5 кілем сыйға тарту етті
76 Views
Дана қазақта «Қайырымдылық жасасаң, қайырымын өзің көресің» деген ғибратты сөз бар. Осы тәмсілден өнеге алған адал жүректі, қайырымды азаматтар өздерінің туған жеріне жақсылық жасап, кәде-сыйлар тарту етіп жатады. Сондай кәде-сыйдың бірін Жаңатұрмыс ауылында дүниеге келген, осы күні Алматы облысы, Талғар ауданына танымал азамат әрі жеке кәсіпкер Нәдірқұлов Рустам Қайыпжанұлы өзі туып өскен Жаңатұрмыстағы «Құлыншақ» бөбекжай-бақшасына дәл мына суреттегідей бес кілем тарту етті.
«Құлыншақ» бөбекжай бақшасында 5 топ бар. Осы 5 топта 115 бүлдіршін тәрбиеленуде. Бұл бөбекжай-бақшада жалпы саны 37 адам еңбек етеді.
Әлбетте бала тәрбиелеу ісі – оңай емес. Жайшылықта жүріп, оны түсінбеуіміз мүмкін. Бірақ бұл жұмыстың қыр-сырын бөбекжай-бақшадағы тәрбиешілер жақсы біледі. Осы еңбектің қадірін бағалап, жеке кәсіпкер Рустам Қайыпжанұлы өзі дүниеге келген ауылдағы «Құлыншақ» бөбекжай-бақшасының ұжымына кілем сыйлап отыр. Осындай кәде-сый тарту еткен атымтай жомарт азаматқа «Құлыншақ» бөбекжай-бақшасының меңгерушісі қызметін уақытша атқарушы Қазыбаева Гаухар Ерсенқызы ұжымның атынан өз алғысын білдіріп, ризашылығын жеткізді.
Марат Аятберген.