Басты принцип – ұлтқа қызмет ету

Заманауи мемлекеттік қызмет пен тиімді басқару құрылымын құру әрқашан мемлекеттік билік қызметіндегі ерекше басымдықтардың бірі болып табылады.
Мемлекет басшысы Қасым-Жомарт Кемелұлы Тоқаевтың алғашқы бастамаларының бірі – Президенттік жастар кадрлық резервіне іріктеу жүргізу, талантты, әрі білікті жастар үшін тиімді әлеуметтік лифтке айнал­ғанын атап өтуге болады.
Осылайша, елімізде Президенттік жастар кадрлық резервінің жобасы алғаш рет 2019 жылы бастау алып, 2021 және 2023 жылдары жалғасын тапты.
Бүгінгі таңда іріктеуден өткен та­лантты жастар еліміздің игілігі үшін мем­лекеттік органдар мен квази­мем­лекеттік сектор ұйымдарында табысты еңбек етуде.
Алайда, заман ағымы талантты жас­тарды мемлекеттік басқару ісіне аймақтар деңгейінде де тарту қажет­тілігін көрсетті.
Осыған байланысты, ағымдағы жылдың 1 наурызынан бастап елі­міздің әрбір өңірінде жас, талантты мамандарға арналған өңірлік кадрлық резервке іріктеу басталады.
Айта кету керек, әр өңірде өзі­нің өңірлік кадрлық резерві қалып­тастырылатын болады. Өңірлік резервке іріктеуге жоғары білімі және кемінде үш жыл еңбек өтілі бар, отыз бес жастан аспаған Қазақстан Республикасының азаматтары қатыса алады.
Бұл өңірдің дамуына өз үле­сін қосуға дайын жастар үшін мемле­кеттік қызметке әлеуметтік лифт болатындығы сөзсіз. Түрлі салалардағы кадр тапшылығы ескеріле отырып, іріктеу жеті салалық бағыт бойынша жүргізілетін болады. Бұл индустрия және өнеркәсіп, экономика, қаржы, әлеуметтік сала, тұрғын үй-коммуналдық шаруашылық және инфрақұрылым, агроөнеркәсіптік кешен және жер қатынастары, цифрландыру, экология салалары. Өңірлік резервке іріктеудің ашықтығын қамтамасыз ету мақсатында, қоғамдық бірлестіктердің, үкіметтік емес ұйымдардың, бұқаралық ақпарат құралдарының, бизнес-қоғамдастықтарының өкілдері және салалық сарапшылар тартылатын болады.
Жамбыл облысының Өңірлік кадр резервіне іріктеу бірқатар кезеңдерді қамтиды.
Бірінші кезең ағымдағы жылдың 1-31 наурызы аралығында өткізілетін кандидаттардың құжаттарын қабылдау болып табылады.
Үміткерлердің құжаттарын қабылдау өңірлік резервке іріктеу бойынша тиісті онлайн-платформада тіркелуі арқылы жүргізілетін болады. Тіркелген кандидаттардың жеке кабинетіне кіру логин және пароль бойынша жүзеге асырылады.
Өңірлік резервке іріктеу өткізу туралы хабарландыру уәкілетті органның, оның аумақтық бөлімшесінің (ҚР Мемлекеттік қызмет істері агенттігінің Жамбыл облысы бойынша департаментінің), облыс әкімі аппаратының интернет-ресурстарында жарияланған.
Келесі кезең – үміткерлердің заңна­маны білуге және жеке қасиеттерін бағалауға арналған тестілеу.
Тестілеу Қазақстан Республикасы Президентінің жанындағы Мемлекеттік бас­қару академиясының және оның филиалдарының (бұдан әрі – Ака­демия) базасында офлайн-форматта, автоматтандырылған режимде өткі­зіледі.
Тестілеуді тапсыру тілін үміткер өзі таңдайды және оның нәтижелерін есептеу автоматты түрде жүзеге асы­рылады.
Тестілеуге жіберілген үміткерлер тестілеу өтетін күні мен уақытын ақпа­раттық жүйеде көрсететін болады.
Тестілеудің бірінші блогы – құжаттарды қабылдау қорытындысы бойынша іріктеуге жіберілген бар­лық үміткерлер заңнаманы білуге тестілеуден өтеді.
Тестілеу басталар алдында үміткер оны өткізу тәртібімен танысады.
Заңнаманы білуге арналған тес­тілеу бағдарламасы Қазақстан Респуб­ликасының Конституциясын (15 сұрақ), «Қазақстан Республикасының мемлекеттік қызметі туралы» (15 сұрақ), «Сыбайлас жемқорлыққа қа­рсы іс-қимыл туралы» (15 сұрақ) Қазақстан Республикасы Заңдарын, Қазақстан Республикасы Президентінің 2015 жылғы 29 желтоқсандағы № 153 Жарлығымен бекітілген Қазақстан Республикасы мемлекеттік қызметшілерінің Әдеп кодексін (Мемлекеттік қызметшілердің қызметтік әдеп қағидаларын) (10 сұрақ) білуге арналған тестілерді қамтиды.
Қазақстан Республикасының заңна­масын білуге арналған тестілерді орындаудың жалпы уақыты 55 минутты құрайды.
Тестілеуге бөлінген уақыт өткеннен кейін тестілеу автоматты түрде аяқталады.
Тестілеудің екінші блогы – үміт­керлердің ішінен заңнаманы білуге және жеке қасиеттерін бағалауға арналған тестілеуден ең жоғары балл жинаған 50%-ы келесі кезеңге жолдама алады.
Үшінші кезең – уәкілетті орган жүргізетін құзыреттерді бағалау.
Кадр комиссиясының кандидаттарды құзыреттерін бағалауға жіберу туралы шешімі және оның өту кестесі ҚР Мемлекеттік қызмет істері агенттігінің Жамбыл аумақтық департаментінің интернет-ресурстарында, сондай-ақ онлайн-платформада жарияланады.
Ассессмент – орталық уәкілетті орган белгілеген кестеге сәйкес, Астана қаласындағы Мемлекеттік басқару академиясының базасында офлайн форматта өткізіледі.
Конкурсқа қатысу бойынша шығыстар (әңгімелесу өтетін орынға бару және кері қайту, тұрғын үй-жайды жалдау, тұру, барлық түрдегі байланыс қызметтерін пайдалану және басқалар) үміткерлердің өз қаражаты есебінен жүргізіледі.
Құзыреттерді бағалау кезеңінен өту тілін үміткер өзі таңдайды.
Бұл кезең кандидаттардың мі­нез-құлық индикаторларының жиын­тығы арқылы белгілі бір құзырет­терін анықтауға және бағалауға бағыт­талады. Сондай-ақ, топтық және жеке жаттығуларды қамти отырып, кезеңнен өту барысындағы кандидаттардың мінез-құлқы мен іс-әрекеті серти­фикатталған сарапшы-баға­лау­шы­лар­мен бақыланады. Ассессмент орта­лы­ғындағы бұл рәсімнің ұзақтығы 6-8 сағатқа дейін созылуы мүмкін.
Төртінші кезеңде кандидат таңдаған салалық бағытқа сәйкес жобаны қорғау форматында сұхбат жүргізілетін бо­лады. Презентация қысқаша жазбаша түсіндірмесі бар 5 слайдтан тұруы қажет.
Жобаны қорғау ұзақтығы 5 минуттан аспайды. Осы уақытта кандидат өзі ұсынған идеяның мәні мен мақсаттарын, жобаны жүзеге асырудағы туындайтын мәселелер мен күтілетін нәтижелер туралы нақты әрі толық түсіндіруі қажет.
Әрбір кандидатпен әңгімелесу барысы техникалық құралдарының көмегімен бейнежазбаға тіркелетін болады.
Соңғы кезеңде кадр комиссиясымен үміткерлерді өңірлік резервке іріктеу қаралатын болады.
Комиссияның шешімі негізінде ҚР Мемлекеттік қызмет істері агенттігінің Жамбыл облысы бойынша департаменті Өңірлік резервті қалыптастырады.
Комиссиямен ұсынылған үміткерлер Өңірлік резервке іріктеуге қатысу туралы өтініштерінде көрсетілген бағыттар бойынша Өңірлік резервке іріктеліп алынады.
Жоғарыда аталғандардың негізінде, өңіріміздің жастарын өз білімдері мен дағдыларын ел игілігі үшін қолдануға бірегей мүмкіндік беретін өңірлік, кадрлық резерв жобасына белсенді қатысуға тағы да шақырамын.
Тұтастай алғанда, мемлекеттік басқару жүйесінің үдемелі дамуы — мемлекеттік қызметтің қолданыстағы моделінің адами фактордың маңыз­дылығына бағытталғанын көрсете отырып, мемлекеттік қызметтерді пай­даланушы ретінде халыққа бағдарлану, яғни бұл бірінші кезекте «ұлтқа (қоғамға) қызмет ету» ұғымымен синоним болуға тиіс «мемлекеттік қызмет» ұғымын жаңғыртуды көздейді, сондай-ақ, одан әрі мемлекеттік аппараттың барлық дағдыларын дамытуға ықпал етеді.

Р.Шарипов,
Қазақстан Республикасы
Мем­лекеттік қызмет
істері агенттігінің
Жам­был облысы
бойынша департаменті
басшы­сының міндетін атқарушы.

Поделиться ссылкой: