Тазалық жұмыстары жүргізілді
144 Views
Мемлекет басшысы Қасым-Жомарт Тоқаевтың бастамасымен республика көлемінде қолға алынған «Таза Қазақстан» акциясы жарияланған күннен бастап, ауданда «Таза өлке», «Киелі мекен», «Жасыл аймақ», «Өнегелі ұрпақ» және «Мөлдір бұлақ» апталықтарында аумақтарды абаттандыру, көгеріштендіру және арықтар мен бұлақ көздерін ашу сынды іс-шаралар жүргізілген болатын. Бұл жұмыстар өткен аптада да іске асып, аудан тұрғындары акция аясында белсенділік танытты.
Дәлірек айтар болсақ, өткен аптада 150-ге жуық адам Құлан ауылдық округіне қарасты Қарақат ауылындағы жаңа саябаққа отырғызылған тал-дарақтардың түбін қопсытып, шөп шабу жұмыстарын жүргізді.
Белсенділік танытқан жандардың қатарында 6 бірдей әкімдік пен 3 мекеме қызметкерлері бар. Олар су арналарын ретке келтіру, қоршау бағаналарын әктеу және саябақ аумағын тазарту жұмыстарын жүргізді. Бұл бағыттағы игі бастамалар әлі де жалғасып, кезең-кезеңімен іске асырылатын болады.
Жалпы аталмыш науқан аясында осы күнге дейін 12000-ға жуық тұрғын қамтылып, жоспарлы желілік кестеге сәйкес, 1100 тал-дарақтар отырғызылған. Сонымен қатар, 40 шақырым арықтар мен каналдар тазаланып, 18 саябақ пен 15 сквердің аулаларына сенбілік жұмыстары жүргізілген. Нәтижесінде 600 тонна күл-қоқыс сыртқа шығарылған.
Жәнібек БАЗЫЛБЕК.