Алаш аңсаған Азаттық

Ел Президенті Қасым-Жомарт Тоқаев «Тәуелсіздік бәрінен қымбат» атты мақаласында еге­мендігіміз бен елдігімізді айқын­дайтын басты бағыттарды атап, ірге­міздің мықты болуы үшін қа­жет шараларды көрсетіп бер­ген болатын.
Әсіресе, Қасым-Жомарт Кемелұлы «Таным мен тағы­лым» бөлімінде: «Біз ке­зін­де елге қызмет етудің озық үлгісін көрсеткен Алаш қайраткерлерінен тағы­лым аламыз. Олар өт­кен ғасырдың басында тәуел­сіз­дік идеяларын халық ара­сында дәріптеуге зор ең­бек сіңіріп, азаттық жо­лында құрбан болды. Тәуел­сіз­ді­гіміздің мерейтойы ая­сында осындай біртуар тұл­ғаларды еске алып, олар­дың мұрасын жастары­мызға және бүкіл әлемге паш етуіміз керек» деп Алаш арыстарының асыл мұрасын барынша игеруге нұсқау берді.
Зиялы қауымның өмір жолын, ел үшін жасаған елеулі еңбектерін, шығармашылығын, қызметін жас ұрпаққа таныстырып, кұрметтеуге үйретуде кітапханашылардың да қосар өзіндік үлесі бар. Себебі, түрлі кітап көрмелерін ұйымдастыру, ашық алаң, дебат, дөңгелек үстел сияқты іс-шараларды өткізу арқылы Алаш қайраткерлері туралы түсінік пен білімді жеткілікті деңгейде қалыптастыруға болады.
Сондай-ақ, ашық есік күндерін ұйымдастырып, оқушыны ізденуге, оқуға, жазбалар және материалдармен танысуға шақыру керек. Мысалы, осыдан 155 жыл бұрын Қазақ даласында өмірге келген Ұлт көшбасшысы Ә.Бөкейханов өмірінде сан алуан тақырыпта қалам тартып, ұрпақтарға ұшан-теңіз мұра қалдырған болатын.
Әлихан Бөкейхановтың мұрасы әр салаға арналған мыңдаған очерктер мен мақалалардан тұрады. Олар Ресей мен қазақ елінің барлық басылымдарында жарық көрді. Зерттеуші-ғалымның экономика, әдебиеттану, ормантану, ауылшаруашылық салаларына арнаған көптеген жазбалары сақталған. Бірақ, біртуар ғалымның төл қолжазбаларын табу өте қиын. Әйткенмен, өткен ғасыр басында күн-түн демей еңбек еткен қайраткердің әр басылымдағы еңбектері жинақталып, бүгінгі таңда бірнеше рет көптомдықтары жарық көргені белгілі.
Міне, осындай жинақтар, басылым беттеріндегі мақалалар, зерттеу жұмыстарының басын қосып, көрме жасап, оқушылармен таныстырып, оны оқуға шақырсақ, ең болмағанда бір оқушының бойындағы ұлттық сезімді, намысты оятар едік.
Біздің мектеп кітапханасында ел Тәуелсіздігінің 30 жыл толуына орай «Тәуелсіздігіміздің 30 жылдығына – 30 кітап» атты рухани-мәдени акциясы барысында кітап көрмесі қойылды.
ХХ ғасыр – қазақ тарихындағы ең елеулі кезеңдердің бірі. Бұл кезеңде елімізде белгілі бір жаңғыру болды. Ендігі мақсат – Алаш көсемдерін, олардың мұрасын өскелең ұрпаққа насихаттап, бойына сіңіру. Себебі, өткенін білмеген жастардың келешегі болмайды.

П. Иманкулова,
Ыбырай Алтынсарин атындағы шағын орталықты орта мектептің кітапханашысы.
Алғабас ауылы.

Поделиться ссылкой: