Жанкелді – грант иегері
175 Views
2024 жылдың 14-18 қаңтар күндері ҚР Оқу-ағарту министрлігі мен «Дарын» республикалық ғылыми-практикалық орталығының ұйымдастыруымен Астана қаласында ауыл мектептерінің оқушыларына арналған республикалық олимпиаданың жаратылыстану-математикалық бағытындағы пәндер бойынша қорытынды кезеңі өтті. Алғаш рет өткізіліп отырған олимпиададан ауданымыздың 5 оқушысы жүлделі болды.
Пәндік олимпиада қорытындысы бойынша Тұрар Рысқұлов атындағы мектеп-лицейінің 11 сынып оқушысы Жанкелді Байкей және Жамбыл атындағы орта мектептің 10 сынып оқушысы Аружан Төрехан ІІ дәрежелі диплом және күміс медаль еншілесе, А.Шынәсілов атындағы орта мектептің 10 сынып оқушысы Шапағат Әсілбек, Т.Рысқұлов атындағы мектеп-лицейінің 10 сынып оқушысы Айғаным Керімбек, М.Горький атындағы орта мектептің 11 сынып оқушысы Темірлан Бигелді ІІІ дәрежелі диплом және қола медаль иегерлері атанды. Сондай-ақ, Т.Рысқұлов атындағы мектеп-лицейінің 11 сынып оқушысы Жанкелді Байкей математика пәні бойынша Астана Халықаралық университетінің грантын жеңіп алды. Жанкелді Байкей бұдан өзге де көптеген байқауларда үздіктердің қатарынан көрініп жүр. Жанкелдіні кезекті жеңісімен құттықтаймыз.
«Құлан таңы» ақпарат.