Жамбыл облысында меритократия қағидатымен 160 мемлекеттік қызметшінің лауазымы жоғарылаған

Жамбыл облысында кадрлық саясатты жүзеге асыруда Мемлекет басшысы Қасым-Жомарт Тоқаевтың тапсырмасына сәйкес, меритократия және кәсібилік қағидаттарына айрықша назар аударылуда. ҚР Президенті өз сөзінде «Мемлекеттік қызметке нақты сектордан меритократия және ашық бәсекелестік қағидаттарына сай іріктеуден өткен жаңа басқарушы азаматтарды аламыз», – деп атап өткен болатын.

Айталық, өткен жылдың кейінгі тоғыз айында (сәуір-желтоқсан) өңірдің жергілікті атқарушы органдарына барлығы 470 тағайындаулар жүргізілген. Есепті кезеңде жоғары тұрған лауазымдарға төменгі лауазымдардағы мемлекеттік қызметкерлер қатарынан конкурстық негізде жылжыту және заңнамаға сәйкес басқа да тағайындаулар бойынша меритократия қағидатын нығайту қамтамасыз етілді. Жоғары тұрған лауазымдарға ауысқан қызметкерлердің орташа жасы – 36,9.

Бұл ретте, жергілікті атқарушы ор­ган­дар бойынша лауазымдық өсу – іскер­лік қасиеттерге негізделе отырып, мери­тократия қағидаты арқылы 160 мемле­кеттік қызметші (33,8%) жоғары тұр­ған лауазымдарға орналасты. Олар­дың қатарында аудандық деңгейде салалық бөлім басшылықтан аудан әкімінің орынбасарлығына көтерілген Рақымғазы Куньязов (Жуалы), Нұрсұлтан Нәрікбаев (Меркі), Бақыт Бетбаев (Шу) бар. Сондай-ақ, облыстық деңгейдегі облыс әкімі аппараты басшысының орынбасары, облыс әкімі аппаратының бес бөлімінің басшысы, бес басқарма басшысы және сегіз басқарма басшысының орынбасары да осы тізімде.
Атап өту керек, өткен жылдың сәуір айынан бүгінге дейін 5 басқарма басшысы және облыс әкімі аппараты басшысының бір орынбасары аудан әкімі лауазымына тағайындалды. Олар: Меркі ауданының әкімі болған Жорабек Баубеков, Жуалы ауданының әкімі болған Жалғас Мұртаза, Т.Рыс­құлов ауданының әкімі болған Ернар Есіркепов, Талас ауданының әкімі болған Нұрбол Жүнісбеков, Қордай ауданы­ның әкімі болған Бекзат Болатбеков, Шу ауданының әкімі болған Бақытжан Жәнібеков.
Осы орайда облыстық деңгейде тәжірибе жинаған кадрлардың әлеуетін аудандардағы мәселелерді шешу, тұр­ғындардың тұрмыс-тіршілігін арт­тыру бағытындағы жұмыстарға жұмсауға мүмкіндік беріліп отыр.
Ал, бұған дейін Шу ауданының әкімі болған Сәкен Арубаев ҚР Парламенті Сенатының депутаты болып сайланса, Талас ауданының әкімі Қанатбек Мәді­бек облыс әкімінің орынбасары, Т.Рысқұлов ауданын басқарған Ерболат Садырқұлов облыс әкімінің кеңесшісі лауазымдарына тағайындалды.
Бұдан бөлек, облыстың 3 ауданын және Тараз қаласын басқарған об­лыс әкімінің орынбасары Нұржан Кален­деров облыс әкімінің бірінші орын­басары лауазымына көтерілді.
Сонымен қатар, республикалық дең­гей­де ұзақ жылдар тәжірибе жина­ған кадрларды өңірге тартуға ісі де на­зардан тыс қалған жоқ. Біркездері облыс­тың әлеуметтік-саяси саласында, кейін­нен осы бағытта ҚР Ақпарат және қоғамдық даму министрлігінде қызмет еткен Еркін Үйсімбаев, орталық мемле­кеттік органда жұмыс атқарған Ерболат Ибрайханов та облыс әкімінің орын­басары қызметіне келді. Бұл қатарда Астана, Алматы қалаларында қызмет етіп келіп, мемлекеттік сәулет-құрылыс бақылау басқармасының басшысы – бас мемлекеттік құрылыс инспекторы болып тағайындалған Қайрат Бисем­баев, облыстық дене шынықтыру және спорт басқармасының басшысы Арман Таш­метов та бар.
Сол секілді, жергілікті ішкі кадр­лардың жоғарылауына да айрықша ден қойылған. Оған денсаулық сақтау, жұмыспен қамтуды үйлестіру және әлеуметтік бағдарламалар, автомобиль жолдары және жолаушылар көлігі басқармаларына жаңадан тағайын­дал­ған басшыларды мысалға келтіруге болады. Бұлардың барлығы бұған дейін осы салада басқарманың бөлім бас­шы­сы, аудандық бөлім басшысы қыз­меттерінде еңбек етіп келген.
Жалпы, облыстық деңгейдегі кадр­лық ауыс-түйістердің ешбірі де негізсіз емес. Олардың бір мысалы ретінде мемлекеттік сатып алу сала­сындағы жұмыстардың нәтижесіз және орын алған кемшіліктердің сал­дарынан тиісті басқарма басшы­сының қызметінен босатылуын атап өтуге болады. Сонымен қатар, ауыл шаруашылығы басқармасының бас­шысы Ербол Жиенқұлов ауылдық жерде тәжірибе жинақтау үшін аудан әкімінің орынбасары лауазымына ауысты. Ал, жастар саясаты мәселелері басқармасының бұрынғы басшысы өз еркімен жұмыстан босатылып, Ш.Мұртаза атындағы ХТИИ тәрбие жұмы­сы және жастар саясаты басқармасының басшысы болып тағайындалды.
Қорыта айтқанда, меритократия қағи­датына негізделген бұл бағыттағы жұмыстар ағымдағы жылы өз жал­ғасын тауып келеді. Жуырда ғана Тараз қаласы әкімдігінің ішкі саясат бөлімінде ұзақ жылдар бойы нәтижелі еңбек еткен Улана Сламбекованың облыстық ішкі саясат басқармасының басшысы лауазымына тағайындалуы соның дәлелі.

Жамбыл облысы әкімінің баспасөз қызметі.

Поделиться ссылкой: