Менингококк – қауіпті ауру

Менингококк инфек­циясы – бұл Neisseria meninqitidis (менингококк) бактериясынан туындаған, назофа­рингиттен (мұрын қуысы мен жұтқын­шақтың шырышты қабығының қабы­нуы) ми қабығының қабынуына (менин­гит) және сепсиске (қанмен улану) дейінгі клиникалық көріністері бар әртүрлі органдар мен жүйелерді зақымдайтын өте қауіпті ауру.
Менингококк инфекциясы – ауа там­шылары арқылы жұғады және оны тек науқас адаммен немесе тасы­мал­даушымен жеткілікті тығыз және ұзақ қарым-қатынаста болғанда ғана жұқтыруға болады. Инфекция та­мақ­­тану кезінде тұрмыстық зат­тар (со­ның ішінде жалпы шыны­аяқ­тар мен қасықтар) арқылы да жұқ­тыру мүмкін. Менингококк ин­фек­­­циясы интоксикациядан, дене тем­пературасының жоғарылауынан, қал­­тырау­дан, бас ауруынан, құсудан, қызғылт дақтар түріндегі бөртпелерден басталады. Менингитпен ауыратын науқас басын артқа шалқайтып, аяқтарын бүгіп алады. Көбінесе мойнын соза ал­майды. Бұл белгілер бірнеше сағат ішінде өте тез пайда болуы мүмкін. Сондықтан дереу медициналық көмекке жүгіну маңызды.
Аурудың алдын алу:
– тамақ ішер алдында, дәретханаға, қоғамдық орындарға барғанда, жануар­лармен ойнағаннан кейін қолыңызды сабынмен жуыңыз. Бұл ережені өзіңіз сақтаңыз және балаларға үйретіңіз;
– жеке гигиена ережелерін сақтаңыз. Басқа адамдармен бір стақаннан ішпеңіз. Түтіктерді, ас құралдарын, гигиеналық ерін далабын, тіс щеткасын ешкіммен бөліспеңіз;
– иммунитетті сақтауға тыры­сыңыз. Ауру қаупін азай­ту үшін салауатты өмір салтын ұстаныңыз. Жиі дема­лыңыз, жеткілікті ұйықтаңыз, үнемі жаттығулар жасаңыз, дұрыс тамақтаныңыз. Көкөніс­тер, жемістер, дәнді дақылдар жеңіз;
– фарингит, тонзиллит, ларингит сияқ­ты мұрын-жұтқыншақтың созыл­малы ауруларынан арылыңыз;
– маусымдық аурушаңдық кезеңінде адамдар көп жиналатын жерлерге бар­мау, таза ауада көбірек серуендеу ұсынылады;
– түшкіргенде немесе жөтелгенде аузыңыз бен мұрныңызды жабыңыз;
– ересектерде суық тиген жағдайда дәке (бір рет қолданы­латын маскалар) қолдану керек.
Балалар­дағы менингитті емдеуді кеш бастау, медициналық көмекке уақтылы жүгінбеу өлімге әкелуі мүмкін. Мұны ата-аналар білуі және есте сақтауы маңызды.
С.Ускенбаев,
аудандық санитариялық-эпидемиологиялық бақылау басқармасының басшысы, мемлекеттік санитариялық бас дәрігері.

А.Бейсебаева,
эпидемиологиялық бақылау және қадағалау бөлімінің жетекші маманы.

Поделиться ссылкой: