Өз мамандығына жауапкершілікпен қарайтын адам

Ақыртөбе орта мектебінің зейнеткер-мұғалімі Молдақасым Қайынбердіұлы 1953 жылы 22 қарашада Жамбыл облысы, Луговой ауданы, Ақыртөбе ауылында дүниеге келген.

1960 жылы Ақыртөбе орта мектебінің 1-сыныбына қабылданып, 1971 жылы мектеп бітірген. 1971 жылы Жамбыл қаласындағы қант зауытының рафинад цехында жұмысшы, 1972 жылы колхозаралық құрылыста тас қалаушы болып жұмыс істеген. 1972-1974 жылдары 2 жыл Кеңес армиясы қатарында әскери қызметін өтеп, сержант әскери атағын алған Молдақасым Қайынбердіұлы 1977-1980 жылдары Қарағанды физкультура және спорт техникумында оқып, дене шынықтыру пәні мұғалімі мамандығы, 1981-1986 жылдары Жамбыл педагогикалық институтында орыс тілі мен әдебиеті пәнінің мұғалімі мамандығын бітірген. 1974 — 2018 жылдар аралығында 44 жыл үздіксіз Ақыртөбе орта мектебінде ұстаздық қызмет еткен ұлағатты ұстаз бүгінде құрметті зейнеткерлік демалысын бос өткізбей, өскелең ұрпақты салауатты өмір салтына баулуды жалғастырып, 2018 жылдан бері Ақыртөбе ауылындағы балалар мен жасөспірімдер спорт мектебінің жаттықтырушысы қызметін атқарып келеді.
Өскелең ұрпақты білім нәрімен сусындатып, салауатты өмір салтына баулу мақсатында үздіксіз қызмет еткен ұстаздың еңбегі ұшан-теңіз. Ол 44 жыл ұстаздық қызметінде облыстық, республикалық деңгейдегі спорт жарыстарының жеңімпаздарын дайындап, тәрбиелеп шығарды. Атап айтқанда, Аруна Тұрсынбек, Мейіркүл Бестерек аудандық, облыстық, республикалық Бес тас ұлттық ойындар жарыстарында жүлделі орындарды иеленіп, спорт шеберінің кандидаты атанған. Бірнеше шәкірті Тараз, Астана қаласындағы спорт мектептерінің тәлім алушылары. 2017 жылы Астана қаласында өткен Халықаралық «ЭКСПО – 2017» көрмесіне командасымен қатысып, көрме қонақтарына тоғызқұмалақ және Бес асықтан өнер көрсеткен. 2002 жылы мектептің қыздар командасы Қаратау қаласында өткен облыстық чемпионатта І орын, 2017 жылы Астана қаласында өткен волейболдан республикалық турнирде мектептің қыздар командасы ІІ орынды иеленді. 2018 жылы Щучинск қаласында өткен Бес асықтан Қазақстан чемпионатында І орын, 2019 жылы Көкшетау қаласында өткен 3-4 сыныптар арасында Бес асықтан Қазақстан чемпионатында ІІІ орын, 2020 жылы Қызылорда қаласында өткен Бес асықтан Қазақстан чемпионатында ІІІ орын, 2021 жылы Алматы қаласында өткен Бес асықтан мектеп лигасында 4-орын, 2021 жылы Ақтау қаласында өткен республикалық Ауыл ойындары жарысында Бес асықтан І орын иеленген.
Кез келген жеңіс пен жетістік адамға оңай жолмен келмейтіні белгілі. Аталған жүлделі орындардың барлығы да бапкер мен оқушылардың қажырлы еңбегі мен үздіксіз дайындығының нәтижесі деп білеміз.
Молдақасым Қайынбердіұлы жас ұрпаққа білім беру мен тәрбиелеу, оларды салауатты өмір салтын насихаттауда сіңірген ұзақ жылғы қажырлы да жемісті еңбегі үшін 1993 жылы Қазақстан Республикасының «Білім беру ісінің үздігі» төсбелгісімен марапатталған. 2016 жылы «Білім қызметкерлерінің кәсіподағына сіңірген еңбегі үшін» медалімен, «Дене шынықтыру мен спортты дамытуға қосқан үлесі үшін» медалімен, 2017 жылы «Білім беру ісін дамытуға қосқан үлесі үшін» медалімен, 2022 жылы Тұрар Рысқұлов ауданының «Құрметті ардагері» төсбелгісімен марапатталды.
Мамандығын шын сүйетін, өз қызметіне үлкен жауапкершілікпен қарайтын адам ғана осындай толағай жетістіктерге жетіп, шексіз сый-құрметке бөленері сөзсіз.

Рәткүл Бекмолдаева,
Ақыртөбе орта мектебінің директоры.

Поделиться ссылкой: