«AMANAT» ПАРТИЯСЫН АЛДА ҮЛКЕН БЕЛЕСТЕР КҮТІП ТҰР
508 Views
«AMANAT» партиясының кезектен тыс құрылтайы ел өміріндегі елеулі кезең, тарихи оқиға деуге болады. Партияның кезектен тыс XXIII съезінде Мемлекет басшысы бүгінгі өзгерістер «AMANAT» партиясының заман талабына сай жаңара түсуіне жол ашатынына сенім білдірді.
Қасым-Жомарт Тоқаев съезд делегаттарына мемлекет пен қоғамды түбегейлі жаңарту үдерісі басталғанын айтты. Президенттің пікірінше, «AMANAT» осы жүйелі өзгерістерге белсене атсалысып келеді. Сонымен қатар партияның қолға алынған реформаларға жан-жақты қолдау көрсетіп, «Халық үніне құлақ асатын мемлекет» тұжырымдамасын тиімді жүзеге асыруға қосып жатқан үлесіне тоқталды.
Бүгінде «Жаңа Қазақстан» құру барысындағы ауқымды жұмыстардың атқарылып жатқандығы бәрімізге аян. Демек, осы бағыттағы жұмыстарды нәтижелі орындау үшін, ең алдымен, еліміздегі көшбасшы партияның жұмысы жаңаруы керек.
Жалпы, «Жаңа Қазақстан» дегенді қазір халық «Әділетті Қазақстан» деп қабылдап жатыр ғой. Президент партия құрамынан шығып, тізгінін халыққа тапсырғандай болды. Өйткені, партия төрағалығына Мәжіліс төрағасы Ерлан Қошановты ұсынып, оған ұйымдастыру қабілеті жоғары, тәжірибелі әрі білікті азамат деп баға берді.
Ал Мәжілісте халықтың сайлаған өкілдері отыр. Сол себепті, «AMANAT» партиясын халықтың жайын ойлаған партия деп есептеймін. Аманат дегеннің өзі қасиетті сөз.
Мемлекет басшысы алдағы конституциялық реформа аясында саяси ұйымға үлкен үміт артылып отырғанын ерекше атап өтті.
«Adal» партиясы «Amanat-қа» қосылды. «Adal» партиясының құрамында белсенді жастар көп. Сондықтан «Adal» партиясының қосылуы «AMANAT»-тың жастар қанатының әлеуетін арттырады», – деді А.Оралов. Ал «Adal» партиясының қосылуы «Жаңа Қазақстанды» құру жолындағы бірлескен әрекетті күшейтеді. Бұл символикалық жағынан алғанда аманатқа адал болу деген мағынаны білдіреді. Енді, екі партияның қосылып қызмет атқаруы әлемдік тәжірибеде бар нәрсе. Ол енді біздің елімізде де жүзеге асуда. Тәуелсіз мемлекет екеніміздің бір көрсеткіші осы емес пе? Алдағы уақытта екі партияның біріккен жұмысы бұдан да нәтижелі болады деген сенімдемін.
Сонымен қатар, Президентіміз Конституцияға енгізілген өзгерістер мен толықтырулар елдің бүкіл саяси архитектурасын кешенді түрде қайта қарауға, билік тармақтары арасындағы тежеу мен тепе-теңдіктің неғұрлым теңгерімді жүйесін құруға бағытталғанын айтты. Президенттің пікірінше, біз супер президенттік басқару түрінен түбегейлі бас тартамыз, Парламент пен мәслихаттардың өкілеттігін күшейтеміз. Партиялық-саяси жүйені жаңғырту – басым бағыттың бірі. Партиялар мен сайлау туралы заңнамаларды либерализациялау қоғамның рөлін күшейтеді. Бұл биліктің барлық деңгейінде қабылданатын шешімдеріне қатысты. Азаматтардың дауысы үшін бәсеке күшейіп, саяси үдерістердің қарқыны мен мазмұны өзгереді.
Жиында Мемлекет басшысы жауапты әрі аса маңызды кезеңге қадам басқанымызға тоқталды. Президенттің айтуынша, конституциялық реформа – Тәуелсіздік тарихындағы жаңа белес. Мұның бәрі уақыт талабынан және қоғам сұранысынан туындап отыр.
Бұл өзгерістерді дұрыс деп есептеймін. Себебі, бізге «Жаңа Қазақстан» құру және жаңа лекке ілесу үшін жаңашылдық керек. Мұны бүкіл қоғам талап етіп отыр. Халқымызда «Аманатқа қиянат жоқ» деген нақыл бар. Жаңа бастамалар еліміздің болашағын, мемлекетіміздің тұтастығын келешек ұрпаққа жеткізу жолындағы аманатымызға бағдар беретін болады деп сенемін.
Қанатбек Арыстанбеков,
«AMANAT» партиясы Т.Рысқұлов аудандық филиалының атқарушы хатшысы.