Еркіннің еңбегі зор
117 Views
Соңғы жылдары аудан орталығы Құлан ауылында ауыл әкімі болып қызмет етіп жүрген Еркін Сейтжапаровтың атқарған қызметіне, істеп жатқан жұмыстарына ауыл тұрғыны есебінде риза болып жүрген жағдайым бар.
Еркіннің жасаған жұмыстарының ішінде айта кететін жағдай ауылдағы көп көшелердің жолдары жөнделіп, қалпына келтірілді. Жолдан бөлек көшелердің барлығына жарық жүргізіліп, түн ішінде самаладай жарқырап тұрады. Оның өзі жастарға болсын, үлкенге болсын жақсы нәрсе болды. Одан басқа ауылды көгалдандыру мәселесі, жастарға түрлі спорт алаңдарын салғызу, көркі кеткен саябақтарды қалпына келтіру, мысалы, ардагерлер үйі жанындағы саябақтың қайта көркейтіп, балалардың алаңсыз ойнауы мен демалуына қажет жер болды. Салық басқармасының артындағы саябақты да жөндеп, қоршап, жабық футбол алаңы мен спортпен шұғылданамын деушілерге жағдай жасады. Ескерткішін сырлап, әрлеп, саябақтың сәнін келтірді. Ауыл шетіндегі дендро-саябағына да жөндеу жұмыстарын жасап, 100 адам қатысқан тазалық күнін өткізіп, ескірген саябағымызды көз қуантарлықтай етіп қойды. Ауыл ішіндегі көгалдандыру жұмыстары бір бөлек. Көздің жауын алатын қызылды-жасылды гүлдер, күнделікті күтімге алынған ағаштар, көктем басталысымен егілген жас талдар ауылымыздың сәнін келтіріп, ауасын тазартып тұр.
Осы атқарылған жұмыстар тікелей Еркіннің еңбегі деп білемін. Ауыл тұрғыны ретінде ризашылығымды жеткіземін. Жұмысы бір бөлек, әкім болса да, «әкім» едім деп көкірегін кермей, қарапайымдылығына, адамгершілігіне, көпшілдігіне, сыйластығына, білімділігіне ризамын. Қай кезде болсын қоңырау шалып немесе барып ауылға қатысты мәселені айтсаң, сөзге келмей келісіп, ақыл сұрап, кеңесіңе құлақ асып, сөзіңді жерге тастамай, мәселенің оңтайлы шешімін табуға барын салатынына көңілім толады. Өз топырағымызда туып, шаңын жұтып, көшесін басып өскен осы ауылдың баласы болғаннан кейін туған өлкесіне жаны ашитын бірден-бір азамат осы – Еркін. Жасаған жұмыстары көп, жасалары одан жетерлік.
Москау Нокрабеков,
Жамбыл облысының Құрметті азаматы,
Т.Рысқұлов ауданына еңбегі сіңген зейнеткер.