Шаруаның шаттыққа толы шаңырағы
123 Views
Аудандағы бір емес, екі аудандағы шаруа қожалықтарының қаржылай қолдаушысы атанған «Құлан-Дән» несие серіктестігі Жаңа жыл алдында өзінің 20 жылдық мерейтойын толайым табыспен атап өтті. 28-ші желтоқсан ақ түйенің қарны жарылған күн болды. Алдымен осы серіктестіктің қабырғасын қалап, шаңырағын көтерген ардагер-құрылтайшыларға арналған құрмет тақтасын ашу рәсімі тікелей кеңсе ғимаратының ішінде өтті. Бас банкир, Тұрар Рысқұлов ауданының Құрметті азаматы Рахманалы Әбдіқадыров жиналған жұртты қаржы ұйымының мерейтойымен құттықтай келіп, лента қию мәртебесін байырғы құрылтайшылар Санат Қырықбаев пен Бейсембай Таңбаевқа берді.
Құрмет тақтасы ашылған соң жиналған жұрт Мэлс Өзбеков атындағы мәдениет үйіне келді. Салтанатты жиында мемлекетіміздің Әнұраны орындалды. Жүргізушілер алғашқы сөзді баяндама жасау үшін «Құлан-Дән» несие серіктестігінің Басқарма төрағасы Р.Әбдіқадыровқа берді. Ол өз сөзінде серіктестіктің жиырма жылда қол жеткен табыстарын айтып, жиналған халық алдында жастары тоқсанды алқымдаған байырғы құрылтайшылар Райзо Шәділбеков пен Мейірқұл Іскендіров сынды абыздардың батасын алды. Баяндамадан соң мінбеге аудан әкімінің орынбасары Ерғазы Еспенов көтерілді. Одан кейінгі құттықтау сөздің кезегі аграрлық несие корпорациясының Жамбыл облысы бойынша филиалы директорының орынбасары Нұрғали Сейітбековке берілді. Ол Р.Әбдіқадыров мырзаға республикалық аграрлық корпорация басшысының Алғыс хатын салтанатты түрде табыс етті.
Салтанатты жиында облыстық несие серіктестіктері ассоциациясының өкілі Ерболат Досымбаев, аудандық мәслихат хатшысы Ербол Әбутәліпов сөз алып, игі тілектерін білдірді. Осыдан соң Алматыдағы «Тоғанай Т» баспасынан басылып шыққан (авторы С.Қожеке) «Құт қонған – Құлан-Дән» кітабының тұсауы кесілді. Кітаптың тұсауын Е.Еспенов, Н.Сейітбеков және С.Қырықбаев кесті.
Салтанатты жиын барысында серіктестіктің Басқарма мүшелерінің ұйғаруымен Р. Әбдіқадыровқа «Құрметті төраға» төсбелгісін Санат Отарымбетұлы дүйім жұрттың көзінше табыс етті. Жиналғандар артынша несие серіктестігінің жүріп өткен жолын баяндайтын бейнероликті көріп, тамашалады. Сондай-ақ, «Құрметті құрылтайшы» және «Үлгілі құрылтайшы» атағы 28 адамға берілді. Кеңсенің «Үздік қызметкері» деген мәртебеге бас есепші Жазира Құрамаева мен кепіл бағалаушы Абдулхамит Кейқуат лайықты деп табылды.
Айту ләзім, «Құрметті» деген атаққа ие болғандардың арасында марқұм Сырғатай Махамбетов, Асылбек Жайлыбаев, Шамшабек Қораласбаев, Асылхан Ақпанбетов, Кемел Азаматов та бар. «Үлгілі құрылтайшылардың» сапын байзақтық Ерболат Жүздікбаев, Сайлаубек Молдатаев, құландық Алпысбай Оңалбаев пен қарақыстақтық Аманкелді Қабылханов, ақыртөбелік Шубай Барлыбаев пен қызылшаруалық Елдос Әбутәліповтер толықтырып тұр.
Иә, айтуға тұрарлық мерейтой болды. Оған облысымыздың аудандарындағы аттас серіктестіктердің басшылары да келіп қатысты. Құрылтайшылар аудандық мәдениет үйі өнерпаздарының концертін көріп, соңынан «Шаңырақ» мейрамханасында жайылған мерекелік дастарханнан дәм татты.
Шаруаның шаңырағында өткен той «Құлан-Дәннің» жиырма жылда жеткен табысын тасытып, «Тайқазанының» ортаймағанын көрсетті.
С.Қожеке.
Суреттерде: мерейтой көріністері.
