Ауданның бас идеологы

448 Views

Бейсекеңді отыз жылдан бері біледі екенмін. Ал жалпы Әлпейісовтер әулеті Құлан өңіріне ғана емес, бүкіл Қазақ еліне танымал. Әшімәлі кәрие заманымыздың заңғар жазушысы Шыңғыс Айтматов жазған «Жанпида» («Плаха») романының кейіпкері Калистратов поездан түсіп қалатын Жалпақсаз бекетінде туып, өскен соң Түркісіб темір жолында қолына қайла ұстап, жолшы атанады. Ол кезде Бейсенбектің әкесі ұл-қыздарының өз атын бүкіл Қазақстанға шығаратынын қайдан білсін. Қанай жұрты: «Әшімәлінің балалары бәрімізден озды. Бәрі де өкімет болды» дейтін еді.
Оның жөні бар. Ділдікүл мен Әшімәлінің тұңғышы Аманбай аудандық комсомол комитетінің бірінші хатшысы, аудандық партия комитетінің хатшысы болды. Ал өзіммен түйдей құрдас Есенбай қолданбалы математика, авто­матика ілімін жете меңгерген ғалым, техника ғылымының докторы, профессор атанып, қазір Нұр-Сұлтанда тұрып жатыр. Рыскүл мен Назгүл де ағасының жолын қуып, ғылым жолында жүр. Рыскүл математика ғылымының кандидаты, профессор, ал, Назгүл болса педагогика ғылымының кандидаты. Бақытжан Әлпейісовті бүкіл Қазақ елі күн құрғатпай теле­дидардан көріп отырады. Өйт­кені ол белгілі театр актеры, таны­мал киноактер. Қазақстан Республикасына еңбегі сіңген мәдениет қай­раткері. Өкінішке орай мектеп директоры лауазымына дейін көте­ріліп, жақсы атымен жұртқа таныла бастаған Жақыпбек дүниеден ерте озды. Аманбай да қазір ортамызда жоқ. Әйтсе де Бейсекеңнің ба­уыр­лары әулеттің жүгін, әке мен ана аманатын қары талмай көте­ріп келеді. Әйткенмен біздің әңгі­мемізге арқау еткелі отырған азаматымыз осы үйелменнің оңқай асықтай ортаншы ұлы – Бейсенбек қой. Ендеше әлеуметтің жүгін қара нардай қажымай-талмай қырық жылдан аса уақыт бойы көтеріп келе жатқан Бейсенбек Әлпейісов туралы біз не білеміз?
Табаны күректей омыртқалы ал­пыс үш жыл бұрын бес ұл мен екі қыздың ортасында «шыр» етіп дү­ниеге келген ол ел қатарлы Тұрар Рысқұлов атындағы қазақ орта мектебінің бірінші сыныбына барды. Осы мектептің қабырғасында жүріп пионер галстугін, одан соң ком­сомолдық белгі таққан өрен мек­тептің қоғамдық, мәдени жұмыстарына белсене қатыс­ты. Қабырға газетінің редакторы әрі суретшісі, көркем өнерпаздар үйірмесінің белсенді мүшесі, волейбол және шахмат үйірмелерінің белсенді қатысушысы бола жүріп, пән олимпиадаларына да қатысып, жүлдегер атанды.
1974 жылы мектепті үздік бағаға бітірген ол бірден арман қала Алма­тыға тартты. Сөйтіп, Қазақ Ауылшаруашылығы институтына ме­ханика факультетінің студенті болып оқуға қабылданды. Мектепте жүріп қоғамдық жұмыстарға белсенділікпен қатысқан оны жоғары оқу орнының ұжымы да құшақ жая қарсы алды. Еті тірі емес пе, ә дегеннен-ақ, факультеттің оқу-тәрбие комис­сия­сының, студенттер кеңесінің мүшесі болып сайланды. Бейсенбек институт жанындағы халықтық ұлт-аспаптар оркестріне домбырашы әрі қобызшы болып қабылданды. Бұл 1977 жыл болатын. Өнерпаз студенттер сол жылы гастрольдік сапармен ФРГ-ге аттанды. Олар осы сапарда немістің Франкфурт на Майне, Гамбург, Дюссельдорф, Кельн тағы басқа сол сияқты сегіз қаласында өнер көрсетіп, Алмания жұртшылығының алғысына бөленді. Бейсекең арада бір жыл өткенде Алматыда өткен «Студент көктемі» байқауына қатысып, домбырамен құйқылжыта күй тартып, лауреат атанды.
Сонымен студенттік қызығы мен қызуы мол жылдар да артта қалды. 1979 жылы қолында білдей дипломы бар маманды оқу орны жолдама беріп Жезқазғанға аттандырды. Ол кезде кеудеде жастық жалын, санада сан түрлі ой бар, тас қопарып, тау тұрғызатын талап та жоқ емес болатын. Бейсенбек «Талап» деп аталатын кеңшарда машина трактор паркінің меңгерушісі болып еңбек жолын бас­тады. Жаныңда — Магнитка, қалада – жастар. Сөйтіп, не керек ауылдағы қоңыртөбел шаруаға үйренген оған жер жыртқызып, егін салу деген таң­сық жұмыс емес болатын. Былайша айт­қанда, диқаншылық кәсіп те ол кезде құр­метті саналатын. Тыңдағы екі жылда ол әбден ысылды, тіпті бас инженер-механик дәрежесіне көтерілді. Алайда отбасылық жағдаймен Луговойға қай­туына тура келді. Келген бетте Луговой жөндеу-механикалық зауытына шебер болып жұмысқа орналасты. Екі жыл шет­те жүріп елді жатырқап қалған оны жұрт жатырқамады. Қайта: «Өз баламыз, жас маман» деп аға ин­женер-технолог лауазымына көтерді. Қашан көрсең қоғамдық жұмыстан қашпайтын Бейсенбекті зауыттықтар да жылы қабылдады. Сөйтіп, бір күні кәсіподақтар көпшілік жиналысында оны төраға етіп сайлап жіберді. Міне, осы күннен бастап Бейсенбек Әшім­әліұлының идеологиялық жұмыстағы карьерасы басталды.
Киіміне төрт жыл ішінде зауыт майының иісі сіңіп, қара жұмысшылар оны: «Өзіміздің адам» деп толыққанды атай бастағанда Бейсекеңе ауатком «құда» түсті. Ол кез: «Партия қайда бол­са – біз сондамыз!» деген ұранның бойға сіңіп, белең алған тұсы. Оның үстіне су жаңа партия билетін алған интеллигент қайда барады. Аупарткомға нұсқаушы болып келді. Енді ол, Лес Бекебаев, Әшіркүл Қохаева, кеңес Исмаиылов, Болат Серікбаев сынды тіс қаққан партия «жауынгерлерімен» иық түйістіре жұмыс істей бастады. Сырттай қараған адамға идеологиялық жұмыс аса көзге көрінбейтін сияқты болып көрінеді. Ал кабинеттегі қыруар қағазды ақтарып кеп жіберсең: «Бұл жұмыс биыл бітпейтін шығар» деген сөздің аузыңнан қалай шығып кеткенін білмей де қаласың. Сонымен не керек Бейсекең осынау ақпараттық кеңістікке өзін үш жыл «байлап», саясат майданының нағыз сайыпқыраны бо­лып шыға келді. «Енді баланың пар­тия ұйымын басқаруға қабілеті» же­теді деп шешкен болуы керек, бір күні аупарткомның бірінші хатшысы Тұр­сынхан Мүсірәлиев алдына шақырып алып: — Сені «Жаңатұрмыс» колхозына партком хатшылығына ұсынып отыр­мыз. Арғы жағын бара көрерсің, ком­мунистер оң көзімен қарап жатса, парт­ком секретары да болып қалуың ғажап емес» деді.
Сонымен кешегі зауыт инженерін кол­хоз коммунистері бірауыздан дауыс беру арқылы бастауыш партия ұйы­­мына хатшы етіп сайлап алды. Мұн­да да Бейсекең баяғы өзінің бой­ға сіңген көпшілдігімен үш жыл та­бан тіреп көппен жұмыс істеді. Жаңа­тұрмыстықтар оны жатырқаған жоқ. Қайта Бейсенбек Әшімәліұлының қол­дауымен біраз мамандар мен кол­хозшылар партия қатарына өтіп, партиялық билеттерін қолына ал­ды. Ауылдағы клубтың жұмысы жан­данып, жастар қоғамдық белсенді жұ­мысқа бір кісідей араласа бастады. Шаруа­шылықтың экономикалық көрсет­кіштеріне де партком коммунистерінің қа­жыр-қайраты кәдімгідей әсерін ти­гізді. Ол ұжымшар бастығының орын­басары лауазымын алып жұ­мыс істеп жүргенде Луговой же­міс-жидек өңдеу кәсіпорны ди­ректорының орынбасары қызметіне шақырылды. Одан соң селолық кәсіптік-техникалық училищесіне оқытушы, аудан әкімдігінің ауылшаруашылығы басқармасының бас инженері, бөлім маманы қыз­меттерін атқарды. 1998-2004 жыл­дар аралығында банкрот деп танылған кәсіпорындар мен шаруа­шылықтарда конкурстық бас­қарушы лауазымында болды.
2004 жылы Бейсекең аудан әкімдігінің ішкі саясат бөлімін бас­қаруға келді. Ал 2012 жылдан күні бүгінге дейін аудан әкімінің орын­басары қызметін мінсіз атқа­рып келеді. Ол осы мерзім ішін­де аудандағы қоғамдық-саяси ахуал­дың жақсаруына, этносаралық тұрақтылықтың сақталуына және ұлттар Ассамблеясы жұмысының жандануына ұйытқы бола білді. Айту ләзім, идеологиялық жұмыс­тың әр қырын жетік білетін ол республикалық, облыстық, ау­дан­дық деңгейдегі қандай ша­раларды болмасын өткізуге үлкен белсенділікпен араласады. Сондай-ақ, Бейсекең мүше болып жүр­ген ауданның волейбол бойынша құрама командасы облыстың бірнеше дүркін жеңімпазы.
Бейсекең абырой, атақ ізде­мейтін, қайта қатардағы адам­дарды Елбасының, мемлекет басшысының тапсырмаларын орындауға үнемі үндеп отыратын. Егер Дінмұхамед Қонаев Әлмұқан Исақовты еліміздің екінші идеологы десе, мен Бейсекеңді ауданның бас идеологы дер едім.
Десек те, адам ұрпағымен бай атанады. Әр адамның өз Отаны бар, ал оның екінші отаны – отбасы, яғни үрім-бұтағы, үйелмені. Бейсенбектің өз отаны бар. Ол оның асыл жары Рыстай – екеуі өсіріп отырған екі ұлы мен екі қызы. Олардың да барлығы жоғары білімді. Өскен-өнген әулет. Сегіз немере сүйіп отырған Бейсен мен Рыстайдың арманы бар ма екен, шіркін! Әсіресе, олар аты елге әйгілі Әлпейісовтер әулетінен болса ше? Дегенмен де барлық саналы ғұмырын, барлық күш-жігерін партиялық-шаруашылық, идеологиялық саяси, әлеуметтік-мәдени тұр­мыстық салаларын дамытуға арнаған азаматымызды зейнет демалысына шығарып сала отырып, оған зор денсаулық, баянды бақыт тілейміз.

С.Қожеке.
Суретте: Қазақстан Респуб­ликасының Тәуелсіздігіне 20 және 25 жыл, Қазақстан халқы Ассамблеясына 20 жыл, Қазақстан Республикасы Конституциясына 30 жыл ме­рекелік медальдарымен және «Жамбыл облысына сіңірген еңбегі үшін» төсбелгісімен, Жамбыл облысы әкімінің Құрмет грамотасымен марапатталған аудан идеологиясы саласын 30 жыл басқарған, елі құрмет тұтқан азамат Бейсенбек Әшімәліұлы Әлпейісов.

Поделиться ссылкой: