ГРУЗИЯДАН АЙЛАСЫН АСЫРА АЛМАДЫ

 Ұлттар лигасындағы соңғы кездесуін Қазақстан ұлттық құрамасының футболшылары сырт алаңда Грузия елінің аяқ допшыларымен өткізіп, 2:1 есебімен жеңіліп қалды. Шыны керек, Борис Пайчадзе атындағы «Динамо-Арена» стадионында өткен қос қарсыластың қарымта матчы тартысқа толы болды. Болгар маманы Станимир Стойлов жаттықтыратын ұлттық құраманың жігіттері барын салып ойнады. Алайда, «Қайрат» футбол клубының экс-бапкері Владимир Вайстан тәлім алатын грузиялықтар бұл жолы да сәтті ойын өрнегін көрсетіп, қарсыластарға еш мүмкіндік берген жоқ. Ойын барысындағы алғашқы гол грузиялықтардың еншісіне жазылды. Яғни, матчтың 59-минутында Георгий Меребашвили гол соғып, таблодағы есепті 1:0-ге өзгертті. Георгий Чакветрадзе қонақтардың қақпасына екінші голды соққан сәтте қазақ жанкүйерлерінің көкейінде үміттен гөрі күдіктің басымырақ болғаны жасырын емес. Дегенмен, Роман Мұртазаевты алмастырған Оралхан Өміртаев ойынның 90-минутында есепті 2:1-ге қысқартты. Отандастарымыз қанша мәрте шабуылға иек артқанымен грузиялық футболшылар сәтті қорғана білді. Артынша матчтың бас төрешісі португалиялық Тьягу Мартинштың да ысқырығы естілді. Нәтижесінде, турнир қорытындысы бойынша Қазақстан құрамасы өз тобында 6 ұпаймен 2 орынға жайғасты. Тбилисидегі жасыл алаңға Станимир Стойлов мынадай құрамды шығарды. Қақпашы: Дмитро Непагодов, қорғаушылар: Абзал Бейсебеков, Сергей Малый, Юрий Логвиненко, Гафуржан Суюмбаев және тірек қорғаушы (опорник) Исламбек Қуат. Жартылай қорғаушылар: Серікжан Мұжықов, Максим Федин, Бахтиор Зайнутдинов, Роман Мұртазаев,(Оралхан Өксікбаев). Шабуылшылар: Алексей Щеткин (Юрий Перцух).

Марат ДИХАНБАЙ.

Поделиться ссылкой: