Еңбегі адал азамат
149 Views
Мал дәрігеріне артылар жүк ауыр әрі жауапкершілігі жоғары. Сол сенімді ақтап жүрген жандардың бірі – Ақбұлақ ауылдық округінде ветеринариялық салада көп жылдан бері абыройлы еңбек етіп жүрген Қадірхан Сұлтанбайұлы.
Ол ветеринария саласында ұзақ жылдар бойы үздіксіз қызмет етуде. 1986-1991 жылдар аралығында колхозда веттехник мамандығы бойынша жұмыс істеді. Кейіннен 1991-1997 жылдары Қызылшаруа ауылындағы №1 тауарлы қой фермасында меңгеруші қызметін атқарды. 1998 жылдан бастап қазіргі күнге дейін Ақбұлақ ауылдық округінде ветеринариялық қызметте еңбек етуде. Жануарлардың саулығын қадағалау, аурулардың алдын алу және емдеу – оның күнделікті міндеттері. Адал еңбегі мен жауапкершілігі арқылы ел сеніміне ие болған Қадірхан Сұлтанбайұлы – ауыл өмірінің арқауы болған нағыз еңбек адамы.
– Осы салада жұмыс істеп жүргеніме биыл 39 жыл болады. Менің ағам мал бақты, үнемі сол кісімен бірге жүретінмін. Қойларды Сусамыр деген жерге айдап апарады. Сол кезде қойлардың аяғы ақсап, айырма болатын. Осындай қым-қуыт тіршілік, өзімнің бала жастан үлкендерден өнеге етіп алған еңбекқорлық секілді құнды қасиет ветеринар болуыма себепші болды. Содан Жамбыл зооветтехникумға оқуға түсіп, диплом алып шықтым. Қазіргі таңда Ақбұлақ ауылдық округінде ветеринариялық қызмет атқарып келемін. Басты міндетіміз – аурудың алдын алу, профилактикалық іс-шараларды уақтылы жүргізіп отыру. Жыл сайын ауылға жас мамандар келіп жатады. Алайда бұл салада тұрақтау үшін тек білім ғана емес, төзім мен ынта да қажет. Ветеринария – күрделі сала. Бірақ тиісті қолдау мен ынталандыру болса, жастардың қызығушылығы артады, – дейді Қадірхан Сұлтанбайұлы.
«Құлан медиа» ақпарат.