі мен облыстық мәслихаттың Құрмет грамоталарына да ие болды.
Ол енді ветеринария саласындағы инновациялық-ғылыми жобаларға жиі қатыса бастады. Өзінің білімін жетіл­діру мақсатында және дуальды оқыту жүйесін колледждегі оқу процесіне ен­гізу бойынша сол кездегі оқу орны­ның басшысы Жұмакүл Оңғарбай­­­қызы Бүкірова­ның нұсқауымен кәсіп­кер­лік палатасының ұйымдасты­руы­­­мен Германияға барып келді. Келген соң дуальды оқыту жүйесін практика жүзінде Жақсылық ауылын­дағы «Қайқы» шаруа қожалығында ең ал­ғаш рет жүзеге асырды.
Сол жылдары шәкірті Руслан Дубин байқауда ерекше көзге түсті. Оқытушылық Бірлік Тоғанбайұлы­ның өзінде ғана емес оның отбасында да дәстүрге айналған. Оның зайыбы Махаббат колледжде директордың ақпараттық технология бойынша орынбасары болып қызмет атқарады. Дәурен есімді ұлы да педагог. Тараз­дағы сервистік колледжде өндіріс шебері. Берігі заңгер. Бірліктің төрт немересі бар.
Иә, олар әулетімен педагог. Ал, Бірлік Тоғанбайұлы Сраилов болса, колледждегі «Ең үздік педагог».

С.Қожеке.
СУРЕТТЕ: Құлан жоғары агротехникалық колледжінің оқытушысы Бірлік Тоғанбайұлы Сраилов.

Поделиться ссылкой: