Республикалық экоакция жалғасуда
117 Views
«Айналайын Атамекен, Ақ мекен! Қандай қазақ іздеп сені тапты екен?!» – деп, ақын Мұқағали Мақатаев жан-жүрегімен жырлағандай, киелі жер, құтты қоныс, қастерлі мекеннің құшағынан ешқашан кеткің келмейді. Сұлу төрін көрген сайын көргің келе береді… Бұл – атамекеніміздің шапағаты. Үйдің тазалығы іргесінен, ауласынан көрінеді.
Ал таза көше мен көгал саябақтар елдің айнасы іспетті. Қоршаған ортасы таза елдің жаны да таза.
Осындай мысалдарға толы «тазалық» сөзінің мағынасы терең. Жеке тазалықтан бастап, қоғамдық тазалыққа дейінгі әрекеттердің барлығы адамның шынайы ниетімен жасалатын дүние.
Елімізде республикалық экологиялық «Таза Қазақстан» акциясы жалғасып жатыр. Акцияның аты айтып тұрғандай, оның мақсаты – азаматтарды өз қаласы мен ауылын, ауласын таза ұстап, көшет отырғызуға үндеу.
Дәл осы мақсатта мемлекет басшысы Қасым-Жомарт Кемелұлының бастамасымен республикалық көлемде жүзеге асырылып жатқан «Таза Қазақстан» экологиялық акциясы аясында Құлан ауылындағы «Ардагерлер үйінің» аллеясы тазаланды. Акцияға зиялы қауым өкілдері мен аудан жастары, қоғамдық жұмысшылар белсене қатысып, аллея аумағы күл-қоқыстардан тазартылып, гүлзарларға абаттандыру жұмыстары жүргізілді. Сонымен қатар, акция барысында белсенділік танытқан бірқатар аудан тұрғындарына округ әкімінің алғыс хаты табысталды. Айта кетейік, жалпы аталған экоакция барысында 6 әлеуметтік нысан, 2 көп қабатты үйлер және 50-ден астам ардагерлер мен қарттардың аулалары, барлығы 40 шақырым арық-канал жүйелері және 18 саябақ, 15 сквер тазаланып, 1 100 түп тал-дарақтар отырғызылды.
Гүлнұр ЕРКАЗЫҚЫЗЫ.