Жаңатастан жүлдемен оралды

349 Views

№ 25 балалар мен жасөспі­рімдер спорт мектебінің тәрбие­ленушісі, жалпақсаздық жас өрен Айбын Айбас Жаңатас қаласында өткен бокстан КСРО және Азия жеңімпазы, ха­лықаралық дәрежедегі спорт шебері Серік Умирбековтің жүлдесіне арналған респуб­ли­калық турнирде 36 келі салмақ дәрежесінде жүлделі II орынға ие болды. Осы жарыстағы жетіс­тігінен соң, Айбын «Спорт шеберлігіне үміткер» атанды. Айта кетейік, бұл турнир 2008-2009 жылы туылған жасөс­пі­рімдер арасында өтті.
Каменка ауылындағы Бауыржан Момышұлы атын­дағы орта мектептің 8-ші сыныбында оқитын Айбынның бокс­пен айналысып жүргеніне 1-ақ жыл болыпты. Бапкері – Абзал Шығанбай. Айбынмен тілдес­тік. Ел мақтаныштары Геннадий Головкин, Қанат Ислам аға­лары секілді даңқты боксшы болғысы келетінін айтты ол өз сөзінде. Айбын негізінен ара қашықтықты сақтай отырып жұдырықтасқанды ұнатады екен. «Коронный удар» деп жатады ғой боксшылар. Яғни, Айдынның жақсы көретін әдісі – «Бір-екі-үш» соққысы. Бапкер Абзал Шығанбайдың айтуын­ша, бокс үйірмесіне қатысатын тәлімгерлер күніне 2 сағат жат­тығу жасайды екен. Осылай үздіксіз еңбектене берсе, Айбын­ның болашағы жарқын болары анық.
Жаңатас қаласындағы дәл осы жарыстан № 25 балалар мен жасөспірімдер спорт мек­тебінің тәрбиеленушіле­рі Нұраділ Жолдас, Бақыт Набиқұл және Абдулхафиз Иманалы да жүлделі II орын жеңіп алса, Айдар Жалғасбай жүлделі III орынды иеленді. Жас өрендеріміздің осындай жетістікке жетуіне бірден-бір себепкер ол – бапкерлер құ­ра­мы. Сондықтан Бақытбек Толымбетов, Абзал Шығанбай, Әлібек Исақұл және Дидар Кекежановқа қалай мақтау айтсақ та жарасады.

М.Диханбай.

Поделиться ссылкой: