Жалақы мөлшері артады

437 Views

Мемлекет басшысы Қасым-Жомарт Кемелұлы Тоқаевтың «Әділетті мемлекет. Біртұтас ұлт. Берекелі қоғам» атты кезекті халыққа Жолдауын мұқият тыңдадым. Соңынан газет бетінде жарияланған нұсқасын тағы да бір қайталап маңызды мәселелерді астын сызып оқып шықтым.
Ел Президенті Жолдауда алдағы уақытта жүзеге асуы тиіс реформалардың 5 бағдарын ұсынды. Жаңа экономикалық саясат, оның ішінде жеке кәсіпкерлікті қолдау, бәсекелестікті дамыту, салық мәселелері, жер қойнауын игеру ісіне инвестиция тарту, сондай-ақ, әлеуметтік саясатты жетілдіру, мемлекеттік басқару ісін қайта жаңғырту мен заңның үстемдігін қамтамасыз ете отырып, тәртіп орнату мәселелері Жолдауда айқын көрініс тапқан. Мені білім беру жүйесіне ерекше көңіл бөлінгендігі қуантты.
Заңғар жазушымыз Мұхтар Әуезовтың «Ел боламын десең, бесігіңді түзе» де­ген ұлағатты сөзін келтіре отырып, білім сала­сындағы түйткілді мәселелерді ал­дағы уақытта шешу жолдарын көрсетті. «Балаларды балабақшамен қамтамасыз ету мәсе­лесін түпкілікті шешу қажет. Оған қоса, тәрбиешілердің әлеуметтік мәртебесін арттырып, жалақысын көбейту керек» деген сөзі әрине барша балабақшаларда жұмыс істеп жүрген қызметкерлерді бір серпілтіп тастағаны сөзсіз.
Ұлт сапасын жақсарту ісінде білім сала­сының орны айрықша екендігін еске салған Мемлекет басшысы «Әрбір оқушының білім алып, жан-жақты дамуына қолайлы жағдай жасауымыз керек» – деп атап көрсетті. Осы мақсатта «Жайлы мектеп» ұлт жобасы қолға алынғандығы осы салаға тың серпін береді деп ойлаймыз. Тұрмысы төмен отбасы балаларына мектеп формасын бюджет есебінен алып беру туралы ойы да көңілімізден шықты.
Жолдауда айтылған білім саласындағы жоспарланған реформалар да жоғары оқу орындарының білім саласының артуына тікелей септігін тигізетіндігіне тоқталып өтті. Студенттерді жатақханамен қамтамасыз етудің маңыз­дылы­ғын атап көрсеткен Президентіміздің бұл шешімі әрбір ата-ана үшін қуантарлық жайт.
Осының бәрі өзі айтқандай, балалардың білім алуына салы­натын инвестиция деп есептеуіміз қажет.

Ербол ӘБУТӘЛІПОВ,
аудандық мәслихат
хатшысы.

Поделиться ссылкой: