Қой-қошқарың болмаса, байлықта ойың болмасын!
222 Views
Жақында Шу ауданында етті және жүнді бағыттағы мал басын көбейтіп, асылдандыру мақсатында облыстық асыл тұқымды қой шаруашылықтарының көрмесі ұйымдастырылған болатын. Айта кететіні, мұнда тек қой емес, асыл тұқымды қошқарлардың да көрме-аукционы да өткен еді. Оның нәтижесі облыстық басылымдар мен әлеуметтік желі платформаларында жазылды. Сондықтан біз ол жағын қайталап жатпайық.
Шу ауданында ұйымдастырылған аталмыш шараға облыс әкімінің орынбасары Қанатбек Мәдібек қатысып, іс-шараның мазмұнына тоқталды. Ол өз сөзінде 2016 жылы облыста 2 миллион 406 мың бас қой болса, ол статистикаға бүгінгі таңда 1 миллион қой қосылып отырғанын атап өтті.
Аталмыш көрмеге аймақтағы аудандардан бөлек өзге облыстар мен шет мемлекеттерден де қонақтар қатысқан екен. Көрмеге жалпы жиынтығы 250-ге жуық шопан ата түлігі қатысыпты. Осы көрмеге Тұрар Рысқұлов ауданы өте жоғары деңгейде дайындалып барды. Айта кетейік, қазылар алқасы ортадағы таразыға тартылып, бойы өлшенген қозы мен қой, қошқарлардың сыр-сымбатына қарап, бағаларын берді. Нәтижесі көңіл қуантады, шыны керек. Атап айтсақ, Шудағы айтулы көрмеде «Алты тіс» номинациясында биік бой өлшемі бойынша Дархан Тынымбаевтың «Сенатор» қошқары жүлделі І орынға, «Абсалют» номинациясында салмағы және экстерьері бойынша Данияр Ақторпақовтың «Геракл» қошқары жүлделі І орынға, биік бой өлшемі бойынша жүлделі ІІ орынға лайық деп танылды.
Бұдан бөлек «Екі тіс» номинациясында Ерлан Сұралбектің «Хан» деген қошқары биік бой өлшемі бойынша жүлделі І орынға, ал салмағы бойынша жүлделі ІІІ орынға ие болды. Шерхан Жайлыштың «Таусаф» қошқары «Төрт тіс» номинациясында салмағы бойынша жүлделі ІІ орынға, биік бой өлшемі бойынша жүлделі ІІІ орынға лайық деп танылды. Қазылар алқасы Нұржан Болысбековтің қошқарын «Алты тіс» номинациясында биік бой өлшемі бойынша жүлделі ІІІ орынға лайық деп шешті. Шара соңында облыстың агроөнеркәсіп кешенін дамыту саласына қомақты үлес қосқаны үшін Айбек Сайлаубаев облыс әкімінің Құрмет грамотасымен марапатталды.
М.Жолдасбекұлы.