Ардагерлер алғы шептен көрінді

56 Views

Зымыран уақытта тоқтау жоқ, әрине. Күн артынан күндер, жыл артынан жыл­­дар жылжуда. Сынаптай сырғып 2023 жыл да өте шықты. Бұл жыл біз­­дің Құлан ауылдық ардагерлер ұйы­­мы үшін де жемісті жыл болды. Қатары­мызға ондаған жаңадан зейнетке шық­қан ардагерлер легі келіп қосылды. Біз оларды әдеттегідей қатарымызға салта­нат­пен қабылдап, қоғамдық жұ­мыс­тарға белсене араласуға тартып отыр­­мыз. Олардың өмірлік тәжірибелері бү­гінгі жастарға үлгі-өнеге болары даусыз.
Жыл қорытындысы бойынша аудан­дық ардагерлер Кеңесі облысымызда оза шауып, қарттар бірлес­тік­тері арасында бірінші орынға ие болып, алғы шептен көрінді. Ортақ іске аудандағы ең ірі де іргелі ұйым бо­лып табылатын біздің Құлан ауылдық округі ардагерлер Кеңесі де сүбелі үлес қосты деп айтуға толық негіз бар. Екі мыңға жуық мүшесі бар біздің ұйым орталықта болғандықтан ауданда өткізілетін барлық мәдени іс-шараларға белсене атсалысып келеді. Ауданаралық спорттық жарыстарда біздің ардагерлер ұйымымыз бас жүлде «Алтын бел­гіні» жеңіп алды. Мәдениет үйінде өткізілген «Батагөйлер» сайысында да көпті көрген көне көз қарияларымыз үлкен белсенділік танытып, көзге түсті. Тау бөктеріне қоныс тепкен Қарақат ауылына апаратын күрежол бойына ағаш отырғызу сенбілігіне қатысқан ардагерлеріміз бұл игілікті іс-шарада белсенділік көрсетіп қана қоймай, таби­ғатты аялау, қоршаған ортаны қорғау жөнінде келелі әңгіме қозғады.
«Мәдениет – асыл қазынам» атты Жамбыл облысының мәдениет күндері аясында ұйымдастырылған «Қымыз­мұрындық-2023» этно фестивалінің жоғарғы деңгейде өткізілуіне де барын­ша атсалысқанымызды айта кеткен орынды. Жалпы ардагерлер барлық мере­келік іс-шараларға белсене қаты­сып, аудан тұрғындарының ыстық ілтипатына бөленуде.
Бүгінде ауданның барлық елді ме­кен­дерінде жастар ұйымдары құрыл­ған. Біздің ауылдық округімізде де сон­дай ұйымдар бар. Осыған орай, округ аумағында тұратын қазы­налы қарт­тарымыз олармен тығыз байланыс жасап, жастарымызды отансүйгіштікке, қазақстан­­дық патриотизммен, иман­дылық рухында тәрбиелеуге үл­кен ықпалын тигізіп келеді. Атап айтқанда, Ауған соғысы және Желтоқсан ардагер­лерімен дөңгелек үстел форматында өткізіл­ген кездесуге де біздің қарт­тарымыз белсене атсалысып, айтулы шараның тартымды өтуіне үлкен үлестерін қосты.
Ауыл ардагерлері ұйымы қызметінің басты мақсаты – зейнеткерлердің құқы­ғын қорғауға, олардың қоғам­дық өмірге белсене қатысуын қам­та­масыз етуге және әлеуметтік тұр­мыстық жағдайларына көңіл бөлу­ге бағыт­­талған. Осы орайда Құлан ауы­лын­дағы 90 көшеге белсенді 23 ар­дагер бекітіл­ген. Олар өз көшелерінде тұра­тын зейнеткерлердің әлеуметтік-тұрмыстық жағдайын ұдайы зерделеп, көмек қажет болса тиісті орындарға жеткізіп отырады. Ал, біз өз тара­пымыздан ардагерлеріміздің көңіл-күйінің ұдайы көтеріңкі болуына, өмірге деген құштарлығының арта түсуіне тұрақ­ты түрде көңіл бөліп отырамыз. Осы мақсатпен жаз айында аудан, ауыл әкімдерінің және демеушілердің қолдауымен қазыналы қарттарымыз киелі Түркістан, көне Тараз шаһарлары мен Өзбекстан Республикасындағы Самарқанд және Ташкент қалаларына саяхат жасап қайтты. Қыста Сұлутөр шатқалындағы табиғат аясына шық­ты. Жыл қорытындысы бойынша 35 ардагеріміз түрлі мерекелік медаль­дармен марапатталып, бірқатар зейнет­керіміз «Ауданның Құрметті азаматы» атанды.
Құлан ауылдық ардагерлер кеңесі алдағы уақытта да аттан түспей, ел бір­лігін нығайтуға, адамгершілік пен имани қасиеттерді насихаттауға, Еге­мен еліміздің тәуелсіздігінің баянды болуына өз үлестерін қоса беретін болады.

Берік Әліпбаев,
Құлан ауылдық ардагерлер Кеңесінің төрағасы.

Поделиться ссылкой: