Ерекше әсерге бөлеген фестиваль
110 Views
Биыл қазақстандық оқу-ағарту, ғылым және жоғары білім қызметкерлері салалық кәсіподағының құрылғанына – 100 жыл.
Бұл фестиваль өзге өңірлерде жоқ. Тек 2001 жылдан бері біздің облыста ұйымдастырылып келеді. Өткен аптада «Білім кәсіподағы: 100 жыл – бір бағыт, бір мақсат, бір мүдде» тақырыбы аясында облыстық білім басқармасының ұйымдастыруымен өрбіген «Тәуелсіз елдің ұлағатты ұстаздары» атты фестивалінің қорытынды концерті өтті. Биыл VІІІ рет ұйымдастырылып отырған фестивальге Тұрар Рысқұлов ауданы білім қызметкерлерінің педагогикалық ұжымдарының көркемөнерпаздары қатысып, өз өнерлерін ортаға салды. Айта кетейік, бұл фестиваль аудандық деңгейде жоғары деңгейде ұйымдастырылып, қорытынды концертке солардың ішінен іріктелген үздік өнерпаздар сахнаға шықты. Қорытынды концертке Жамбыл облыстық оқу-ағарту, ғылым және жоғары білім қызметкерлері кәсіподағының төрағасы, облыстық мәслихат депутаты Ерұлан Мағзымбеков, Жамбыл облыстық білім басқармасының оқу-әдістемелік орталығының әдіскері Жанна Кушерова, ҚР Журналистер одағының мүшесі, Ақпарат саласының үздігі Оралхан Дәуіт, ҚР Білім беру ісінің үздігі, «Сиқырлы таяқша» республикалық дирижерлар байқауының лауреаты Көркемғали Серімбетов, ҚР Мәдениет саласының үздігі, әнші әрі композитор Сәрсенбек Бәкір, ҚР Білім беру ісінің үздігі, республикалық және халықаралық байқауларда жүлдегер атанған би ұжымдарын дайындап, тәрбиелеген шебер педагог Ольга Привалова, қоғам белсендісі, Жамбыл облыстық қоғамдық кеңестің мүшесі Ринат Нұрақбаев, Абай атындағы Жамбыл гуманитарлық колледжінің оқытушысы Руслан Акбаров, облыстық филармонияның әншісі Маралбек Бабақұлов, облыстық филармонияның қазақ ұлт аспаптар оркестрінің әртісі, күйші Дидар Басықараев және «Еңбекші» республикалық кәсіподақтық басылымының бас редакторы Бейбіт Бекназаров қазылық етті.
Фестивальге қазылық еткен қонақтармен бірге концерттік бағдарламаны аудан әкімі Ернар Есіркепов пен аудандық мәслихат төрағасы Ербол Әбутәліпов те тамашалады.
Бұл жолғы фестиваль расыменде өте жоғары деңгейде ұйымдастырылғаны көзге көрініп тұрды. Әр аталым бойынша сәтті нөмірлер таңдалған. Және сол нөмірлерді орындап шыққан көркемөнерпаздардың дайындығына ерекше назар аударылған. Біз соны байқадық. Біз ғана емес, Мэлс Өзбеков атындағы аудандық мәдениет үйінің залын лық толтырған ұстаздар қауымы да осындай ойда отырғанына бек сенімді едік.
Фестиваль соңында қазылар алқасының төрағасы Ерұлан Сәбенұлының өзі де жұртшылық алдында сөйлеген сөзінде ауданымыздың педагогикалық ұжым көркемөнерпаздары жауапкершілікті сезініп, фестивальге тыңғылықты дайындалғанын сөз етті. Және фестивальге төрелік еткен әрбір қазылар алқасының сөйлеген сөздерінен де сол пікір аңғарылып тұрды. Расымен де бұның бәрі өздігінен бола салған концерттік шара емес. Бұл жерде аудандық білім бөлімінің басшысы Майра Базарова мен аудандық білім қызметкерлерінің кәсіподақ комитетінің төрайымы Айнұр Баймұратованың зор қолдау білдіргені анық. Фестиваль соңында әр аталым бойынша үздік өнер көрсеткен педагогикалық ұжымдар көркемөнерпаздарына алғыс хат пен бағалы сыйлықтар табыс етілді.
Марат Диханбай.