Тағылымы – терең, даңқы – ерен білім ордасы

282 Views

Әлемдегі үздік 200 университеттің қатарына кірген алғашқы отандық, қазақстандық жоғары оқу орны ол – әл-Фараби атындағы Қазақ ұлттық университеті. Қазіргі таңда ҚазҰУ- да көптеген әлемге әйгілі жоғары технологиялық корпорациялардың ғылыми білім беру орталықтары жұмыс істеп келеді. Қазақстандағы жоғары оқу орындары арасындағы халықаралық ғылыми журналдардағы жарияланған әрбір бесінші мақала біздің ҚазҰУ ғалымдарына, жас магистранттарына, докторанттарына тиесілі екенін ауыз толтырып айта аламыз. Қара шаңырақ ҚазҰУ-дың аса маңызды міндетті инфрақұрылымы – 50 пайызға жуық өсті. Білім алушы әрбір шәкіртке қолайлы ортада алаңсыз білім алуға барлық жағдай жасалған. Мен Т.Рысқұлов ауданы, Құлан ауылындағы қазіргі Ә.Бөкейханов атындағы орта мектепті 2015 жылы тәмамдаған түлектің бірімін. Арман қуып, білім алу мақсатында Алматы қаласына келіп, Қазақ мем­лекеттік қыздар педагогикалық университетінде төрт жыл білім алып, қызыл дипломмен тәмамдап, ғылым жолын таңдап, талай үміткердің арманы ҚазҰУ уни­верситеті­нің филоло­­гия және европа тіл­­дері факультеті магистратура бөлімінің мемлекеттік грант иегері атандым. Қазіргі уақытта соңғы бітіруші курсында білім алудамын. Осындай қиын жағдайда университеттің жоспарлан­ған жұмыс­тарына өзгеріс енгенімен, еш қиындықсыз қашықтықтан оқыту­ға көшті. Қашықтықтан оқыту жүйесін іске асыруда «Универ 2.0» және «Moodle» ақпараттық білім беру платформалары арқылы білім алудамыз. Кафедра оқытушылары өз­дерінің өмірдің қандай аумалы-төкпелі кезеңдері болса да, мүлтіксіз ғылы­ми түрде білім беру тоқтатылмай бір сарын­ды жүргізілуде. Онлайн режимде, конференция­лармен ғылыми жобаларға қаты­сып, жүлделі орындар алып, мақалалар жарық көруде. 

Өзім жайлы айтар болсам, ТМД елдерінің арасында «Жас ғалым — 2020» жобасына қатысып, (ғылыми жетекшім PhD ғылым докторы Кузембекова Ж. жетекшілігімен) 1 дәрежелі орынды иеленіп, «Жас ғалым — 2020» төсбелгісімен марапатталдым. Бұл менің жетістігім емес, ҚазҰУ-дың сапалы білімі мен білім беруші оқытушылардың жетістігі деп түсінемін. Қазіргі таңда ғылыми жетекшімнің жетекшілігімен магистрлік диссертация жазудамын. Еліміздің білім және ғылым саласына өз үлесімді қосу, азаматтық парызым. Университетімізге ұлы ғалым, ойшыл және энциклопедист есімі берілгеніне 30 жылдай уақыт болыпты. Ежелгі ата-бабаларымыздың тарихы мен мәдениетін үлгі ете отырып, студенттер мен жас ұрпақты отанға деген адалдық рухында тәрбиелеу үшін әл-Фараби есімінің маңызы аса зор. Болашақ жас түлек, армандаңыздар. Сол арманға жету мақсатында аянбай еңбек етуді де ұмытпағайсыздар!

Нүрилә Ермаханбет,
әл-Фараби атындағы Қазақ Ұлттық университеті филология және европа тілдері факультетінің 2 курс магистрі, ғылыми жетекшісі PhD ғылым докторы
Күзембекова Ж.Ж.

Поделиться ссылкой: