Кітап оқып, рухани әлемімізді дамытайық…
33 Views
Облыс әкімі Ербол Шырақбайұлы Қарашөкеевтің
бастамасымен жүзеге асып жатқан «Кітап оқитын
ұлт» жобасы аясында аудандық орталық кітапхана
халық арасында кітап оқуды насихаттап, рухани
құндылықтарды дәріптеу бағытында жұмыс жүргізіп келеді.
Жоба аясында Халық банкінде «Әлем әдебиетінің жауһарлары» атты көшпелі кітап көрмесі ұйымдастырылды.
Көрменің мақсаты – оқу мәдениетін дамыту, әлем әдебиетінің үздік туындыларын таныстыру, қазақ
тіліндегі сапалы аударма кітаптарды
насихаттау және жастардың кітапқа қызығушылығын арттыру.
Көрмеге әлем әдебиетінің таңдаулы шығармалары қойылды. Экспозиция «Ежелгі дәуір мен Шығыс классикасы», «Батыс Еуропа және Америка әдебиеті»,
«Қазақ тіліне аударылған әлемдік бестселлерлер» сияқты бөлімдерге бөлініп, оқырманға кең таңдау ұсынылды.
Әлем әдебиеті – адамзаттың рухани тәжірибесі мен ой қазынасының көрінісі. Бұл шығармалар оқырманды әр дәуір мен мәдениетке жетелеп, адамгершілік,
ізгілік, білім мен өмір мәні туралы ойлануға жетелейді. Әсіресе әлемдік бестселлерлердің қазақ тіліне аударылуы – отандық әдеби қорды байытып,
оқырманның жаһандық әдебиетпен еркін
танысуына жол ашып отыр.
Мұндай көрмелер – оқырман мен кітапхана арасын жалғайтын маңызды алаң. Келушілер өз талғамына сай кітап таңдап, жаңа авторлармен танысып, әдеби әлемге жақындай түседі. Бұл жас ұрпақтың ой-өрісін кеңейтуге де ықпал етеді.
Кітап оқу – тек бос уақытты өткізу емес, ойлау қабілетін дамытып, рухани дүниені байытатын маңызды мәдени
әдет. Сондықтан «Кітап оқитын ұлт» жобасы аясындағы бастамалардың мәні зор.
Кітапқа құштар ұрпақ – білімді әрі бәсекеге қабілетті қоғамның негізі. Сапалы кітапқа қолжетімділік – елдің
ертеңіне салынған инвестиция.
Кітап оқиық, ойымызды байытайық, рухани әлемімізді дамытайық!
Лаура Жарылқасынқызы,
кітапханашы.