Құрметке лайық азамат
581 Views
Біз көбінде жанымызда жүрген азаматтардың қадіріне жете бермейміз. Адам баласының табиғаты солай. Еліне елеулі еңбек етсе де ескерусіз, елеусіз қалатындар көп. Осы олқылықтың орнын толтырып, елге еңбегі сіңген азаматтардың өнегелі өмір жолын кейінгі ұрпаққа үлгі ету үшін «Жаныңда жүр жақсы адам» айдарымен мақалалар жазып, газет бетінде жариялауды жөн көрдік. Бүгінгі кейіпкеріміз аудан жұртына белгілі спорт ардагері Чулекеев Марат Алиұлы. 1986-1991 жылдары аудандық спорт комитетінің төрағасы қызметін атқарған Марат Алиұлы сол жылдары аудан спортының деңгейін биікке шығарды. Ауданда 1500 орындық стадион пайдалануға беріліп, футболдан жасөспірімдер арасында Қазақстан және КСРО біріншілігі өтті. Жоғары деңгейде ұйымдастырылған жарысқа спорт саласының басшылары жоғары бағасын берді. Ол 1990 жылы аудан көлемінде ең бірінші болып «Футболдан Республикалық дәрежедегі төреші» атағын алды. Ал, 1991 жылы Мәскеуде мемлекеттік орталық Ленин атындағы денешынықтыру және спорт институтында біліктілігін арттырып, «КСРО денешынықтыру және спорт үздігі» төсбелгісімен марапатталды. Халық депутаттары аудандық Кеңесінің үш мәрте депутаты болып, ауданның әлеуметтік-экономикалық өсіп-өркендеуіне де сүбелі үлес қосты.
Марат Алиұлының спорт саласына, аудан халқына сіңірген еңбегі мұнымен тоқтап қалған жоқ. Тәуелсіздік жылдары Ермахан Ыбырайымов атындағы спорт мектебінде директордың орынбасары, Әлихан Бөкейханов және Максим Горький атындағы орта мектептерде дене шынықтыру пәнінің мұғалімі қызметтерінде жүріп, оқушыларды спортқа баулыды. Оның оқушылары қандай жарысқа барса да жүлдемен оралып жүрді. Өзі өзге ұлттың өкілі болса да ұлттық ойын тоғызқұмалақтың аудан аумағында дамуына атсалысты. Ер еңбегін ел ұмытса да тарих ұмытпайды екен. Ол аудан тарихында тұңғыш тоғызқұмалақ ойынының жаттықтырушысы болып қалды.
Наурыз айының 12 жұлдызында зейнеткерлікке шыққан белсенді азамат әлі қоғамдық жұмыстарға білек сыбана кірісуге әзір. Қазіргі кезде мүмкіндігі шектеулі азаматтармен қоғамдық негізде жұмыс істеп келеді. Тоғызқұмалақ, дойбы, шахмат, үстел тенисі секілді спорт түрлерінен жарыстарға қатысып, аудан намысын абыроймен қорғап жүр. Осы қызметтеріне қарап, оның қандай құрметке болса да лайық азамат екенін байқайсыз. Тіпті, ауданның «Құрметті азаматы» атағын берсе де жарасар еді. Ең бастысы осындай жақсы адамдардың жанымызда жүргенін естен шығармайық.
Мереке Ержанұлы.