ЖҮЗ ЖЫЛ ЖЫРЛАҒАН ЖҮРЕК немесе аудандық «Жамбыл оқулары» байқауы мәресіне жетті

1 634 Views

Қазақ ауыз әдебиетінің көрнекті өкілі, көзі тірісінде «ХХ ғасырдың Гомері» атанған, жүз жыл жүрегімен жырлаған заманымыздың дүлдүлі Жамбыл жәкем тірі болса 175-ке келмек екен. Біз осы жария айтамыз деп, кейде жаңсақ кетеміз, Абайды «ұлы Абай» деп жүрміз. Егер Абай Құнанбаев тіріліп арамызға келсе: «Мен ұлы емеспін. Бәрімізді жаратқан Алла ұлы» дер еді деп ойлаймын. Әйтпесе бәріміз де бақыр басты пендеміз ғой. Жамбыл мен Абай жасы құралыптас заңғар тұлғалар екенінде дау жоқ.

Заманында жыр сүлейі Сүйімбайдан бата алып, қырғыз ақыны Құлманбетті жеңіп, Батыста соғыс өрті тұтанғанда «Ленинградттық өренім» атты патриоттық өлеңін жазып, әр жауынгердің намысын жанып, жауына деген кегін оятқан жыраудың оң аяғымен от басып тұрып айтқан әр шумағын бүгінгі ұрпақ жадында мәңгілікке сақтап қалды. Домбырасын қолтықтап жүріп ұлы қазақ даласына «Көроғлы», «Мұңлық пен Зарлық», «Шаһнама», «Қыз Жібек» сияқты дастандарды апталап, айлап жырла­ған бабамыздың ақындық өнері мен шығармашылығын кеңінен насихат­тау мақсатында аудандық мәдениет және тілдерді дамыту бөлімі мен ор­та­лықтандырылған кітапхана­лар жүйесі өткізіп отырған байқауды да сол поэ­зия піріне деген құрметтің бір парасы деп ұққанымыз абзал-ау.
Сонымен қазылар алқасы сайла­нып, ауданымыздың әр аймағынан келген он үш үміткер додаға түсті. Олар енді халық поэзиясының алыбы, КСРО Мемлекет­тік сыйлығының иегері, «Ленин», «Құрмет белгісі» ордендерін алған суырыпсалма саңлақтың салбуырын жырлары ту­ралы толғамдарын сахнаға шығармақ. Иә, бір ғасырға татитын ғұмырының 85 жы­лын ақындыққа арнаған алып туралы толғау айту оңай емес-ау. Дегенмен, мәдениет және тілдерді дамыту бөлімінің басшысы Рүстем Қуанышбекұлы Қырықбаев «Жамбыл оқулары» байқауының шымылды­­ғын ашып, үміткерлерге ақ жол тіледі. Байқаудың бірінші кезеңінде үміткер­лер «Жыр алыбы – Жамбыл» деген тақырыпқа эссе жазуы керек екен. Ал екінші тапсырма бойынша жыраудың бір өлеңін жатқа оқуы тиіс. Үшінші кезең бойынша байқауға қатысушы жыр дүлдүлінің шығармашылығы мен еліміздің Тәуелсіздігінің 30 жылдығын байланыстыра отырып, екі минуттық бейнеролик дайындауы керек.
Байқауға қатысып, барлық тап­сырмалардан сүрінбей өткен үміт­керлердің есімін төрешілер көп ке­шіктірмей анықтап, көрермендер алдында жария етті. Сонымен бас жүлде Қазақ ауылдық кітапханасы­ның оқырманы Аяулым Тұрғанбекке бұйырды. Бірінші орынды Луговой кітапханасының оқырманы Айжан Сералы, екінші орынды аудан орта­лығындағы кітапхана оқырманы Аружан Өсербаева, үшінші орынды Жарлысу ауылынан оқырман Дана Оразбек иеленді.
Атамыздан қалған өлең, жыр – асыл,
Ол – ақынның мәңгілік мол мұрасы.
Жақсы жырға шөлдегенде кей кезде,
Сусыныңды қандырып-ақ тұрасың, – демекші, артында мәңгі өлмейтін жыр қалдырған алып ақынның байқауы да жүрекке шуақ қондырып, өте шықты. Онда кітапхана қызметкері Нұршат Ерсайынның Ж.Жабаевтың «Отанды сүй» өлеңін мәнеріне келтіріп оқығаны, әнші Ерболат Құлышевтің орында­­­ған «Қазағым жаса» әндері өткізіліп отыр­­ған іс-шараға көркемдік әр беріп тұрғанын қалай көңілге ілік етпейсіз. Қалай десеңіз де, байқау жыршы ба­ба­мыздың шығармашылығын әр оқыр­­ман мен тыңдаушысының жүрегіне жа­лау етіп жеткізгені анық.

С.Қожеке.

Поделиться ссылкой: