Өзекті мәселелер талқыланды

Өткен жұмада аудандық Қоғамдық кеңестің кезекті отырысы өтті. Қоғамдық кеңес төрағасы Пазыл Сүлейменовтің төрағалығымен өткен жиында екі мәселе талқыланды. Біріншісі биыл аудан аумағында күрделі жөндеу жүргізілген 8 мектептің құрылыс жұмыстары болса, екіншісі «COVID-19» жұқпалы дертінің алдын алуға байланысты білім мекемелерін­де карантиндік ережелердің сақта­луы туралы мәселе күн тәртібінің негізгі тақырыптары ретінде өрбіді. Аудан әкімдігінің үлкен мәжіліс залында өт­кен алқалы отырысқа аудан әкімінің орынбасары Жандос Ордабаев, Қоғамдық кеңестің мүшелері және мектеп директорлары қатысты.
Күн тәртібіндегі екі мәселе бойынша аудан әкімдігі білім бөлімінің басшысы Майра Базарова баяндама жасады. «Бүгінгі таңда аудан әкімдігінің білім бөліміне қарасты 38 мектеп бар. Оның 28-і орта, 2-еуі негізгі, 8-і бастауыш мектеп» деп баяндамасын бастаған Майра Айдарбекқызы үстіміздегі жы­лы аудандағы білім мекемелерінде жүргізілген күрделі және ағымды жөн­деу жұмыстарына жан-жақты тоқ­та­лып өтті. «Биыл 8 мектебіміздің ғи­ма­ратына күрделі жөндеу құрылыс жұмыстары жүргізілді. Мемлекеттік «Жұ­мыспен қамтудың жол картасы» бағ­дарламасы аясында 3 мектепке Ә.Бөкейханов, Ш.Уәлиханов атындағы орта мектебімен қатар №1 мектеп-лицейінің құрылыс жұмыстарына бюджеттен 845 миллион 493 мың теңге қаражат бөлінді. Ал қалған 5 мектептің, яғни Ақтоған, №3, Ақбұлақ, Болтай батыр және Бауыржан Момышұлы атындағы орта мектеп ғимараттарының құрылыс жұмысы «Өңірлерді дамыту» бағдарламасы аясында іске асырылды. Оған бөлінген жалпы қаражаттың жиын­тық сомасы 920 миллион 910 мың теңге. Ә.Бөкейханов, Ш.Уәлиханов атындағы орта мектептерімен қатар №1 мектеп-лицейі ғимаратының қас беті металлосайдингпен қапталды. Сондай-ақ, күрделі жөндеуден өткен барлық 8 мектеп ғимаратының ішіне толық әрлеу левкас жұмысы жасалды. Есік-терезелері ауыстырылды. Сынып бөлмелеріне линолеум, дәліздеріне ке­рамогранит төселіп, шатыры метал­ло­черепицамен жабылды. Күрделі жөн­деу жұмыстарының жобалары мен сараптамалары барысында көптеген кемшіліктер орын алғаны сіз бен бізге мәлім. Аудан әкімі Ерболат Садырқұлов пен Қоғамдық кеңес мүшелерінің зерделеу жұмыстары нәтижесінде кеткен олқылықтар біршама түзетіліп, құрылыс жұмысы өз деңгейінде жүргізілді. Барлық 8 мектептің мердігер компания өкілдері демеушілік көрсетті. Жалпы пандемия ел аумағындағы құрылыс жұмыстарына кері әсерін тигізгені белгілі. Әйткенмен, ауданда жүргізілген 8 мектептің құрылысы ойдағыдай аяқталды деп айтуға толық негіз бар. Оқушыларымыз жаңа оқу жылында жаңартылған білім нысандарына жоғары көңіл-күймен келіп, білімдерін жетілдіруде» деп баяндамасын аяқтаған сала басшысы күн тәртібіндегі екінші мәселеге ойысты.
– Қазіргі күні ауданымыздағы 14984 оқушының 4601 оқушысы кезекші сыныпта, 3550 оқушы дәстүрлі түрде, 6833 оқушы қашықтықтан білім алып жатыр. Аудандағы 23 мектепке дейінгі ұйымдардағы 85 кезекші топтарда 1073 бүлдіршін тәрбиеленуде. Қазақстан Республикасы Білім және ғылым министрінің 2020 жылғы 13 тамыздағы 345-ші бұйрығы бойын­ша коронавирустық инфекцияның таралуына байланысты елімізде ка­рантиндік шектеу шаралары орта білім беру ұйымдарындағы білім беру процесі кезінде толығымен сақталуда. Әрине, бұл пандемия бізге оңай болып тұрған жоқ. Бүгінгі таңда 22 мектеп дәстүрлі түрде, 16 мектеп қашықтықтан оқытылуда. Барлық санитарлық талаптар мектеп директорларының қатаң бақылауында. Қоңырау кезіндегі ерекшеліктер де бүгінгі күні қатаң сақтаулы тұр, –деді Майра Базарова.
Майра Айдарбекқызы өз сөзін толықтай аяқтаған соң Қоғамдық кеңес төрағасы Пазыл Әбілдаұлы «Баяндамашыға қояр сұрақтарыңыз бар ма?» дегенде:
– Аталмыш кеңестің мүшесі Мұратхан Стыбаев орнынан түрегеліп:
– Бар,- деп үн қатты. Сосын: «Майра Айдарбекқызы, мен сізге үш сұрақ қойсам деймін. Біріншісі, мектеп басшылары мен балабақша меңгерушілері өздері басқаратын ғимараттағы ақауларды жөндеу үшін сіздің атыңызға сұраныс жазады. Әрине оны орындау қаржыға келіп тірелетіні анық. Алайда, осы мәселені шешу үшін басшы ретінде өзіңізбен бірге білім бөлімі қызметкерлерінің кәсіподағы және бас есепші ақылдаса отырып талқылап, ортақ бір шешімге келіп, қаржы жағынан аудан әкіміне сұраныс болды ма? Бұл – бір. Облыс әкімінің 2018 жылы 29 маусымдағы №128 Қаулысымен бекі­тілген жемқорлыққа қарсы іс-қимыл жөніндегі Жамбыл облысының 2018-2020 жылдарға арналған іс-шаралар жоспарын орындау жайлы аудан әкімі Ерболат Садырқұловтың 2020 жылдың сәуір айында төрағалық еткен жиналы­сының хаттамасында: «Аудан әкімдігі білім бөлімі қызметкерлерінің сыбайлас жемқорлық және құқық бұзушылық шаралардың алдын алу мақсатында бас­шылық тарапынан бақылауды күшей­ту туралы тиісті шаралар қабылдансын. Ақша жинауға тосқауыл қойылсын» деп көрсетілген. Солай бола тұра, аудандық тауарлармен көрсетілетін қыз­меттердің сапасы мен қауіпсіздігін бақылау басқармасы (СЭС) салған айыппұлды неге мектеп басшылары төлеуге тиісті. Осыған қандай шара жасалынды? Бұл – екіншісі. Соңғы сұрағым. Аудандық білім бөліміне қарас­ты 38 мектеп бар. Осыларда орналасқан бейнебақылауларды ауыстыруға қаржы қарастырылды ма? Қоғамдық кеңес мүшесінің сұрақтарына Майра Базарова төмендегідей жа­уап берді. Жоғарыда аталған 8 бі­лім ошағының жобалық сметалық құжа­­тын­да кемшіліктер болғанын жасырмады. Сол себепті жобада кеткен олқылықтарды құрылысты жүргізген мердігер компаниялар демеушілік есебінен жүргізіп бергенін айтып өтті. «Әрине, мектеп болғаннан кейін ақаулар болып тұрады. Луговой ауылындағы М.Горький атындағы орта мектептің отақазандығын газдандыру бойынша қыркүйек айында бізді «Фейсбук» әлеуметтік желісінде қатты сынға алған болатын. Дегенмен аталмыш мектептің отқазандығын газға ауыстыру мәселесін аудан әкімі де өз назарында ұстап отыр. 2021 жылға қаражат бөлу жайы қарастырылған. Мен осы қызметке тағайындалған кезге дейін аудандық білім бөлімі басшысының қаражат жинамау туралы бұйрығы шығарылған екен. Ол бұйрықпен барлық мектептің директорлары танысқан. Ал сіздің жаңағы айтып отырған уәжіңіз бойынша аудандық тауарлармен көрсетілетін қызметтердің сапасы мен қауіпсіздігін бақылау басқармасы (СЭС) тарапынан айыппұл салынғаны рас. Ол айып­пұлды төлеу бастауыш және негізгі мектеп­тердің қолынан келмейтіні және шындық. Сондағы айыппұл төлеуге себеп болған фактор мектептердің қор­шауы және асфальтінің жоқтығы, сондай-ақ, күрделі жөндеу жұмысы жүр­гізіл­меген. Өздеріңіз білесіздер, ау­дандағы 8 бастауыш мектеп те ыңғай­ластырылған ғимараттарға орна­лас­тырылған. Сондықтан да білім ошақ­тарына қойылатын талаптар осы бастауыш мектептерде көбіне-көп орын­дала бермейтіні рас. Бұл жылда қайта­ланып келе жатқан өзекті мәселе. Аудан әкімінің тапсырмасымен біз мектептердің барлығын зерделеп шық­тық. Қоршау мәселесі бойынша тиісті акті­лер жасалынды. Енді қаражат қарас­тырылады. Бұған ағымды жөн­деу жұмыстары жүргізілуі тиіс. Сон­дықтан ағымды жөндеу жұмыстары көп қаражатты қажет етпейді деген ойдамын. Біз СЭС-тің талаптарын орындауға тырысамыз, әрине. Осы мәселені біз аудан әкіміне, облыстық білім басқармасына жеткіздік. Бұл мәселе респбулика бойынша орын алып жатса да, бұны батылдық танытып, жоғары жаққа жеткізе білген тек қана Жамбыл облысы екенін айтқым келеді. Аудандағы қалыптасқан жағ­дайды аудан прокуроры да жақсы біледі. «Келісеміз» деп қол қойылып қойғаннан кейін біз де ешқандай амал болмай тұр, – деп жауап берді.
Содан соң Қоғамдық кеңестің мү­шесі Рахманәлі Әбдіқадыров та білім бөлімінің басшысына: «№3 шағын орталықты орта мектеп күрделі жөн­деуден өтті. 2020 жылы аталмыш білім ошағының отқазандығы табиғи газға көшірілуі керек болған. Жобалық сметалық құжаты бар. Осы жағдай қандай күйде тұр?» деп сауал жолдады.Бұл сауалға сала басшысы: «Биылғы жылы 2 мектептің газдандырылуы жөнінде жобалық сметалық құжат бар. Бірақ №3 шағын орталықты орта мектеп бойынша жоба жоқ. Дегенмен, жоспарға енген деп айтайын енді. Жаңа да атап өттім 37 миллион теңгеге арналған М.Горький атындағы орта мектепті газдандырудың жобалық сметалық құжаты бар. Аудан әкімдігі тарапынан қолдау көрсетілген. Құжат ЖКХ арқылы облысқа жіберілген. 2021 жылы бұл мәселе де шешіліп қалар деп күтілуде» деп жауап қайтарды.
Күн тәртібіндегі екі мәселе талқы­ланып біткен соң Пазыл Әбілдаұлы аудандық Қоғамдық кеңеске 10 мек­тептен өтініш келіп түскенін, ол жөнінде кеңес тарапынан арнайы комиссия құрыл­­ғанын айта келіп, келесі сөз кезе­гін кеңес мүшесі Әбдіқадыр Оңалбековке берді.
Өз сөзінде Әбдіқадыр Оңалбеков түскен өтініш бойынша зерделеу жұмы­сын жүргізген кезде көптеген орынсыз жағдайларға куә болғанын бүкпе­сіз айтты. «Мәселен, Т.Рысқұлов атын­дағы мектеп-лицейінің әжетханасы әлі күнге дейін бітпей тұрғаны, ол жұмыс­ты демеушілердің атқарып жат­қаны анықталды. Сонымен қатар, Бірлес орта мектебінің әжетханасының едені­нің тозығы жетіп тұрғаны және спорт залының да нобайы жетісіп тұрғаны шамалы. Және №3 шағын орталықты орта мектеп күрделі жөндеу­ден өтсе де, мектепті газдандыру мә­се­лесі қарас­тырылмапты. Мектеп дирек­торының айтуынша, жобалық сметалық құжат әзірленбеген көрінеді. Сондай-ақ, ауданда спорт залы жоқ 2 мектеп бар екен. Олар: Гагарин және №2 шағын орталықты орта мектептері. Бұл білім ошақтарындағы дене шынықтыру пәні қыс айы кезінде қайда өтетіндігі сұрақ тудырып отыр. Күрделі жөндеу жүргізілген 8 мектептің 6-ауы акт жасап, мектептен шыққан құрылыс заттарын ауылдарда асарлатып салынған үйлерге берген. Өкінішке орай, Ә.Бөкейханов және Ш.Уәлиханов атындағы орта мектептерде мұндай жұмыстар жүр­гі­зіл­мей, акт жасалынбаған» деді Әбдіқадыр Оңалбеков.
Одан кейін мінбеге көтерілген Мұрат­хан Стыбаев та бірқатар шын­дықтың бетін ақтарды. «Шоқан Уәли­ханов, Тұрар Рысқұлов, Ақтоған ша­ғын орталықты орта мектептерінің әжетханасын орналастыруға қаржы қойылмай, демеушілердің есебінен жасалғанын білдік. Сосын білім бөлі­мінің басшысы аудан әкіміне аудандағы барлық 38 мектептердегі бейнебақылау 100 пайыз қамтылған деп ақпарат берген. Осыған байланысты сіздерге дәйекті дәлелдерді келтірейін. Қ.Сұлтанбеков атын­дағы орта мектебінде есте сақ­тау қабілеті жоқ 8 бейнебақылау бар, оның 3-еуі істемейді. Ахмет Байтұрсынов атындағы орта мектепте бейнебақылау 7, 1-еуі істемейді. Болтай батыр атындағы орта мектеп күрделі жөндеуден өтті. Бейнебақылауды жаңа­дан қоямыз деп уәде еткен. Алайда, мердігер компания уәдесін орындамай, бұрын­ғыны қайта қоюға тура келген. Алғабас мектебінде бейнебақылау 13, 6-ауы істемейді. Шолаққайыңды орта мектебінде электр жарығы өте на­шар. Бейнебақылау 4, төртеуі де істе­мейді. Тунель жоқ. СЭС-ке 319 мың теңге айыппұл төлеген. Ә.Бөкейханов атындағы орта мектепте 7 бейнебақылау бар, бірақ іске қосылмаған. Сұранысқа 29 бейнебақылау берген. Әзірге жоқ. Ақбұлақ орта мектебінде бейнебақылау 8, 6-ауы істемейді» деді ол.
Мектептерге СЭС тарапынан са­лын­ған айыппұл жөнінде сөз қозғаған М.Стыбаев бұл туралы аудандық Қо­ғам­дық кеңестің төрағасы П.Сүлей­ме­новке хат түсініктеме беру үшін аудан прокурорына жолданғандығын және оның жауабында «Қажетті қаржы­ландырудың болмауынан орын алған кемшіліктер үшін лауазымды адамдарға қатысты іс жүргізу тоқтатылуы мүм­кін», – деп көрсетілгендігін айтты. Жа­уапта айтылғандай осы мектеп бас­­шыларына салынған айыппұлды тоқ­тату қажет еді» деп есептейтіндігін біл­дірді.
Содан соң мінбеге көтеріліп, сөз сөйлеген аудандық Қоғамдық кеңестің сарапшысы, зейнеткер ұстаз Түзел Алагөзова да құрылыс барысында орын алған кемшіліктер мен қателіктердің бетін ашты.
Қоғамдық кеңес отырысында бұ­дан да басқа өткір сындар айтылып, ескерт­пелер жасалынды. Осылайша екі сағатқа созылған жиынды Қоғамдық кеңес төрағасы Пазыл Сүлейменов қорытындылап, болашақ ұрпақтың қамы үшін бүгінгі білім беру саласында қызмет етіп жатқан педагогтарымыз аянбай еңбек ету қажеттігін жеткізді.Білім бөлімінің басшысына Қоғамдық кеңес отырысында айтылған сын-ескертпелерден қорытынды шығарып, кемшіліктерді жою бойынша шара қабылдауды тапсырды. Келер жылдың бюджетіне тиісті қаражатқа өтінім ұсыну керектігіне баса назар аударды.

М.Диханбай.

Поделиться ссылкой: