Жолда қалған жандарға көмек көрсетілді

669 Views

Маусым айының 24 жұлдызында еліміз үшін естен кетпес оқиға орын алғаны баршамызға мәлім. Дәл осы күні Арыс қаласының маңында орналасқан әскери бөлімде оқ-дәрі сақтаулы тұрған қойма жарылып, тұрғындарды шошытқан еді. Қайғылы оқиға салдарынан көптеген арыстық тұрғындар жарақат алып, өмірмен қоштасқан жандар да болды. Ауыр жағдайды сезінген әрбір қазақстандық Арыстағы ағайынға қол ұшын созуға даяр бүгінде. Тіпті, қазіргі таңда «Арыс.Біз біргеміз!» атауымен ауқымды акция бастау алып, тұрғындарға көмек көрсетілуде.

Арыста орын алған жағдай қала тұрғындарына ғана емес, еліміздің өз­ге азаматтарына да өз кесірін тигіз­ді. Дәлірек айтар болсақ, бүгінде Арыс қала­сында орналасқан темір жол беке­тінің жұмысы мүлдем тоқтап тұр. Осының салдарынан алыс жолға шық­қан жолаушылар Арыс, Шымкент, Сарыағаш, Тараз қалаларына жете алмай әбігерге түсуде. Төтенше жағдайға байланысты темір жол бағыты өзгеріп, кейбір пойыздар Түркістан облысын айналып, Қарағанды арқылы біздің ауданға келуде. Сондай көліктердің бірі — Мәскеу-Бішкек бағытындағы жүрдек пойызы. Аталмыш көлік құ­ралы  Ресейден Ақтөбе арқылы кіріп, Қызылорда облысындағы Сексеуіл бе­ке­тінен Жезқазғанға мәжбүрлі түрде бұ­рылған. Қарағанды, Сарышаған, Шу секілді станцияларды басып келген жүрдек көлік сейсенбінің түнінде Луговой станциясына аялдады. Көлік­тегі жолаушыларды аудан әкімі Ерболат Садырқұлов бастаған топ ар­найы күтіп алып, қонақжайлығын көр­сетті. Айта кету керек, Ресейден Қырғызстанға бағыт алған пойызда Тәжікстан мемлекетінің азаматтары да бар.

Жолдан шаршаған жолаушылар­ға вокзал ішінен жайлы орындар дайын­далып, дастархан жайылды. Салқын сусындар ұсынылды. Сонымен қа­тар, қысымы көтіріліп, басы ауыр­ған жандарға орталық аурухана қыз­мет­керлері алғашқы медициналық кө­мек көрсетті. Одан бөлек Луговой вок­за­лы­ның қызметкерлері билет құнын ажы­ратып, жолаушылардың әрқай­сы­на тиісті қаражаттарын қайтарып бер­ді. Темір жол көлігіндегі Ақтөбе­ден Тараз қаласындағы «Інжу» жаз­дық лагеріне келе жатқан он бес бүл­дір­шін мен екі жетекшісіне арнайы тегін көлік ұйымдастырылып, аудандық жол потрульдік полициясының бақы­лауымен Тараз қаласына жеткізілді.

Шара барысында тұрарлықтардың қонақжайлығына дән риза болысқан жолаушылар өз алғыстарын жаудырып жатты. Солардың бірі – Жанар Оралбай. «Мен Ақтөбеден Шымкент қаласына жол тартқан жолаушылардың бірімін. Шыны керек жолда Арыс қаласында орын алған жағдайды естіп, абдырап қалдық. Мұндай сұмдық жағдай елі­мізде енді қайталанбаса екен. Сапар барысында пойыз басшылары бар жағдайды түсіндіріп, жолдың бағыты өз­геретінін жеткізді. Бәріміз оған түсіністікпен қарап, сабырлық сақтауды жөн көрдік. Бүгін міне аман-есен өз­де­ріңіздің аудандарыңызға келіп тоқ­тадық. Жол бойы төрт баламмен «Шымкентке енді қалай жетемін?» деп уайым­дап келе жатқанмын. Өздеріңіз көріп отырғандай оның бәрі артта қал­ды. Аудан басшыларының бізге ар­найы жасаған барлық мүмкіндіктері үшін жолаушылардың атынан үлкен алғы­сымды айтамын» — деп көкейіндегі ойы­мен бөлісті.

Осылайша жолда қалған жандарға жәрдем көрсетіліп, жолаушылар Та­раз, Шымкент, Сарыағаш қалаларына тұ­рарлықтар дайындаған арнайы көлік­­пен сапарларын жалғастырды.

Р.S. Арыста орын алған жағдай қайсымызға болмасын ауыр тиюде. Осы апаттың салдарынан әр түрлі жағдайға кезіккен жандарға қол ұшын созу әрбір қазақстандықтың міндеті деп білеміз. Сондықтан қолдан келгенше көмек беріп, қолдау білдіргеніміз абзал. Ендеше, сіз бен біз болып, жақсылық жасаудан жарысайық, ағайын!

 Жәнібек БАЗЫЛБЕКОВ.

Поделиться ссылкой: