Ардагерлер сайысқа түсті
83 Views
25 қазан – Республика күніне орай аудандық «Ардагерлер үйінде» бильярд, шахмат, асық ату және ләңгі тебуден ардагерлер арасында спартакиада өтті. Ардагерлер арасында өткен бұл спартакиаданы аудан әкімдігінің ішкі саясат бөлімі, аудандық ардагерлер Кеңесі, Құлан ауылдық округі әкімінің аппараты, Құлан ауылдық ардагерлер кеңесі және «Жастар ресурстық орталығы» КММ-нің қызметкерлері бірлесіп, ұйымдастырды. Спартакиаданың ашылу салтанатында аудандық ардагерлер Кеңесінің төрағасы Қожайхан Бижанов сөз сөйлеп, Республика күнінің маңызы мен мәніне тоқталды. Содан соң спартакиада басталды. Спартакиаданың қорытындысы бойынша бильярдтан жүлделі үшінші орынды Жантақбай Есбергенов, жүлделі екінші орынды Тұрғын Аденов, жүлделі бірінші орынды Санат Қырықбаев иеленді. Шахматтан жүлделі үшінші және екінші орындарды Қайшыбек Баймашев пен Райзо Шәділбеков иеленсе, жүлделі бірінші орын Рәсілхан Әуеловтің еншісіне жазылды. Асық атудан жүлделі үшінші орынды Мұрат Нәметқұлов, жүлделі екінші орынды Сүлей Қарашев иеленсе, жүлделі бірінші орынды Серік Сәлімбаев жеңіп алды. Ләңгі тебуден жүлделі екінші орынды Берік Әліпбаев, жүлделі бірінші орынды Тәліпбек Шақбаев иеленді. Жеңімпаз бен жүлдегер атанған ардагерлерге мақтау грамоталары мен арнайы сыйлықтар табыс етілді.
Марат Жолдасбекұлы.