Токио Олимпиадасына жолдама иеленген еркін күрес шебері Әлішер Ерғали бүгінгі таңда елімізге танымал атақты балуандардың бірі. Ол ересектер арасында Қазақстанның 2 дүркін чемпионы деген атаққа ие болды. Әрине, біріншіден өзінің еңбекқорлығының арқасында осындай зау биікті бағындырып отыр. Газетіміздің тілшісі Марат Диханбай жақында 97 келі салмақ дәрежесінде белдесетін ұлттық құраманың белді мүшесі Әлішер Ерғалимен «Whatsapp» желісі арқылы сөйлесіп, сұхбат алған еді. «Аламан» айдарының 2021 жылғы алғашқы топтамасында әріптесіміздің сүбелі сұхбатын жариялауды жөн санадық.
– Әлішер, еркін күрестен ересектер арасында Қазақстанның 2 дүркін чемпионы атандың. Құтты болсын!
– Рақмет. Қазіргі таңда менің салмағымда елімізде еркін күрестен мықты балуандар өсіп келеді. Яғни, бәсеке бар. Солардың ішінен дараланып шығу әрине оңай емес. Бірақ менің қолымнан келді. Өз шеберлігімді көрсеттім деп ойлаймын. Ізгі ниеттерін білдіріп жатқан барлық жерлестеріме зор алғыс білдіремін.
– Ілгеріректе Алматы қаласының атынан жарыстарға қатысушы едің. Ел чемпионатында Жамбыл облысының намысын қорғадың. «Әлішер, туған өлкенің абыройын қорғайтын кез келді» деген ұсыныстар болды ма, сонда?..
– Бұл ой өзімді де көптен бері мазалап жүрген. «Туған елдей ел болмас, Туған жердей жер болмас» деуші ма еді. Сондықтан Лондон Олимпиадасының қола жүлде иегері, атақты балуан, маған тілеулес ағам деп айтсам да жарасады, Ақжүрек Таңатаров осы ұсынысты айтқанда, бірден келістім. Қазақ әлгі «Арық айтып, семіз шық» дейтін еді ғой. Алғашқы нәтижелер көңіл қуантарлық көрсеткішке ие. Дайындығымыз жоспарлы түрде жоғары деңгейде өтіп жатыр деп айта аламын. Дегенмен, адамның дегені емес, Алланың қалауы болады ғой. Бұйыртса жарақаттан аман болсақ, «Токио Олимпиадасында жазиралы Жамбыл өңірінің ғана емес, барша Алаш жұртының абыройын асқақтатсам» деген арманым бар.
– Өзіңмен әлеуметтік желіде сөйлесіп тұрамыз. Кейбір спортшылар сұхбат беруден бас тартып жатады. Ал, сен өйтпейсің. Бұл ауылда жетілген қазақ баласының қарапайымдылығы болар мүмкін…
– Солай шығар. Сіздің әріптестеріңіз, яғни журналистерге әрқашан сұхбат беруден жалтарған емеспін. Қойған сұрақтарына хал-қадірімше жауап беруге тырысамын. Сан мәрте жеңіс шыңын бағындырып, қанша атаққа кенелсек те, адамдық қалыпты сақтау мен үшін алғашқы орында тұратын қасиеттің бірі.
– «Еркін күреске қатысамын!» дегенде, ата-анаң қалай қабылдады. Әдетте, кейбір отбасылар «бір жеріңді майып қыласың» деп, баласына шектеу қойып жатады. Ондай сәттер орын алған жоқ па?
– Жоқ, біздің үйдегілер спортты жанындай жақсы көреді. Біз дастархан басына отыра қалсақ, әңгімеміз тек спорт тақырыбында өрбиді. Әкем мен қатысқан жарысты міндетті түрде келіп көреді. Өйткені, оның айтқан әрбір сөзі маған рух береді. Анам да әрдайым маған тілеулес. Үйдегілердің барлығы менің қолдаушыларым десем болады. «Спорт – денсаулық кепілі» ғой. Сондықтан оған аса бір қиғалаң салатындай негіз жоқ деп есептеймін.
– Ел астанасы Нұр-Сұлтанда күрес түрлерінен өткен әлем чемпионатында сәтті өнер көрсеттің. Ең бастысы, жолдама еншіледің. Сол додада ресейлік балуан Абдулрашид Садулаев жартылай финалда сені ұпай санымен ұтты. Күш жетпеді ме, әлде психологиялық факторлар әсер етті ме?
– Қарсылас сөзсіз мықты балуан. Абдулрашидтен ұпай алудың өзі қиын шаруа екенін жақсы білесіздер. Енді жастық жалынмен қателіктер жіберген шығармын. Күшім жетпеді деп айта алмаймын. Ол кезде 20 жаста болатынмын. Жұлқынып тұрған кез. Оның үстіне қарсылас әккі балуан. Тәжірибесі де мол. Ұпай санымен жеңіліп қалдым. Алайда, содан кейін «алдағы уақытта бозкілемде кездесіп жатсақ, қалайда жеңуім керек» деп өз-өзіме серт еттім.
– Әрине, өмірде ылғи жеңісті сәттер бола бермейді ғой, Әлішер. Жеңіліс адамды шыңдайды емес пе? Келесі сұрақты өзге арнаға бұрсам деймін. Бір әңгімелескенімізде «Олимпиада ойындарының үш дүркін жеңімпазы Бувайсар Сайтиев спорттағы кумирің екенін» айтқан едің. Атақты спортшымен кездесудің сәті түсті ме?
– Әрине. Мен жасөспірімдер арасында белдесіп жүрген кезімде, яғни 2016 жылы ол кісіні көрдім. Ресейде атақты балуанның құрметіне орай турнир ұйымдастырылған болатын. Сонда көрісіп, естелік суретке де түскен едім. Барлық жарысқа қатысушыларға ағалық ақылын айтып, тәжірибесімен бөліскен болатын.
– Қазіргі таңдағы жеке бапкерің Пернебек Беласар жөнінде сөз қозғайықшы. Әдетте, балуан жайлы ылғи жазылып, бапкерлер таса да қалып қойып жатады ғой. Солай болмас үшін, бапкердің де еңбегін атап өтсек…
– Пернебек ағай қай кезде болмасын, менің қолдаушым. Біз әрқашан біргеміз. Жарыстарға жиі қатысамын. Үй бетін көрмей кететін кезіміз көп. Пернебек ағай ылғи қасымнан табылады. Әкемдей болып кеткен жан. Менің осы биік белеске көтерілгенім ағайымның айтқан ақыл-кеңесі мен бапкерлік тәжірибесінің арқасы. Ағайымның маған артқан сенімін ақтаймын деп ойлаймын.
– Әлішер, сенің бойыңдағы бұла күшті, бозкілемде еркін көсілетін шеберлігіңді біз жақсы білеміз. Токиода бапкерлердің, қала берді мұқым елдің өзіңе артқан сенімін ақтап, Мемлекеттік Туымызды көкте желбіретесің деген ниеттеміз. Сұхбаттасқаның үшін алғыс білдіремін. Абыройлы бол!

Сұхбаттасқан Марат Диханбай.

«Құлан таңы» газетінің № 39 (7530) санында «Асық атудан жеңімпаз атанды» деген тақырыпта Әлихан Бөкейханов атындағы орта мектептің дене шынықтыру пәнінің мұғалімі әрі асық атудан №1 балалар мен жасөспірімдер спорт мектебінің жаттықтырушысы Ескендір Тегешовтың шәкірттерінің жетістігі туралы жазған едік. Ұлттық ойынымыз асық атудан облыстық чемпионатта үздіктердің үздігі атанған Есекеңнің шәкірттері ел чемпионатында да қарсыластарының алды болды. Әлижан Жосалы, Нұрсейіт Сәлімғазы есімді оқушылар өздеріне берілген жолдаманы сәтті пайдаланып, ел чемпионатынан да жүлделі I орынмен оралды.

Мемлекеттік қызметшілеріміз тұғыр биігінен көрінді

Таяуда ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Жамбыл облыстық филиалы мен облыс әкімдігі денешынықтыру және спорт басқармасының ұйымдастыруымен мемлекеттік қызметшілер арасында волейболдан облыстық турнир болып өтті. Аталмыш

турнирдің мақсаты- мемлекеттік қызметшілер арасында салауатты өмір салтын насихаттай отырып, бұқаралық спортты дамыту. Облыс аумағындағы барлық аудандардан өзге Тараз қаласының мемлекеттік қызметшілері қатысқан бұл додоға біздің волейболшыларды аудан әкімінің орынбасары Бейсенбек Әлпейісов бастап барды. Турнирге қатысқан 11 команданың ішінде мемлекеттік қызметшілеріміздің көрсеткен нәтижесі көңіл қуантты. «Тараз- Арена» спорт кешенінде өткен айтулы жарыста әкімшілік мемлекеттік қызметшілерден құралған командамыз жүлделі I орынды иеленді. Айта кетейік, алдағы уақытта турнирде жеңімпаз атанып, жүлдеге іліккен волейболшылардан команда жасақталып, мемлекеттік қызметшілердің кәсіби мерекесіне орай Павлодарда өтетін республикалық чемпионатта олар өңір намысын қорғайтын болады.

Жас таеквондошыларымыз жарап тұр

Балаларды қорғау күніне орай спорт кешенінде таеквондодан облыстық жарыс ұйымдастырылды. 8 бен 12 жас аралығындағы балалар арасында өткен аталмыш жарысқа ауданымыздың жас таеквондошыларынан бөлек, Шу, Қордай, Сарысу, Меркі және Тараз қаласынан 150-ге жуық спортшы қатысты. Жарыстың салтанатты ашылу рәсімін аудан әкімдігі денешынықтыру және спорт бөлімінің басшысы Ерлік Шабеев сөз сөйлеп, ашып берді. Одан кейін сөз сөйлеген №1 балалар мен жасөспірімдер спорт мектебінің директоры Ұланбек Омарбеков мерейлі мейрам қарсаңында ұйымдастырылып отырған жарыстың мәні мен мазмұнына тоқталып, қатысушыларға сәттілік тіледі.

Тартысқа толы болған жарыс қорытындысына сәйкес жалпы командалық есепте Тараз қаласының таеквондошылары жүлделі III орынға ие болса, жүлделі II орын Шу ауданының жеткіншектеріне бұйырды. Ал жүлделі I орын жарыс қожайындарының еншісіне жазылды.

Топтаманы дайындағандар: Жанерке ДҮЙСЕН,

Марат ДИХАНБАЙ.

Заңғар жазушы Мұхтар Әуезовтың «Ұстаз болу — өз уақытыңды аямай өзгенің бақытын аялау» деген сөзі бар. Қарақыстақ ауылының тұрғыны, зейнеткер ұстаз, бүгінгі біздің кейіпкеріміз Бауыржан Намазбаев осы сөзге әбден лайық азаматтың бірегейі.

«Фейсбук» әлеуметтік желісінен кейіпкеріміздің Ұлы Жеңістің 74 жылдығына орай Қарақыстақ ауылы мен Абай ауылындағы 10 шақырым аралық жолды жүгіріп өтіп, Ұлы Отан соғысы ардагерлерінің құрметіне қойылған ескерткішке келіп, бабалар рухына тағзым еткенін оқып едік. Жақын күндері Бауыржан ағамыз редакциямызда болды. Сөйлестік. Шіркін, ауданымызда Баукең секілді азаматтар көп болса ғой. Әңгімесі қандай керемет. Тыңдай бергің келеді…

Қыркүйек айында 70 жасқа толатын Бауыржан Мақұлбайұлының ізетті әрі кішіпейіл жан екенін сөз басында айттық. 70 жасқа таяған біраз кісілерді білеміз ғой. Ақиқатын айту керек, Баукең өз қатарластарынан әлдеқайда жас көрінеді. Өйткені, кейіпкеріміз спортты жанына серік еткен. Жүгіру – Бауыржан Мақұлбайұлының хоббиі десек болады.

«Несін жасырамыз, жастар жалқау қазір. Бос уақыттарын қалай тиімді пайдалануды білмейді. Олардың дені бос уақытын компьютерлік клубтарда өткізеді. Өз басым спорт адам баласына сергектік сыйлайды деп түсінемін. Мінеки, 70-ке таясамда спортты тастағам жоқ. Жүгіруден бөлек, күнде таңертең тұрып, 40-45 минут дене жаттығуларын жасаймын. П.К. Иванов ілімі бойынша таңғысын және кешкілік денеме 2 шелек су құйамын. Байқаймын, қазір жастарымыз ұялы телефонға әуес. Соған жұмсалған қайран уақыт-ай… Сондықтан жас буынға интернетке телміріп, ұялы телефонға көз салып отыра бергенше, спортпен айналысуға кеңес берген болар едім. Себебі, спорттың адам баласының денсаулығына тигізер көмегі зор» дейді кейіпкеріміз.

Тақырыпқа орай:

Намазбаев Бауыржан Мақұлбайұлы КСРО оқу ісінің үздігі. «Дене тәрбиесі және спорт саласын дамытқаны үшін» медалімен марапатталған. Одан өзге 50-ге жуық мақтау грамоталарымен алғыс хаттардың иегері. Сондай-ақ, ол республикалық «Ат спорты» журналының штаттан тыс тілшісі. Заманында волейбол мен баскетболдан қыздар бәсекесінде аудандық, облыстық жарыстарда оның шәкірттері үздіктердің үздігі болды. Тіпті республикалық додаларда да топ жарған кезі көп. Қазіргі таңда Бауыржан Намазбаевтың 16 шәкірті ұстаз өнегесін жалғастырып, денешынықтыру пәнінен дәріс беріп жүр.

Айғаным Азия чемпионы

№1 мектеп-лицейінің 10 сынып оқушысы Айғаным Мақсатқызы жақында Қордай ауданында панкратионнан өткен Азия чемпионатында алтын жүлде еншілеп, тұғырдың бірінші сатысына көтерілді. Айғаным аталмыш додада 4 кездесу өткізіп, барлық қарсыластарынан басым түсті. Алғашқы айналымда Алматы о б л ы с ы н а н к е л г е н с п о р т шыны жеңсе, екінші айналымда қордайлық аруды да техникалық нокаутпен ұтты. Жартылай финалда қарсылас атанған қапшағайлық бойжеткенді де қылқындыру әдісімен тізе бүктірді. Ал ақтық сында елордалық спортшыдан айласын асырып, жарыс жеңімпазы атанды. Жалпы Айғанымды спортқа баулып, шеберлігін шыңдап жүрген жаттықтырушысы Әлихан Бөкейханов атындағы орта мектептің денешынықтыру пәнінің мұғалімі, яғни, әкесі Мақсат Құлманов екенін жазып өткеніміз жөн. Өйткені, еркін күрестен спорт шеберіне үміткер Мақсат Қырғызбайұлының өз қызының толағай жетістікке қол жеткізуіне тигізген еңбегі мол. Бұған дейін Айғаным Мақсатқызы джи-джитсудан жасөспірімдер арасында Қазақстан чемпионы болған.

Топтаманы дайындағандар: Фарида ЖАҚСЫМБЕТ,

Марат ДИХАНБАЙ.

Ұлы Жеңістің 74 жылдығына орай Луговой желілік полиция бөлімінің ұйымдастыруымен Жанаділов Жеңіс Үмбетбайұлын еске алуға арналған бокстан 2007-2008, 2009-2010 жылғы жасөспірімдер арасында республикалық турнир өтті. Турнирдің ашылу рәсімінде аудан әкімінің орынбасары Бейсенбек Әлпейісов сөз сөйлеп, жарысқа қатысушыларды айбынды м е р е к е м е н қ ұ т т ы қ т а д ы . Одан кейін сөз сөйлеген кейіпкеріміздің ата-анасы Ү м б е т б а й а қ с а қ а л мен Бейсекүл апа, аудандық ардагерлер Кеңесінің төрағасы Қожайхан Бижанов, Л у г о в о й ж е л і л і к полиция бөлімінің басшысы, полиция м а й о р ы Ф а р х а т Мәжитұлы қызмет б а б ы н д а қ а н д ы қ о л қ а р а қ ш ы л а р д ы ң қ о л ы н а н қ а з а т а п қ а н Жеңіс Үмбетбайұылының шыншылдығы мен батырлығы турасында жүрекке ой салатын тағылымы мол сөздер айтты. Айта кетейік, турнирге Алматы, Түркістан, Ақтөбе, Жамбыл облыстарынан өзге Қырғызстан Республикасынан жас боксшылар келіп, қатысты. Турнирде жалпы жиынтығы 189 спортшы бақ сынады.

4 күнге созылған республикалық турнир өте тартысқа толы болды. Жарыс қорытындысына сәйкес жалпы командалық есепте Тараз қаласының боксшылары топ жарды. Жүлделі II орынға Шу ауданынан келген боксшылар ие болса, үздік үштікке медаль саны бойынша Ақтөбе облысы мен Қырғызстан мемлекетінің спортшылары енді.

ҚЫСҚА НҰСҚА

Жеңіс Жанаділов 1969 жылдың 9 мамырында Қарақат ауылында шаруа отбасында дүниеге келген. Октябрь шаруа орта мектебінің түлегі. 1988-1989 жылдары КСРО қарулы күштерінің қатарында әскери борышын өтеген. 1995 жылы Луговой станциясындағы желілік ішкі істер бөліміне «Есірткі бизнесіне қарсы күрес» бөлімшесінің жедел уәкілі болып қызметке орналасқан. Көңілге қаяу болатыны, Жеңіс Үмбетбайұлы 1996 жылдың 16 қыркүйегінде қылмыстық топты құрықтау кезінде қандықол қарақшылардың қолынан ерлікпен қаза тапты. 1996 жылдың 9 желтоқсанында оған Қазақстан Республикасының Тұңғыш Президенті Нұрсұлтан Назарбаевтың Жарлығымен «Ерлігі үшін» медалі

Әлихан Бөкейхан атындағы орта мектептің дене шынықтыру пәнінің мұғалімі әрі асық атудан №1 балалар мен жасөспірімдер спорт мектебінің жаттықтырушысы Ескендір Тегешовтан тәлім алатын Әлижан Жосалы, Нұрсейіт Сәлімғазы, Нұрасыл Әмірбек есімді жеткіншектер ұлттық ойынымыз асық атудан таяуда Тараз қаласында өткен облыстық чемпионатта жүлделі I орынға ие болды. Осылайша, оларға ел чемпионатына қатысуға жолдама беріліп отыр. Алдағы уақытта есімдері аталған оқушылар жасөспірімдер арасында өтетін ел біріншілігінде бақ сынайтын болады.

Марат ДИХАНБАЙ.

Алматыдан бас жүлдемен оралды

Мұқан Төлебаев атындағы балалар музыка мектебінің вокал сыныбының жетекшісі Лескүл Жиенбетовамен Қарақыстақ ауылында балалар бақшасы ашылған сәтте танысқан едік. Лескүлдің фортепиано аспабында керемет ойнайтынын көріп, тамсанып қол соққанбыз сонда. Түрлі тақырыптардағы аудандық ән байқаулардың басы-қасында Лескүл міндетті түрде жүреді. Осылайша, ол үнемі талантты жасөспірімдерді өз сыныбына қабылдап, өнерін шыңдайды. Жуырда бір кездескенімізде Лескүл атақты балет бишісі Мая Плисецкаяның «Кім көп жұмыс істесе соның күші көбейеді. Егер мен бір күн жұмыс істемесем оны өзім сезінемін, екі күн жұмыс істемесем әріптестерім сезіп қояды, ал үш күн жұмыс істемесем жұрттың бәріне көрініп тұрады» деген сөзін өмірлік қағидаларының біріне балайтынын айтқан-ды. «Ауырдың астымен, жеңілдің үстімен» жүріп, нәпақа алып отырғандардың көбі осылай еңбек етсе ғой, шіркін.

Жуырда Алматы қаласындағы Жазушылар Одағының ғимаратында «Ханшайым Эвент» продюсерлік орталығының ұйымдастыруымен «Жас жұлдыз» атты республикалық байқау өткен еді. Осымен VI рет өткізіліп отырған аталмыш байқауға Мұқан Төлебаев атындағы балалар музыка мектебінде вокал сыныбынан дәріс беретін Лескүл Жиенбетованың қос бірдей шәкірті Диляра Рықсыбай мен Нұрсұлтан Мұратұлы қатысып, бас жүлде иегері атанып отыр. Бұл б а й қ а у д ы ң қ а з ы л а р а л қ а с ы н ы ң қ ұ р а м ы н д а е с і м і е л г е б е л г і л і композитор әрі әнші Өктем Алтаев та болған екен. Аталмыш конкурста Нұрсұлтан «Гиккай» әнін орындап, көрерменнің ыстық ықыласына бөленген. Өздерінің рухты әндерімен жастың да, жасамыстың сүйіктілеріне а й н а л ы п ү л г е р г е н « А л а ш ұ л ы » тобының репертуарынан ән шырқаған Диляраның ән орындау шеберлігіне қазылар алқасы да, залға жиналған көпшілік те ерекше қол соғыпты. Талантты жасөспірімдердің алар асуы биік болсын дейміз. Лескүлдің қос бірдей шәкірті есті әндер шырқап, аудан мақтаныштары Досымжан Таңатаров пен Гүлмира Ақүрпекова сынды аға-әпкелерінің ізгілікті жолын жалғастырады деп сенеміз.

P S : Б і з « Х а н ш а й ы м Э в е н т » п р о д ю с е р л і к о р т а л ы ғ ы н ы ң директоры, республикалық «Жас жұлдыз» байқауының қолдаушысы әрі ұйымдастырушысы Ерсұлтан Адырбекпен ұялы телефон арқылы сөйлесіп, Диляра Рықсыбай мен Нұрсұлтан Мұратұлының әншілік шеберлігі жайында пікірін білдік.

«Хакім Абайдың «Әртіс – кісі болмысына енетін өнер» деген сөзі бар. Өз басым біздің тараптан ұйымдастырылған кез келген байқауда жасөспірімдердің шеберліктерін осы тұрғыдан қадағалаймын. Сондағы менің байқағаным, киелі Құлан жерінен қатысқан әрбір өнерпаз міндетті түрде өзге қатысушылардан жоғары деңгейде өнер көрсетеді. Оған дәлелді алыстан іздеудің еш реті жоқ меніңше. Жақында ғана «Жас жұлдыз» байқауында қос бірдей бас жүлде еншілеген Диляра және Нұрсұлтан есімді шәкірттерді айтсақ жарасады. Қандай дауыс. Не деген энергия. Тұнып тұрған талант қой расымен де. Осындай жарқын дауысты шәкірттерге қолдау көрсетіп, әншілік өнерін шыңдап жатқан аудандарыңыздағы мәдениет ошақтарының басшылары мен ұстаздарына шексіз алғысымды білдіргім келеді» дейді ол.

Марат ЖОЛДАСБЕКҰЛЫ.

АУЫСПАЛЫ КУБОКТЫҢ ИЕГЕРІ АНЫҚТАЛДЫ

Жақында №5 шағын орталықты орта мектептің спорт залында Көгершін ауылдық округі әкімшілігінің ұйымдастыруымен мемлекеттік қызметшілер және мемлекеттік мекеме қызметкерлерінің арасында кіші футболдан аудандық жарыс өтті. Жарыстың ашылу рәсімінде Көгершін ауылдық округінің әкімі Абай Төреқұлов сөз сөйлеп, аталмыш доданың негізгі мақсатына тоқталды. Содан соң, жарысқа қатысуға тіркелген 10 команда екі топқа бөлініп, доданың көркін қыздырды.

Осылайша, өз топтарынан іркілмей өткен 4 команда анықталды. Олар: аудан әкімдігінің бөлімдері, Өрнек және Қайыңды ауылдық округі (Қайыңды, Ақыртөбе, Тереңөзек ауылдық округі әкімшіліктерінен құралған қоманда осылай аталды ) мен жастар ресурстық орталығының қызметкерлері. Жартылай финалда өрнектіктер аудан әкімдігінің бөлімдерінен құралған жігіттерге есе жіберсе, қайыңдылықтар жастар ресурстық орталығы қызметкерлерінен ұтылып қалды. Жүлделі III орын үшін болған ойында жігерлілік таныта білген өрнектіктер қарсыластарын қапы қалдырып, қола медальға ие болды. Ал финал өте тартысқа толы болды деуге толық негіз бар. Санаулы секундтар қалған сәтте Ерболат Жәдік есеп ашып, жастар ресурстық орталығын алға жетеледі. Ерболат соққан «гол» матч соңына дейін сақталды. Осылайша, Көгершін ауылдық округі әкімшілігінің жылжымалы кубогын аудандық жастар ресурстық орталығының командасы жеңіп алды. Алдағы уақытта бұл жарыс өз жалғасын табатын болады.

Марат ДИХАНБАЙ.

ЕДІЛБЕКТІҢ ЕНШІСІНДЕ II ОРЫН

№1 балалар мен жасөспірімдер спорт мектебінде бокс жаттықтырушысы болып еңбек ететін Еділбек Тайлақов 2018 жыл өзі үшін табысты болғанын айтады. Ол ит жылы Бішкек қаласында өткен 42 шақырымдық марафон жарысында жүлделі III орынды иеленді. Бұдан соң, Шымкент қалалық денешынықтыру басқармасының ұйымдастыруымен өткен «Шымкент марафон 2018» атты жарыста тағы да үздік үштікке енді.

Жақында Қарағанды қаласында ө т к е н х а л ы қ а р а л ы қ « I X ULTRAMARATHON» жарысында Еділбек Тайлақов жүлделі II орынға ие болды. Осылайша, Жаңа жылды бокс жаттықтырушысы жарқын жетістікпен бастап отыр. Қарағандыдағы доданың қалай өткендігі турасында Еділбектен блиц-сауал алған едік. Жауабы төмендегідей.

-Мен аталмыш жарыста 18 бен 45 жас аралығындағы категорияда бақ сынадым. Бұл додаға Қазақстанның барлық аймақтарынан марафоншылар келіп қатысты. Жарыс өте жоғары деңгейде ұйымдастырылды дей аламын. 31 адам қатыстық. 100 шақырымды 12 сағатта жүгіріп өттім. 2018 жылдың желтоқсан айында Астана қаласында өткен қыстық марафон жарысында сәттілік жолдас болмап еді. Спортта барлығы алма кезек қой. Ең бастысы, Жаңа жылды сәтті бастадық. Алда жеңісті күндер көп болады деген ойдамын,-дейді бокс жаттықтырушысы. Жалпы, былтыр өзі қатысқан сегіз доданың бесеуінде жүлдегерлер тізіміне енген Еділбек Тайлақовтың табандылығына қол соқпасқа амал жоқ. Қайсарлық деген осы емес пе?..

ЖЕЛАЯҚ БОЙЖЕТКЕН

Жуырда ел аумағындағы ірі мегаполистердің біріне баланатын Шымкент шаһарында жеңіл атлетикадан республикалық жарыс болып өтті. Айта кетейік, мұнда жүлдеге іліккендер таяуда Өскемен қаласында өтетін ел чемпионатына қатысу құқығын иеленеді. Сондықтан болар, Шымкенттегі бәсекеге жасөспірімдер арасында жүзден жүйрік атанып жүрген мықтылар қатысты. Солардың қатарында Қарақыстақ ауылындағы Бауыржан Момышұлы атындағы орта мектептің 10 сынып оқушысы Елена Хуголь де бар.

Өткен жылы Алматыда ұйымдастырылған Қазақстан Республикасының Тұңғыш Президенті -Елбасы тестілерінде барлық қарсыластарын басып озған Лена Шымкенттегі бәсекеден де олжамен оралып отыр. Алматыда 60 метр қашықтықта алдына жан салмаған Елена Шымкентте тұғырдың екінші сатысынан қол бұлғады. Яғни, жарыстың II орын жүлдегері атанды. Ал 200 метр қашықтыққа жүгіру сынында Лена үздік үштіктің қатарынан көрінді. Осы жүлдесі Елена Хугольге жақын күндері өтетін ел чемпионатында бақ сынауға мүмкіндік береді. Ал ел біріншілігінде жүлде алып жатса, Азия чемпионатына қатысуға жолдама еншілейді. Ленаға сәттілік жолдас болсын дейміз.

Тақырыпқа орай: 7-сыныптан бастап жеңіл атлетикамен айналысатын Елена Хуголь 2017 жылы облыстық «Ауыл ойындары» спартакиадасында ұзындыққа секіруден, сондай-ақ, жүгірудің 100 және эстафеталық кезеңінде қомандаластарымен бірге топ жарып, жарыс жеңімпазы атанған. Былтыр Қырғызстанның астанасы Бішкек қаласында жүгіруден Сеул олимпиадасының чемпионы Мария Пинигинаның есімін жастарға насихаттау мақсатында өткен халықаралық жарыста 200 және 400 метр қашықтықта күміс медаль жеңіп алған. «Тұрар Рысқұлов ауданына – 80» жыл атты мерекелік медальдің иегері.

Марат ДИХАНБАЙ.

Нұрдәулет – турнир жеңімпазы

Жуырда Маңғыстау өңірінде жасөспірімдер арасында еркін күрестен Ақтау қаласының 55 жылдығы мен қоса ҚР еңбегі сіңген жаттықтырушы Магомед Расуловты еске алуға арналған республикалық ашық турнир болып өтті. IX мәрте ұйымдастырылып отырған аталмыш турнирге Қазақстанның әр өңірлерінен өзге Дағыстан мен Өзбекстан елдерінің жасөспірім балуандары да қатысты. Каспий жағасында орналасқан курортты қаладағы бәсірелі жарыста Мәди Абиловтан тәлім алатын Қаныш Сәтпаев атындағы орта мектептің 6 сынып оқушысы Нұрдәулет Бекмұханбет те бақ сынаған еді. 38 келі салмақ дәрежесінде белдескен жаңатұрмыстық өреннің өнерін жанкүйерлер жоғары бағалапты. Ол осы турнирде 6 кездесу өткізіп, барлық қарсыласынан айласын асыра білді. Нұрдәулет жартылай финалда 38 келіде жасөспірімдер арасында Өзбекстанда қарсылас шақ келтірмей жүрген Муратжон Юлдашевпен кездескен. Қанша мықты болса да, Муратжон біздің Нұрдәулеттен соқыр ұпай ала алған жоқ. Есеп 4:0. Ал ақтық кезеңде дағыстандық Аликбер Тагировты 5:3 есебімен ұтып, жасөспірім балуанымыз турнирдің жеңімпазы атанды. Айта кетейік, бүгінгі таңда Мәди Абиловтың қол астында 60-қа жуық жасөспірім балуан жаттығу үстінде.

  Ел біріншілігінен қола жүлдемен оралды

Жуырда 2003-2004 жылғы жасөспірім ұлдар арасында волейболдан Павлодар қаласында ел чемпионаты өткен болатын. Осы айтулы біріншілікте облыс намысын қорғаған «Тараз» командасы үздік үштікке еніп, жарыстың қола жүлдегері атанды.

Қазақстан біріншілігінде тараздықтар сапында өзіндік ойын өрнегімен дараланған Нұргелді Әлібек біздің ауданның тумасы. Ол Әлихан Бөкейханов атындағы орта мектептің денешынықтыру пәнінің мұғалімі Ахмет Молдашевтан тәлім алған. Нұргелді әлі жас спортшы. Сондықтан, бапкерлер оның болашағынан зор үміт күтіп отыр.  

5 оқушымыз спорт шеберіне үміткер

№1 балалар мен жасөспірімдер спорт мектебінің жаттықтырушысы Ұлжан Мұраталиеваның шәкірттері Мая Тұрсыналы, Әсем Алқадыр, Жасмина Наурызбай, ағайынды Амина және Алия Әлилер таяуда тоғызқұмалақтан Тараз қаласында өткен командалық чемпионатта топ жарды. Зор мақтанышпен айта кетерлігі, жасөспірім қыздар жай жеңімпаз атанып қана қойған жоқ. Барлығы да қазақтың ұлттық ойыны саналатын тоғызқұмалақтан «Спорт шеберіне үміткер» деген атаққа ие болды. Дәл осындай жетістік ауданымызда бұрын-соңды болмаған екен. Ендеше, жасөспірімдерді спортқа баулып, олардың бос уақытын тиімді пайдалануына айтарлықтай үлес қосып жүрген еңбекқор жаттықтырушы Ұлжан Мұраталиева мен оның шәкірттеріне әрқашан сәттілік жолдас болсын дейміз.

Топтаманы дайындаған

Марат ДИХАНБАЙ.