Өз ісінің шебері атанғандар

«WorldSkills Құлан – 2020» чемпионаты

«Білімді бәрінен биік қоятын ұлт қана табысқа жетеді» деген Елбасы­ның қанатты сөзі бар. Ал, жастарға басымдылық беретін межелердің қатарында білім әрдайым бірінші орында тұруы керек. Осы пайыммен қарағанда мемлекеттер арасында екі жылда бір өтетін «WorldSkills» чем­пио­натының кәсібінен нәсіп іздеген жастарға берері өте мол. Осы бәсекеге 22 жасқа дейінгі студент жастар, тіпті білікті мамандар мен кәсіпкерлер, өн­ді­рістік оқыту шеберлері де қатыса ала­ды. Дегенмен, бұл біріншілік Құлан агро­техникалық жоғары колледжінде өтіп отырғандықтан чемпионатқа оқу орнындағы жеті бөлімнен 37 студент бәсекеге шықты.
Ветеринария, агрономия, дәнекер­леу технологиясы, сән технологиясы, аспаздық іс, электромонтаж, графи­ка­лық дизайн құзыреттіліктері бойынша жарысқа қатысушылар өз ісінің шебері және өз мамандығының шебері ата­ғын қорғау үшін чемпионатқа алдын ала дайындықпен келді.Оларға Бірлік Тоғанбайұлы, Гүлзария Ибраева, Ғазиз Рахимов, Гүлмайра Рахманова, Мақсат Әденов, Бауыржан Ауғамбаев, Әдемі Бекназарова сынды білікті ұстаздар жетекшілік етеді.
Жарыс жоғары деңгейде өтті. Әр бөлім студенттері өздеріне берілген тапсырманы ыждахаттылықпен әрі сапалы орындауға ден қойды. Біреуі зертханалық сараптамаға сүйен­се, екіншісі дәнекерлеу тәсілін неғұр­лым мұқият атқаруға, үшіншісі өзі­нің ас даярлаудағы үйренгенін сарап­шылардың алдына тіл үйіретіндей етіп әкелуге бар өнерін салды. Бай­қау нәтижесі де шығарылды. Төре­ші­лер болашақ ветеринар Ерболат Айдаралыға, агроном Сезім Байбо­латоваға, дәнекерлеуші Антон Нови­чихинге, сәндеуші Айнұр Қы­дырбаеваға, электромонтажшы Мұрат Тұрысбекке және дизайншы Антон Сидневке жоғары баға қойды. Олардың барлығы да өз ісінің шебері деген атақ алып, бірінші дәрежелі диплом­мен марапатталып, облыстық жарыс­қа жолдама алды.

С.Қожеке.

Поделиться ссылкой: