Көп қолдаса, тірлік алға басады
348 Views
Аудан әкімінің бекітілген кестеге сәйкес жоспарланған халықпен кездесуі – Луговой ауылында өтті. Хабардарсыздар деп ойлаймыз, сәрсенбі күні Астанада ел
Президентінің төрағалығымен еліміздің әлеуметтік-экономикалық даму мәселелері жөнінде кеңейтілген кеңес өткен болатын. Оған аудан әкімдері де қатысты.
Сол себепті Луговой ауылдық мәдениет үйінің залында өткен кездесуде аудан әкімінің орынбасары, әкім лауазымының уақытша міндетін атқарушы Ерғазы Еспенов луговойлық тұрғындарға ауданда атқарылып жатқан толайым тірліктерді баяндады. Бір жақсысы, жиналыста көп сөз болған жоқ. Қазір көпке созылған жиналыстан жұрттың да дегбірі қашатын болған. Сондықтан Ерғазы Жұмабекұлы ауданда қандай тірліктер атқарылып жатқанын қысқа әрі нұсқа баяндап, нақты көрсеткіштерді жіпке тізіп берді. Ал «Луговой ауылында биыл қандай істер атқарылмақ?» Міне, Ерғазы Жұмабекұлы осы жайтқа көбірек тоқталды.
2023 жылы Луговой ауылдық округіне 155,5 миллион теңге қаражат қарастырылып отыр екен. Бұл қаражат мына жұмыстарға жұмсалмақ. Айталық, Луговой ауылындағы Тоқтар Әубәкіров атындағы орта мектептің күрделі жөндеу жұмыстарына жобалық-сметалық құжат әзірлеуге 500 мың теңге, мәдениет үйі ғимаратын күрдеу жөндеу жұмыстарына 44,9 миллион теңге, Еңбекші көшесін орташа жөндеуге 9,4 миллион теңге, ауылдағы ауыз су құбырларын және мұнараларын жыл бойына жөндеу жұмыстарына 15,8 миллион теңге, Пушкин көшесіне жарықшам орнатуға 6,6 миллион теңге, Ә.Райқұл көшесіне жарықшам орнатуға 5,7 миллион теңге, Кең дала көшесіне электр желісін тартуға 7,5 миллион теңге, «Стрит воркаут» пен теннис үстелдері бар шағын футбол алаңын орнатуға 12,7 миллион теңге, саябаққа, аллеяға гүл, ағаш көшеттерін және көгал шөптерін отырғызуға 1,6 миллион теңге, ауылдағы көше атауы және үй нөмірі жазылған аншлагтарды ауыстыру жұмыстарына 2,4 миллион теңге, «Өңірлерді дамытудың 2025 жылға дейінгі» бағдарламасы бойынша Тұрар Рысқұлов атындағы мектеп-лицейінен Қ.Әбіқұлов көшесіне дейін жаяу жүргіншілер жолын салуға, ұзындығы 600 метр, 9,4 миллион теңге бөлініп отыр. «Сұрақ-жауап» кезеңінде «Луговойлықтар осы жұмыстардың барлығы сапалы жүргізілсе?» деген мәселені көтерді. Өз кезегінде Ерғазы Жұмабекұлы әр ауылдық әкімдікте қоғамдастық мүшелері жұмыс жасайтынын тілге тиек етіп, сол арқылы луговойлықтар да құрылыс жұмыстарының сапасын бақылауға ала алатынын айтты.
Марат Диханбай.