Балалар қауіпсіздігіне бағытталған маңызды қадам
112 Views
Аудан көлемінде көпқабатты үйлерде тұратын отбасылар үшін аса маңызды «Қауіпсіз терезе» атты алдын алу акциясы өтті. Бұл бастама – балалардың жазатайым оқиғаларға ұшырауының алдын алуға бағытталған игі шара.
Статистикаға сүйенсек, жаз мезгілінде ашық терезеден балалардың құлап кету жағдайлары жиілей түседі. Әсіресе, кішкентай бүлдіршіндер ата-анасының қарауынсыз қалып, қайғылы жағдайларға тап болуы мүмкін. Осындай оқыс оқиғалардың алдын алу мақсатында аудан әкімдігі, Төтенше жағдайлар бөлімі және ерікті жастар бірігіп, тұрғын үйлерді аралап, түсіндіру жұмыстарын жүргізді.
Акция барысында тұрғындарға арнайы қауіпсіздік қондырғылары таныстырылды. Бұл құрылғылар терезенің ашылу шегін шектеу арқылы балалардың сыртқа құлап кетуінің алдын алады. Қуантарлығы, аталмыш құралдар демеушілердің қолдауымен осал топқа жататын және көпбалалы отбасылардың терезелеріне тегін орнатылды.
– Балалардың амандығы – барша қоғамның басты міндеті. Бүгінгі акция – жай ғана шара емес, бұл – қауіпсіздік мәдениетін қалыптастырудағы нақты әрекет, – дейді аудандық Төтенше жағдайлар бөлімінің өкілі А.Амангелді.
Белсенді жастар да бұл бастамадан шет қалмай, үйлерді аралап, ата-аналарға қауіпсіздік талаптарын түсіндіріп, орнатылған құрылғылардың қолдану тәртібін көрсетті.
Мұндай нақты қадамдар арқылы тек қауіпсіздікті күшейтіп қана қоймай, ата-аналардың жауапкершілігін де арттыру көзделуде. Ұйымдастырушылардың айтуынша, алдағы уақытта бұл акцияны басқа да көпқабатты үйлерде жалғастыру жоспарланған.
Жәнібек Базылбек.