Шөп сақтау орындарындағы өрт қауіпсіздігі

Өрттің негізгі себептері – тұрғын­дар­дың отпен абайсыз болуы, баланың отпен ойнауы және қасақана от қою оқиғалары. Жемшөп көбінесе жолға өте жақын жиналады, ал абайсызда немесе әдейі тасталған темекі тұқылы өртке әкеліп соғады. Мұндай оқиғалардың алдын алу үшін ең алдымен өртке қарсы ережелер мен нормаларды қатаң сақтау қажет.
Шөпхана электр өткізу желілерінен мейлінше алыс және қоршалған жер­лерде орналасуы тиіс.
Шөпханаларды суға жақын жерде орнатқан жөн. Жану жағдайы орын алған кезде отты тез сөндіруге болады. Мынадай ережелерді сақтаңыз:
– қожалық және фермерлік шаруа­шылықтарда төтенше жағдайлар кезінде арнайы өрт сөндіруге икемделген техника дайын тұруы қажет;
– егін мен астық жинауға жұ­мыл­­дырылған көліктер ұшқын өшір­гіштермен және өрт сөндіру құрал­дарымен жабдықталуы тиіс;
– тұрғын үй учаскелерінде шөпті жинау ғимаратқа және аула алдындағы құрылыстарға дейін кемінде 15 метр қашықтықта орындалады;
– шөп қоралардың шатырларына және басқа шаруашылық құры­лыс­тарына, электр жеткізу желі­ле­рі­нің астына жинауға тыйым салынады;
– сонымен бірге көшелерде, жол­дарда, аулалық учаскелерден тыс шөмеле, маяларды, сабан және басқа да мал азығын орналастыруға жол берілмейді;
– ірі азық қоймалары найза­ғай­дан қорғау құралдарымен жабықталады.
Жамбыл облысының Төтенше жағдайлар департаментінің Өрт қауіпсіздігі саласындағы бақылау және профилактикалық қызмет басқармасы азаматтардан шөп сақтайтын орындарда өрт қауіпсіздігінің ережесін қатаң сақтауын өтінеді.Бұл шарттарды орындаған жағдайда сіз өзіңізді және өзіңізге жақын адамдарыңызды орны толмас өкініштен қорғай аласыз. Сонымен қатар аудандық Төтенше жағдайлар бөлімі қызметкерлері жазғы маусымда құрғақ, ыстық және желдi ауа-райында ауылдық елдi мекендер мен кәсiпорындарда, саяжайлық ауылдарда, бақшалық учаскелерде от жағуға, өрт қауіпті жұмыстарды жүргiзуге, пеш, асханалық ошақ пен қатты отынмен жұмыс iстейтiн қазандық қондырғыларды жағуға жол берiлмейтіндігін естеріңізге салады. Өрт қауіпсіздік ережелерін бұзған жағдайда Қазақстан Республикасы Әкімшілік құқықбұзушылық туралы Кодексінің 336-бабы бойынша әкімшілік жауапкершілік қарастырылған.

Аудандық Төтенше
жағдайлар бөлімі мен
№10 өрт сөндіру бөлімі.

Поделиться ссылкой: